শিলচৰ: পাঁচ সমষ্টিৰ উপ-নিৰ্বাচনৰ কাইলৈ মনোনয়ন দাখিলৰ অন্তিম দিন । আজি অৰ্থাৎ বৃহস্পতিবাৰে মনোনয়ন দাখিল কৰে কেইবাগৰাকীও প্ৰাৰ্থীয়ে । অন্যতম চৰ্চিত সমষ্টি ধলাইতো আজিৰ দিনটোত মনোনয়ন দাখিল কৰে বিজেপি আৰু এগৰাকী নিৰ্দলীয় প্ৰাৰ্থীয়ে ।
মনোনয়ন দাখিল বিজেপি প্ৰাৰ্থী নিহাৰৰঞ্জন দাসৰ:
হাজাৰ হাজাৰ দলীয় কৰ্মী আৰু সমৰ্থকক লগত লৈ বৃহস্পতিবাৰে মনোনয়ন দাখিল কৰে ধলাইৰ বিজেপি প্ৰাৰ্থী নিহাৰৰঞ্জন দাসে । মনোনয়নপত্ৰ দাখিলৰ সময়ত তেওঁক সংগ দিয়ে অসম প্ৰদেশ বিজেপিৰ প্ৰভাৰী হৰীশ দ্বিবেদী, অভিভাৱক মন্ত্ৰী জয়ন্ত মল্লবৰুৱা, বৰাকৰ দুই সাংসদ পৰিমল শুক্লবৈদ্য আৰু কৃপানাথ মাল্লাসহ বৰাকৰ আটাইকেইজন বিজেপি বিধায়কে । শিলচৰ টাউন ক্লাব খেলপথাৰত এক বিশাল সভা অনুষ্ঠিত কৰি বৃহৎ সমদল কৰি কাছাৰ জিলা আয়ুক্তৰ কাৰ্যালয়লৈ গৈ মনোনয়নপত্ৰ দাখিল কৰে নিহাৰৰঞ্জন দাসে । এইবাৰ ধলাই আসনত বিজেপি প্ৰাৰ্থী নিহাৰৰঞ্জন দাসৰ জয় নিশ্চিত বুলি মন্তব্য মন্ত্ৰী জয়ন্ত মল্লবৰুৱাৰ ।
মন্ত্ৰীগৰাকীয়ে কয়,"ধলাইৰ কাৰ্যকৰ্তা, সাধাৰণ ৰাইজ যিধৰণে ওলাই আহিছে তাৰ পৰা বুজা যায় যে আমাৰ দলৰ মাজত উৎসাহ আছে আৰু আমি ৰাইজৰ আৰ্শীবাদ লৈ বিপুল ভোটৰ ব্যৱধানত জয়ী হ'ব পাৰিম । আমাৰ দলত প্ৰথমৰে পৰাই এটা কথা শিকোৱা হয় যে প্ৰথম ৰাষ্ট্ৰ, তাৰপিছত দল, তাৰপিছত ব্যক্তি । ব্যক্তিৰ হিচাপ আমি কেতিয়াও নকৰো । গতিকে কোন ব্যক্তিয়ে কি কৰিছে সেয়া আমাৰ হিচাপত নপৰে ।"
মনোনয়ন দাখিল বিজেপি ত্যাগী অমিয়কান্তি দাসৰ:
বিজেপি প্ৰাৰ্থীগৰাকীৰ সমান্তৰালকৈ টিকট নোপোৱাৰ ক্ষোভত সদ্য বিজেপি ত্যাগী অমিয়কান্তি দাসেও আজি দাখিল কৰে মনোনয়ন পত্ৰ । কাছাৰ জিলা বিজেপিৰ উপ-সভাপতি হিচাপে দায়িত্ব পালন কৰা অমিয়কান্তি দাসে বিজেপিৰ টিকট নাপাই ক্ষোভত দল ত্যাগ কৰি নিৰ্দলীয় প্ৰাৰ্থী হিচাপে কাছাৰ জিলা আয়ুক্তৰ কাৰ্যালয়ত দাখিল কৰে মনোনয়নপত্ৰ । নিজা সমৰ্থকৰ লগত জিলা আয়ুক্ত কাৰ্যালয়ত মনোনয়নপত্ৰ দাখিল কৰি দাসে কয়,"ধলাইৰ ৰাইজে বিচাৰিছে, সেইবাবেই নিৰ্দলীয় প্ৰাৰ্থী হৈ প্ৰতিদ্বন্দ্বিতা কৰিছো । জয়ক লৈ ১০০% আশাবাদী ।"
