কলিয়াবৰ, 21 মে’ : লোকসভা নিৰ্বাচনৰ ফলাফলৰ সন্দৰ্ভত বিধায়ক নুৰুল হুদাৰ ভৱিষ্যতবাণী ৷ অত্যুৎসাহী বিধায়কগৰাকীয়ে এইবেলি ইণ্ডি এলায়েঞ্চে 350 খন আসনৰে দিল্লীৰ মছনদ দখল কৰিব বুলি সোমবাৰে সংবাদ মাধ্যমৰ আগত সদৰী কৰে ৷ নতুনকৈ সমষ্টিৰ নিৰ্ধাৰণৰ পাচত ৰূপহীহাট সমষ্টিত অন্তৰ্ভুক্ত হোৱা কলিয়াবৰ মহকুমাৰ বৰঘূলীত সোমবাৰে নিশা উপস্থিত হয় বিধায়কগৰাকী ।
বিধায়কগৰাকীয়ে সংবাদ মাধ্য়মৰ আগত কেতবোৰ নিৰ্বাচনকেন্দ্ৰিক মন্তব্য প্ৰকাশ কৰে ৷ হুদাই কয় যে এইবাৰ বিজেপিয়ে সাম্প্ৰদায়িকতাৰ ৰাজনীতি কৰাৰ ফলাফল হাতে হাতে লাভ কৰিব ৷ যেতিয়া দিল্লীত ইণ্ডি এলায়েঞ্চে শাসনৰ বাঘজৰী নিজৰ হাতত ৰাখিব ৷ কংগ্ৰেছৰ নেতৃত্বত ইণ্ডি এলায়েঞ্চে অসমত 8 খন আসন পোৱাটো নিশ্চিত । অপেক্ষা মাথোঁ 4 জুনলৈহে ৷
উল্লেখ্য যে, নগাঁও লোকসভা সমষ্টিৰ ফলাফলৰ ক্ষেত্ৰতো মত প্ৰকাশ কৰে বিধায়ক হুদাই ৷ প্ৰায় ডেৰ লক্ষাধিক ভোটত কংগ্ৰেছ প্ৰাৰ্থী প্ৰদ্যুৎ বৰদলৈয়ে জয় লাভ কৰাৰো দাবী কৰে বিধায়কগৰাকীয়ে ৷ তদুপৰি গেৰুৱা দল বিজেপিক তুলাধূনা দি তেওঁ কয় যে দক্ষিণ ভাৰতত বিজেপিয়ে লাভ নকৰে এখনো আসন ৷ বিপৰীতে উত্তৰ ভাৰতত কিছুসংখ্য়ক আসন লাভ কৰিব যদিও সেয়া কংগ্ৰেছে লাভ কৰা আসনৰ তুলনাত তেনেই নগণ্য হ’ব ৷
সংবাদ মাধ্যমৰ কথা উনুকিয়াই তেওঁ কয় যে উত্তৰ ভাৰতত পূৰ্বৰ তুলনাত বিজেপিৰ আধিপত্য হ্ৰাস পাইছে ৷ বিজেপি চৰকাৰৰ দিনতে অভাৱনীয় হাৰত বৃদ্ধি পাইছে নিত্য ব্যৱহৃত সামগ্ৰীৰ লগতে ঔষধৰ মূল্য, বিজেপিৰ দিনতে লাগু কৰা হৈছে জি এছ টি, সাম্প্ৰদায়িকতাৰ লগতে বিজেপিৰ দুখীয়াৰ প্ৰতি থকা মনোভাৱ প্ৰকাশ পাইছে ৷ এনে কেতবোৰ কাৰণতে এইবাৰ অহংকাৰী দল বিজেপিক ভোট দি জয়ী কৰাৰ সলনি সাধাৰণ জনতাই কংগ্ৰেছক ভোট দিছে ৷ যাতে শান্তিপূৰ্ণ মনোভাৱেৰে ভাতৃত্ববোধ অটুট ৰাখি এখন সুস্থিৰ চৰকাৰ জনতাই লাভ কৰিব পাৰে ৷
উল্লেখ্য যে, বিধায়ক নুৰুল হুদাই কলিয়াবৰৰ বৰঘুলী বজাৰত কংগ্ৰেছ দলৰ কাৰ্যালয়ত উপস্থিত হৈ দলীয় কৰ্মীৰ সৈতে মত বিনিময় কৰে ৷
লগতে পঢ়ক :
নৰেন্দ্ৰ মোদীৰ দৃষ্টিত পাপ কৰিছে ইণ্ডি মিত্ৰজোঁটে; কি এই পাপ ? - Lok Sabha Election 2024
