কুৱেইটবাসী ভাৰতীয়ৰ বাবে গ্ৰহণ এই বিশেষ পদক্ষেপ, চাওক কি... - HINDI RADIO BROADCAST IN KUWAIT

HINDI RADIO BROADCAST IN KUWAIT : কুৱেইটবাসী ভাৰতীয় লোকসকলৰ মনোৰঞ্জনৰ বাবে বিশেষ ব্যৱস্থা গ্ৰহণ কৰিলে দুয়োখন দেশে ৷ যাৰ জৰিয়তে দুয়োখন দেশৰে কূটনৈতিক সম্পৰ্কও উন্নত হোৱাৰ আশা প্ৰকাশ কৰা হৈছে ৷ কিন্তু দুয়োখন দেশেনো এনেকুৱা কি কৰিলে, চাওক এই প্ৰতিবেদনত ৷

ইণ্টাৰনেশ্যনেল ডেস্ক, 22 এপ্ৰিল : পোনপ্ৰথমবাৰৰ বাবে কুৱেইটৰ ইতিহাসত সংযোজিত হৈছে ৰেডিঅ’ৰ এক বিশেষ অনুষ্ঠান ৷ এই অনুষ্ঠান এইবাবেই বিশেষ যে, পোনপ্ৰথমবাৰৰ বাবে হিন্দী ভাষাত এই অনুষ্ঠান প্ৰচাৰ হ’ব ৷ সোমবাৰে কুৱেইটস্থিত ভাৰতীয় দূতাৱাসৰ কাৰ্যালয়ে এই বিষয়ে জানিবলৈ দিয়ে ৷

কুৱেইটত থকা ভাৰতীয় দূতাৱাসৰ কাৰ্যালয়ৰ লগতে দেশখনৰ তথ্য আৰু প্ৰচাৰ মন্ত্ৰালয়ে যুটীয়াভাৱে এই পদক্ষেপ গ্ৰহণ কৰে ৷ এতিয়াৰে পৰা প্ৰতি দেওবাৰে 93.3 এফ এম আৰু 96.3 এ এম যোগে শ্ৰোতাই শুনিবলৈ পাব বিভিন্ন ধৰণৰ অনুষ্ঠান ৷ এই পদক্ষেপে দুয়োখন দেশৰ মাজৰ সম্পৰ্ক উন্নত কৰাত সহায় কৰিব বুলি আশা প্ৰকাশ কৰা হৈছে ৷

সামাজিক মাধ্যম X ৰ জৰিয়তে ভাৰতীয় দূতাৱাসৰ কাৰ্যালয়ে সদৰী কৰা অনুসৰি, ‘কুৱেইটৰ ইতিহাসত পোনপ্ৰথমবাৰৰ বাবে সংযোজিত হৈছে হিন্দী ৰেডিঅ’ৰ সম্প্ৰচাৰ ৷ প্ৰতি দেওবাৰে 93.3 এফ এম আৰু 96.3 এ এম যোগে শ্ৰোতাৰ মনোৰঞ্জনৰ বাবে আগবঢ়োৱা হ’ব বিভিন্ন অনুষ্ঠানৰ প্ৰচাৰ ৷ সন্ধিয়া 8:30 ৰ পৰা 9 বজালৈ 30 মিনিটৰ বাবে সম্প্ৰচাৰিত হ’ব উক্ত অনুষ্ঠানটো ৷ 21 এপ্ৰিলৰ পৰা আৰম্ভ হোৱা এই অনুষ্ঠানে দুয়োখন দেশৰ মাজৰ সম্পৰ্ক অধিক শক্তিশালী কৰাত সহায়ক হ’ব’’ ৷