নিউজ ডেস্ক, ১৫ মে' : পাকিস্তান অধিকৃত কাশ্মীৰত হোৱা প্ৰতিবাদৰ কথা উল্লেখ কৰি কেন্দ্ৰীয় গৃহমন্ত্ৰী অমিত শ্বাহে বুধবাৰে দাবী কৰে যে পাক অধিকৃত কাশ্মীৰ ভাৰতৰ অংশ । লগতে তেওঁ পাকিস্তানৰ পৰা এই ভূখণ্ড গ্ৰহণ কৰাৰো ভাবুকি দিয়ে । বিজেপিৰ আন নেতাসকলৰ সুৰত সুৰ মিলাই অমিত শ্বাহে পশ্চিমবংগৰ চেৰাম্পোৰত এক ৰেলীৰ সময়ত জম্মু-কাশ্মীৰ আৰু ৩৭০ অনুচ্ছেদৰ প্ৰসংগও উত্থাপন কৰে ।
অনুচ্ছেদ ৩৭০ বাতিলৰ পিচত কাশ্মীৰলৈ শান্তি আহিছে : অমিত শ্বাহে কয়, "২০১৯ চনত অনুচ্ছেদ ৩৭০ বাতিল কৰাৰ পিছত এসময়ৰ সমস্যাগ্ৰস্ত কাশ্মীৰলৈ শান্তি ঘূৰি আহিছে । কিন্তু পাকিস্তান অধিকৃত কাশ্মীৰ এতিয়া স্বৰাজ আৰু প্ৰতিবাদৰ শ্লোগানেৰে প্ৰতিধ্বনিত হৈছে ।" তেওঁ কয়, "২০১৯ চনত চৰকাৰে ৩৭০ অনুচ্ছেদ বাতিল কৰাৰ পিচত কাশ্মীৰলৈ শান্তি ঘূৰি আহিছে । কিন্তু এতিয়া আমি পাকিস্তান অধিকৃত কাশ্মীৰত প্ৰতিবাদৰ সাক্ষী হৈছোঁ । আগতে ইয়াত আজাদীৰ শ্লোগান শুনা গৈছিল, এতিয়া পিঅ'কেতো একেটা শ্লোগান শুনা গৈছে । পূৰ্বতে ইয়াত শিল নিক্ষেপ কৰা হৈছিল, এতিয়া পিঅ'কেত শিল নিক্ষেপ কৰা হৈছে ।"
কংগ্ৰেছক আক্ৰমণ শ্বাহৰ : পিঅ'কে অধিগ্ৰহণৰ দাবী সমৰ্থন নকৰাৰ বাবে কংগ্ৰেছ নেতাসকলক আক্ৰমণ কৰি শ্বাহে কয়, "মণি শংকৰ আয়াৰৰ দৰে কংগ্ৰেছ নেতাই কয় যে এইটো কৰা উচিত নহয়, কিয়নো তেওঁলোকৰ ওচৰত পৰমাণু বোমা আছে । কিন্তু মই কওঁ যে এই পাকিস্তান অধিকৃত কাশ্মীৰ ভাৰতৰ অংশ আৰু আমি ইয়াক গ্ৰহণ কৰিমেই ।" অমিত শ্বাহে কয় যে বৰ্তমানৰ লোকসভা নিৰ্বাচন 'ইণ্ডি মিত্ৰজোঁটৰ দুৰ্নীতিগ্ৰস্ত নেতা আৰু সৎ ৰাজনীতিবিদ নৰেন্দ্ৰ মোদীৰ মাজত বাছনি কৰাৰ বিষয়ে, যিয়ে এসময়ত মুখ্যমন্ত্ৰী আৰু বৰ্তমান প্ৰধানমন্ত্ৰী হোৱা সত্ত্বেও তেওঁৰ বিৰুদ্ধে কেতিয়াও এক পইচাৰ অভিযোগ নাই ।"
মমতা বেনাৰ্জীক সমালোচনা : "বংগই সিদ্ধান্ত ল'ব লাগিব যে তেওঁলোকে শৰণাৰ্থীসকলৰ বাবে অনুপ্ৰৱেশকাৰী বিচাৰে নে নাগৰিকত্ব সংশোধনী আইন বিচাৰে । বংগই সিদ্ধান্ত ল'ব লাগিব যে ই জিহাদৰ বাবে ভোট দিব বিচাৰে নে বিকাশক ভোট দিব বিচাৰে ।" তেওঁ লগতে কয় । উল্লেখ্য যে অমিত শ্বাহে পশ্চিমবংগৰ মুখ্যমন্ত্ৰী মমতা বেনাৰ্জীক নাগৰিকত্ব সংশোধনী আইনৰ বিৰোধিতা কৰাৰ বাবে আৰু তেওঁৰ ভোট বেংকক সন্তুষ্ট কৰিবলৈ 'অনুপ্ৰৱেশকাৰীৰ সমৰ্থনত ৰেলী উলিওৱা' বুলি সমালোচনা কৰে ।
