মৰাণ, 24 জুন: ৰাজ্যৰ পাঁচগৰাকীকৈ বিধায়ক লোকসভালৈ সংসদ হিচাপে নিৰ্বাচিত হোৱাৰ পিচতে উপ-নিৰ্বাচন অনুষ্ঠিত হোৱাটো খাটাং হৈ পৰিছে ৷ সেই অনুসৰি, অসমৰ ৫ টাকৈ বিধানসভা সমষ্টিৰ উপৰিও দুখন ৰাজ্যসভাৰ আসনৰ বাবে শীঘ্ৰে অনুষ্ঠিত হ'ব উপ-নিৰ্বাচন । যাক লৈ তৎপৰ হৈ পৰিছে ৰাজনৈতিক দলসমূহ ৷
কোনটো দলে কোন সমষ্টিত কাক নিৰ্বাচনী প্ৰাৰ্থী হিচাপে প্ৰক্ষেপ কৰিব, তাক লৈও আৰম্ভ হৈছে জল্পনা-কল্পনা ৷ লোকসভা নিৰ্বাচনত জয়লাভ কৰি দিল্লীমুখী হোৱা সাংসদসকলৰ ভিতৰত আছে ধলাই সমষ্টিৰ বিধায়ক পৰিমল শুক্লবৈদ্য, বিহালী সমষ্টিৰ বিধায়ক ৰঞ্জিত দত্ত, চামগুৰি সমষ্টিৰ বিধায়ক ৰকিবুল হুছেইন, চিদলী সমষ্টিৰ বিধায়ক জয়ন্ত বসুমতাৰী আৰু বঙাইগাঁও সমষ্টিৰ বিধায়ক ফণীভূষণ চৌধুৰী ৷
বিজেপিৰ সমান্তৰালকৈ বিৰোধীৰ ভূমিকা পালন কৰা ৰাইজৰ দলেও উপ-নিৰ্বাচনক কেন্দ্ৰ কৰি তৎপৰ হৈ উঠিছে ৷ সোণাৰিৰ গ্ৰীণ ভিউ হোটেলত অনুষ্ঠিত ৰাইজৰ দলৰ সাংগঠনিক সভা আৰু যোগদান কাৰ্যসূচীত অংশগ্ৰহণ কৰি দলটোৰ সভাপতি তথা বিধায়ক অখিল গগৈয়ে উপ-নিৰ্বাচনত নিজাববীয়াকৈ প্ৰাৰ্থী প্ৰক্ষেপ কৰাৰ কথা ঘোষণা কৰে ।
