নিউজ ডেস্ক, ৩ জুলাই: ঝাৰখণ্ডৰ মুখ্যমন্ত্ৰী চম্পাই ছোৰেণে বুধবাৰে পদত্যাগ কৰে । তেওঁ ৰাজভৱনলৈ গৈ ৰাজ্যপাল চি পি ৰাধাকৃষ্ণনৰ হাতত পদত্যাগ পত্ৰ দাখিল কৰে । পদত্যাগ কৰাৰ পিচতে চৰকাৰ গঠনৰ দাবী কৰিছে হেমন্ত ছোৰেণে । মুখ্যমন্ত্ৰী হিচাপে চম্পাই ছোৰেণে বহু সিদ্ধান্ত লৈছিল । ঝাৰখণ্ডৰ ৰাজনীতিত তেওঁ যুজাৰু আৰু তৃণমূল পৰ্যায়ৰ নেতা হিচাপে পৰিচিত । মুখ্যমন্ত্ৰী হৈ থকাৰ সময়তো তেওঁ নিজৰ কাম দৃঢ়তাৰে কৰিছিল ।
হেমন্ত ছোৰেণৰ পদত্যাগৰ পিচতে মুখ্যমন্ত্ৰী হৈছিল চম্পাই ছোৰেণ । তেওঁ ছেৰাইকেলাৰ পৰা একেৰাহে চাৰিটা কাৰ্যকাল বিধায়ক হিচাপে কাৰ্যনিৰ্বাহ কৰি আহিছে । কিন্তু ২০০০ চনৰ বিধানসভা নিৰ্বাচনত তেওঁ পৰাজয়ৰ সন্মুখীন হ’বলগীয়া হৈছিল । ইয়াৰ পিচত তেওঁ একেৰাহে নিৰ্বাচনত বিজয়ী হৈ আছে চম্পাই ছোৰেণ ।
চম্পাই ছোৰেণ এটা সাধাৰণ খেতিয়ক পৰিয়ালৰ পৰা আহিছে । মাক-দেউতাকৰ প্ৰথম সন্তান আছিল । শিক্ষাগত অৰ্হতাৰ কথা ক’বলৈ হ’লে চৰকাৰী বিদ্যালয়ত মাত্ৰ দশম মানলৈকে পঢ়িছিল চম্পাই ছোৰেণে । তেওঁ দেউতাকৰ লগত জিলিংগাগোৰা গাঁৱত বাস কৰিছিল আৰু খেতি-বাতিৰ কামত দেউতাকক সহায় কৰিছিল । তেওঁ কম বয়সতে বিয়া পাতিছিল । তেওঁৰ তিনিজন পুত্ৰ আৰু ২ গৰাকী কন্যা আছে ।
