গুৱাহাটী, 5 জুন : ফলাফল ঘোষণাৰ পিচত বিজেপি নেতৃত্বাধীন এন ডি এ চৰকাৰে দেশৰ শাসনভাৰ চম্ভালিবলৈ আৰম্ভ কৰিছে যো-জা ৷ ইতিমধ্যে অসমত বিজেপিয়ে লাভ কৰিছে 11 খনকৈ আসন ৷ মঙলবাৰে নিৰ্বাচনী ফলাফল ঘোষণাৰ পিচতে বুধবাৰে বশিষ্ঠস্থিত ৰাজ্যিক বিজেপিৰ কাৰ্যালয়ত সংবাদমেল সম্বোধন কৰে ৰাজ্যিক বিজেপিৰ সভাপতি ভৱেশ কলিতাই ৷
নিৰ্বাচনী ফলাফল সন্দৰ্ভত সংবাদ মাধ্যমক সম্বোধন কৰি সভাপতি কলিতাই কয় যে, নৰেন্দ্ৰ মোদী তৃতীয়বাৰৰ বাবে প্ৰধানমন্ত্ৰীৰ পদত অধিষ্ঠিত হোৱাৰ বাবে সম্পূৰ্ণৰূপে সাজু হৈছে ৷ নিৰ্বাচনৰ পূৰ্বে দিয়া মোদীৰ গেৰাণ্টিৰ ভিত্তিতে গঠন হ’ব এন ডি এ চৰকাৰ ৷ অসমত প্ৰথমবাৰৰ বাবে লোকসভা নিৰ্বাচনত "ডবল ডিজিট" লাভ কৰিছে বিজেপিয়ে ৷ নিৰ্বাচনী ফলাফলৰ বাবে মুখ্যমন্ত্ৰী তথা দলৰ সকলো কাৰ্যকৰ্তাৰ হৈ সভাপতিগৰাকীয়ে অসমবাসীক জ্ঞাপন কৰে ধন্যবাদ ৷
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক : https://www.etvbharat.com/as/!elections/lok-sabha-election-results-2024
আনহাতে, এই নিৰ্বাচনত কংগ্ৰেছে অসমত লাভ কৰিছে তিনিখন আসন ৷ কংগ্ৰেছৰ আসন লাভক কেন্দ্ৰ কৰিও ৰাজ্যিক বিজেপিৰ সভাপতিগৰাকীয়ে মন্তব্য প্ৰকাশ কৰে ৷ ভৱেশ কলিতাই কয় যে, একমাত্ৰ যোৰহাট সমষ্টিক বাদ দি কংগ্ৰেছে সংখ্যালঘূ এলেকাত অগ্ৰগতি লাভ কৰিছে ৷ তদুপৰি কংগ্ৰেছৰ দপদপনি বেছিদিন নিটিকে বুলিও বিৰোধী দলটোক কটাক্ষ কৰে সভাপতি ভৱেশ কলিতাই ৷
ইয়াৰ পিচতে কলিতাই কৰিমগঞ্জ সমষ্টিৰ কথা উল্লেখ কৰি কয় যে, কৰিমগঞ্জত আকৰ্ষণীয় প্ৰতিদ্বন্দ্বিতা হৈছিল যদিও শেষ হাঁহি মাৰিবলৈ সক্ষম হয় বিজেপি প্ৰাৰ্থী কৃপানাথ মাল্লাই ৷ বৰপেটা, কাজিৰঙা, কলিয়াবৰ, দৰং-ওদালগুৰি, ডিব্ৰুগড়, লখিমপুৰ, শোণিতপুৰ আৰু কোকৰাঝাৰত গেৰুৱা দলটোৱে বিচৰামতে ফলাফল লাভ কৰা বুলি সংবাদমেলত ব্যক্ত কৰে ৰাজ্যিক সভাপতিয়ে ৷ এইবাৰৰ নিৰ্বাচন শেষ হ’ল ৷ গতিকে এতিয়া দলটোৰ লক্ষ্য হ’ব '26 ৰ বিধানসভা নিৰ্বাচন ৷ যাৰ বাবে এতিয়াৰে পৰা প্ৰস্তুতি চলাব বিজেপিয়ে ৷
এ আই ইউ ডি এফ সন্দৰ্ভত মন্তব্য আগবঢ়াই ভৱেশ কলিতাই কয় যে, সাম্প্ৰদায়িকতাবাদ এৰিলেহে দলটোৰ উন্নতি হ’ব ৷ পূৰ্বৰ তুলনাত এইবাৰ ধুবুৰীত বৃদ্ধি পাইছে ভোটৰ সংখ্যা ৷ ধুবুৰীত মুঠ 27 লাখৰ ভিতৰত 23 লাখেই সংখ্যালঘূৰ ভোট বুলি সংবাদমেলত ৰাজ্যিক বিজেপিৰ সভাপতি কলিতাই প্ৰকাশ কৰে ৷
লগতে পঢ়ক: আমি হাৰি হাৰিও জিকিছো, বিজেপি জিকি জিকিও হাৰিছে: ভূপেন কুমাৰ বৰা - Lok Sabha Election Results 2024
