ইণ্টাৰনেশ্যনেল ডেস্ক, 24 জুন : পবিত্র হজ পালন কৰিবলৈ গৈ অকালতে মৃত্যুক সাৱটিলে সহস্ৰাধিক লোকে ৷ চি এন এনৰ বাতৰি অনুসৰি, দেওবাৰে ছৌদি আৰৱ কৰ্তৃপক্ষই জনায় যে হজ তীৰ্থযাত্ৰাৰ সময়ত 1301 জন লোকৰ মৃত্যু ঘটিছে ৷ প্ৰখৰ গৰম আৰু অকৰ্তৃত্বশীল ভ্ৰমণৰ বাবে অসংখ্য হজ যাত্ৰী তথা ৰোগীৰ মৃত্যু ঘটিছে ।
এক বিবৃতিত ছৌদি চৰকাৰে কয়, "স্বাস্থ্য বিভাগে চলিত বৰ্ষত উৎকট গৰমৰ ফলত অসুস্থ হৈ পৰা বহু লোকক সুস্থ কৰাৰ বাবে ব্যৱস্থা গ্ৰহণ কৰিছিল, কিছুমান ব্যক্তিৰ এতিয়াও চিকিৎসকৰ তদাৰক চলি আছে । দুখৰ বিষয় যে মৃত্যুৰ সংখ্যা 1301 হৈছেগৈ ।"
বিবৃতিটোত উল্লেখ কৰা হৈছে, "মৃত্যু হোৱা লোকসকলৰ 83% লোকেই হজ কৰিবলৈ অনুমতি লাভ কৰা নাই আৰু প্ৰত্যক্ষ সূৰ্যৰ পোহৰত দীঘলীয়া দূৰত্ব খোজ কাঢ়িছিল, পৰ্যাপ্ত আশ্ৰয় বা আৰাম নোহোৱাকৈ । নিহত লোকসকলৰ ভিতৰত আছে কেইবাজনো বৃদ্ধ আৰু দীৰ্ঘদিন ধৰি অসুস্থ হৈ থকা ব্যক্তি ৷ সকলো মৃত লোকৰ পৰিয়ালক চিনাক্ত কৰা হৈছে ।
তীৰ্থযাত্ৰীৰ মৃত্যুৰ কাৰণ
এইবাৰৰ হজ তীৰ্থযাত্ৰাৰ সময়ত শ শ লোকৰ মৃত্যু আৰু অসুস্থতাৰ আঁৰৰ মূল কাৰণ হিচাপে অভিহিত কৰা হৈছে চৰম উত্তাপ । সোমবাৰে মক্কাত তাপমাত্ৰাই অভিলেখ সৃষ্টিকাৰী 125 ডিগ্ৰী ফাৰেনহাইটলৈ বৃদ্ধি পায় । বিভিন্ন কৰ্তৃপক্ষই উল্লেখ কৰিছে যে বেচৰকাৰী তীৰ্থযাত্ৰীৰ সংখ্যাই সমস্যা বৃদ্ধি কৰিছে ৷
হজ যাত্ৰাৰ অনুজ্ঞাপত্ৰ লাভৰ বাবে এজন তীৰ্থযাত্ৰীয়ে কেইবা হাজাৰ মাৰ্কিন ডলাৰ খৰচ কৰিবলগীয়াত পাৰে । সাধাৰণতে অনুজ্ঞাপত্ৰবিহীন তীৰ্থযাত্ৰীসকলে এয়াৰ কণ্ডিচনাৰ বা পানী আৰু খাদ্য সামগ্ৰীৰ সহজ সুবিধা থকা যাত্ৰীবাহী বাছৰ সুবিধা লাভ নকৰে ।
