নিউজ ডেস্ক, 3 অক্টোবৰ: ইহুদী ৰাষ্ট্ৰ ইজৰাইলক ইৰাণে বেলিষ্টিক মিছাইলেৰে আক্ৰমণ কৰাৰ পিছত ইজৰাইলে প্ৰতিশোধ লোৱাৰ ভাবুকি দিয়ে ৷ এই ভাবুকিৰ এদিন পিছতে ইৰাণৰ ৰাষ্ট্ৰপতি মাছুদ পেজেস্কিয়ানে কয় যে তেওঁৰ দেশখনে যুদ্ধ নিবিচাৰে যদিও ইজৰাইলে দেশখনৰ বিৰুদ্ধে ব্যৱস্থা গ্ৰহণ কৰিলে ইয়াৰ প্ৰত্যুত্তৰ দিব । দ্বিপাক্ষিক সম্পৰ্ক আৰু আঞ্চলিক সহযোগিতা শক্তিশালী কৰাৰ লক্ষ্যৰে কাটাৰৰ আমিৰ শ্বেইখ তামিম বিন হামাদ আল থানীৰ সৈতে আনুষ্ঠানিক বৈঠকত মিলিত হ’বলৈ যোৱাৰ সময়ত বুধবাৰে এই মন্তব্য কৰে পেজেস্কিয়ানে ।
ইৰাণৰ সংবাদ মাধ্যমৰ মতে, যোৱাৰ পূৰ্বে পেজেস্কিয়ানে ক, "আমি এই ভ্ৰমণত দুটা লক্ষ্যত উপনীত হ'ম । প্ৰথমটো হ'ল কাটাৰ চৰকাৰৰ সৈতে সহযোগিতা চুক্তিৰ ওপৰত আলোচনাত মিলিত হোৱা । দ্বিতীয়তে, আমি ইজৰাইলৰ আন্তঃৰাষ্ট্ৰীয় আইন উলংঘা আৰু নিৰীহ সাধাৰণ নাগৰিকক লক্ষ্য কৰি লোৱাকে ধৰি জটিল আঞ্চলিক পৰিস্থিতিৰ সৈতে মোকাবিলা কৰিম ।’’
‘‘যদি জায়নিষ্ট শাসনে নিজৰ অপৰাধ বন্ধ নকৰে তেন্তে ই অধিক কঠোৰ প্ৰতিক্ৰিয়াৰ সন্মুখীন হ'ব ।’’ বৃহস্পতিবাৰে কাটাৰত অনুষ্ঠিত হ'বলগীয়া এছিয়া সহযোগিতা আলোচনা সন্মিলনতো অংশগ্ৰহণ কৰাৰ কথা আছে পেজেস্কিয়ানে ।
স্থানীয় সংবাদ মাধ্যমে প্ৰকাশ কৰা অনুসৰি ইজৰাইলে বৃহস্পতিবাৰে পুৱাই মধ্য বেইৰুটৰ আল-বাচৌৰা অঞ্চলত হিজবুল্লাৰ সৈতে জড়িত স্বাস্থ্য কেন্দ্ৰক লক্ষ্য কৰি বিমান আক্ৰমণ চলায় । টিভিৰ ফুটেজত দেখা গৈছে যে অট্টালিকাৰ পৰা ওলোৱা ক’লা ধোঁৱাই অঞ্চলটো ছানি ধৰিছে । বিমান আক্ৰমণৰ ফলত ওচৰৰ ঘৰ আৰু ৰখাই থোৱা বাহনসমূহৰো যথেষ্ট ক্ষতিসাধন হয় । ছিনহুয়া সংবাদ সংস্থাই প্ৰকাশ কৰা অনুসৰি উদ্ধাৰৰ বাবে এম্বুলেন্স আৰু অসামৰিক প্ৰতিৰক্ষা দলে অঞ্চলটোলৈ ততাতৈয়াকৈ আগবাঢ়িছে ।
লেবাননৰ জনস্বাস্থ্য মন্ত্ৰালয়ৰ তথ্য অনুসৰি আল বাচৌৰা অঞ্চলত বিমান আক্ৰমণত কমেও ৫ জন লোক নিহত হৈছে । মধ্য বেইৰুটত আক্ৰমণৰ কিছু সময়ৰ পূৰ্বে ইজৰাইলে বেইৰুটৰ দক্ষিণ উপকণ্ঠ অঞ্চলৰ হাৰেট হ্ৰেইক অঞ্চলত তিনিটাকৈ শক্তিশালী বিমান আক্ৰমণ চলাইছিল বুলি আল জেদিদ টিভি চেনেলত প্ৰকাশ পাইছে ।
ইফালে, দক্ষিণ লেবাননত হিজবুল্লা আৰু ইজৰাইলী বাহিনীৰ মাজত চলি থকা যুদ্ধত মৃতকৰ সংখ্যা আঠজনলৈ বৃদ্ধি পাইছে ৷ ইৰাণে ইজৰাইলৰ ওপৰত বহুকেইটা ক্ষেপণাস্ত্ৰ নিক্ষেপ কৰাৰ এদিন পিছত বুধবাৰে মধ্যপ্ৰাচ্য দীৰ্ঘদিনীয়া আঞ্চলিক যুদ্ধৰ কাষ চাপিল আৰু ইজৰাইলে ইৰাণ সমৰ্থিত হিজবুল্লা মিলিচীয়াক লক্ষ্য কৰি লেবাননত সীমিত স্থল আক্ৰমণ আৰম্ভ কৰা বুলি কয় । ইজৰাইলে কয় যে তেওঁলোকে বহু ক্ষেপণাস্ত্ৰ জব্দ কৰিছিল আৰু ৱাশ্বিংটনৰ বিষয়াসকলে কয় যে আমেৰিকাৰ ঘাতক যুঁজাৰু বিমানে ইজৰাইলৰ প্ৰতিৰক্ষাত সহায় কৰিছিল ।
ইৰাণে কয় যে ইয়াৰ অধিকাংশ ক্ষেপণাস্ত্ৰই নিজৰ লক্ষ্যত আঘাত কৰে । এতিয়ালৈকে কোনো লোক হতাহত হোৱাৰ খবৰ পোৱা নাই । ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে মঙলবাৰে সন্ধিয়া ইৰাণৰ বিৰুদ্ধে প্ৰতিশোধ লোৱাৰ প্ৰতিশ্ৰুতি দিয়ে ৷ তেওঁ কয়, “ইৰাণে আজি ৰাতি এটা ডাঙৰ ভুল কৰিলে আৰু ইয়াৰ মূল্য হ’ব ।’’ ইৰাণৰ এজন সেনা বিষয়াই ইজৰাইলে প্ৰতিশোধ ল’লে ইয়াৰ আন্তঃগাঁথনিৰ ওপৰত ব্যাপক আক্ৰমণৰ ভাবুকি দিয়ে ।
লগতে পঢ়ক: ছিৰিয়াত আমেৰিকাৰ বিমান আক্ৰমণত ৩৭ টা উগ্ৰবাদী নিধন - US Airstrikes
