গুৱাহাটী, 21 মে’ : লোকসভা নিৰ্বাচনৰ প্ৰচাৰৰ মাজতে ভাৰতীয় সংবিধানক লৈ কংগ্ৰেছ নেতা ৰাহুল গান্ধীক সাঙুৰি মন্তব্য কৰি বিতৰ্কৰ আৱৰ্তত সোমাই পৰিছে অসমৰ মুখ্যমন্ত্ৰী ড৹ হিমন্ত বিশ্ব শৰ্মা ৷ মুখ্যমন্ত্ৰী হিমন্ত বিশ্ব শৰ্মাক উভতি ধৰিছে কংগ্ৰেছৰ জ্যেষ্ঠ ৰাষ্ট্ৰীয় নেতা পৱন খেড়াই ৷ লগতে হিমন্ত বিশ্ব শৰ্মালৈও প্ৰেৰণ কৰিছে ভাৰতীয় সংবিধানৰ ৰঙা পকেটবুক সংস্কৰণৰ এটা কপি ৷ সামাজিক মাধ্যম X-ত এই কথা সদৰী কৰিছিল পৱন খেড়াই ৷
পিছে পৱন খেড়াক ধন্যবাদ জনাই প্ৰত্যুত্তৰ দি কটাক্ষ কৰে অসমৰ মুখ্যমন্ত্ৰীগৰাকীয়ে ৷ ড৹ হিমন্ত বিশ্ব শৰ্মাই এইক্ষেত্ৰত মন্তব্য প্ৰকাশ কৰি কয় যে কংগ্ৰেছে সংবিধানৰ প্ৰকৃত সংস্কৰণটোৰ কথা পাহৰি পেলাইছে, তাতকৈ ৰঙা পকেট বুক সংস্কৰণৰ প্ৰতিহে মোহ বেছি কংগ্ৰেছৰ ৷ কেৱল সেয়ে নহয়, পৱন খেড়াৰ পৰা তেওঁ বিচাৰিলে সংবিধানৰ মৌলিক কপি ৷
উল্লেখ্য যে, সামাজিক মাধ্যম এক্সত ১৭ মে’ত অসমৰ বিজেপি চৰকাৰৰ মুখ্যমন্ত্ৰী গৰাকীয়ে দেশৰ সংবিধানক লৈ ৰাহুল গান্ধীক সাঙুৰি এক মন্তব্য কৰিছিল ৷ এক্সতো হিমন্ত বিশ্ব শৰ্মাই লিখিছিল এনেদৰে - “ভাৰতীয় সংবিধানৰ মূল প্ৰতিলিপিৰ আৱৰণ নীলা ৷ চীনৰ মূল সংবিধানৰ আৱৰণ ৰঙা ৷ ৰাহুলে চীনৰ সংবিধান কঢ়িয়াই লৈ ফুৰে নেকি? আমি পৰীক্ষা কৰিব লাগিব” ৷
তাৰ পৰৱৰ্তী সময়ত একেদিনাই X ত মুখ্যমন্ত্ৰী শৰ্মাই লিখিছিল- “ৰাহুলে তেওঁৰ সভাত উপস্থিত থকা ৰাইজৰ আগত চীনৰ ৰঙা সংবিধান প্ৰদৰ্শন কৰিছে ৷ নীলা ৰঙৰ আমাৰ সংবিধানত, The Directive Principles of State Policy নামৰ এটা অধ্যায় অন্তৰ্ভুক্ত কৰা হৈছে ৷ যিয়ে আমাৰ দেশত এক সম নাগৰিক সংহিতা প্ৰণয়ন কৰাটো পবিত্ৰ কৰ্তব্য কৰি তুলিছে; এতিয়া ইয়াৰ বিৰোধিতা কৰিছে ৰাহুলে ৷ সেইবাবেই মই নিশ্চিত যে, তেওঁৰ হাতত থকা সংবিধানখন নিশ্চয় চীনা সংবিধান” ৷
