ধুবুৰী, 1 এপ্ৰিল : পুনৰ উদ্ভট মন্তব্য এ আই ইউ ডি এফ প্ৰধান বদৰুদ্দিন আজমলৰ । এইবাৰ কংগ্ৰেছ নেতা ৰকিবুল হুছেইনক উদ্দেশ্যি উদ্ভট মন্তব্য আগবঢ়ালে বিতৰ্কিত সাংসদগৰাকীয়ে ৷ কংগ্ৰেছ তথা ৰকিবুল হুছেইনে আজমলৰ বাবেই অসমত বিজেপি চৰকাৰ হৈছে বুলি দাবী কৰি অহা অভিযোগৰ প্ৰত্যুত্তৰ দি আজমলে কয়, "ৰকিবুল হুছেইন আৰু হিমন্তৰ মাজত আছে বন্ধুত্বপূৰ্ণ সম্পৰ্ক । ৰকিবুলৰ কাৰণেই বিজেপি চৰকাৰ হৈছে অসমত ।"
আনহাতে বিয়াৰ প্ৰসংগত আজমলে ৰকিবুল হুছেইনক উদ্দেশ্যি কয়, "ৰকিবুলৰ শক্তি নাই বাবে এটা সন্তান জন্ম দিছে । আমাৰ শক্তি আছে বাবে আমাৰ সাতটা সন্তান জন্ম হৈছে । ৰকিবুল হুছেইনক ধুবুৰীৰ মানুহে বেয়া পায় । ৰকিবুল হুছেইন হাৰিব এইবাৰ ।"
উল্লেখ্য যে, দেওবাৰে ধুবুৰীৰ গৌৰীপুৰত এ আই ইউ ডি এফে ইফতাৰ মেহফিলৰ আয়োজন কৰে । গৌৰীপুৰৰ বিধায়ক নিজানুৰ ৰহমানৰ বাসগৃহত আয়োজিত ইফতাৰ মেহফিলত উপস্থিত থাকে আজমল । এই অনুষ্ঠানতে ৰকিবুল হুছেইনক কঠোৰ ভাষাৰে সমালোচনা কৰে আজমলে । দলটোৱে ঈদৰ পিছত নিৰ্বাচনী প্ৰচাৰ চলাব বুলি উল্লেখ কৰে ।
ইপিনে সমাগত নিৰ্বাচনত আজমলে কমেও 9 লাখ ভোটৰ ব্যৱধানত সাংসদ হিচাবে নিৰ্বাচিত হ’ব বুলি দাবী কৰে । লক্ষণীয় বিষয় যে, নিৰ্বাচন আহিলেই জনপ্ৰতিনিধিৰ মুখত বিভিন্ন অসামাজিক আৰু অলাগতিয়াল কথা বতৰা কোৱা পৰিলক্ষিত হৈ আহিছে ৷ সময়ে সময়ে বিতৰ্কিত মন্তব্যৰে সংবাদ শীৰ্ষ দখল কৰা আজমলেও একেই পদ্ধতি গ্ৰহণ কৰি বোকা চটিওৱা ৰাজনীতিৰে ভোটাৰ ৰাইজক বিভ্ৰান্তি কৰা দেখিবলৈ পোৱা গৈছে ।
আজমলৰ শেহতীয়া এই মন্তব্যই সচেতন ৰাইজৰ মাজত বিৰূপ প্ৰতিক্ৰিয়াৰ সৃষ্টি কৰা পৰিলক্ষিত হৈছে ।
লগতে পঢ়ক: সাংবাদিকৰ এশাৰী বাক্যই দুদিনলৈ টেনশ্যন দিয়ে সাংসদ তাছাক - Kaziranga Lok Sabha constituency
