ইন্টাৰনেশ্যনেল ডেস্ক, 11 আগষ্ট: ম্যানমাৰৰ পশ্চিম ৰাখাইন ৰাজ্যত এই সপ্তাহত আৰ্টিলাৰী আৰু ড্ৰোন আক্ৰমণত মুছলমান ৰোহিংগীয়া সংখ্যালঘু সম্প্ৰদায়ৰ কমেও ১৫০ জন সাধাৰণ নাগৰিক নিহত হয় । জীৱিতসকলে সন্দেহ কৰিছে যে সামৰিক শাসন ব্যৱস্থাৰ প্ৰতিৰোধৰ লগত জড়িত এটা বৃহৎ শক্তিয়ে এই আক্ৰমণ সংঘটিত কৰিছিল ।
অৱশ্যে ৰাজ্যখনৰ ৰাখাইন জনগোষ্ঠীৰ সামৰিক শাখা আৰাকান আৰ্মীয়ে সোমবাৰে ৰোহিংগীয়াৰ ওপৰত সংঘটিত আক্ৰমণৰ দায়িত্ব অস্বীকাৰ কৰে । মাউংদাও চহৰত চলি থকা তীব্ৰ যুদ্ধৰ পৰা হাত সাৰিবলৈ লোকসকলে নাফ নদী পাৰ হৈ বাংলাদেশত প্ৰৱেশ কৰিবলৈ চেষ্টা চলাইছিল ।
আন্তঃৰাষ্ট্ৰীয় চিকিৎসা সাহায্য সংস্থা ডাক্তৰ্ছ উইডাউট বৰ্ডাৰ্ছে শুকুৰবাৰে এক বিবৃতি প্ৰকাশ কৰি কয় যে যোৱা সপ্তাহৰ হিংসাত্মক পৰিস্থিতিত আহত হোৱা বৃহৎ সংখ্যক ৰোহিংগীয়া লোকৰ চিকিৎসা কৰি আছে, যিসকলে সীমান্ত পাৰ হৈ বাংলাদেশলৈ যাবলৈ সক্ষম হৈছে ।
বিবৃতিটোত কোৱা হৈছে যে আহত সকলে নদী পাৰ হৈ বাংলাদেশত প্ৰৱেশ কৰিবলৈ চেষ্টা কৰা লোকসকলক বোমা বিস্ফোৰণৰ হিংসাত্মক পৰিস্থিতিৰ পৰা পলায়ন কৰা প্ৰত্যক্ষ কৰিছিল । আন কিছুমানে নদীৰ পাৰত শ শ মৃতদেহ দেখাৰ খবৰ দিছে ।
আৰাকান আৰ্মীক দোষাৰোপ
দ্য এছ’চিয়েটেড প্ৰেছে যোগাযোগ কৰা দুজন লোকে আৰাকান সেনাবাহিনীক দোষাৰোপ কৰে । ইফালে ছ’চিয়েল মিডিয়াত প্ৰচাৰিত এটা ভয়ংকৰ ভিডিঅ’ত নদীৰ কাষৰ পথত কেইবা ডজন প্ৰাপ্তবয়স্ক আৰু শিশুৰ মৃতদেহ সিঁচৰতি হৈ থকা দেখা গৈছে । কটকটীয়া যাতায়ত নিষেধাজ্ঞা আৰু অঞ্চলটোত চলি থকা যুদ্ধৰ বাবে এই আক্ৰমণৰ ভিডিঅ’ বা সবিশেষ সহজে নিশ্চিত কৰিব পৰা হোৱা নাই ।
সংগঠিত হিংসা পুনৰ সংঘটিত হোৱাৰ ভয়
উল্লেখ্য যে ২০২১ চনত আং ছান ছ্যু কিৰ নিৰ্বাচিত চৰকাৰৰ পৰা ক্ষমতা দখল কৰাৰ পিছত গণতন্ত্ৰ সমৰ্থক গেৰিলা আৰু সংখ্যালঘু জনগোষ্ঠীয় সশস্ত্ৰ বাহিনীয়ে দেশৰ সামৰিক শাসকক আঁতৰাই পেলাবলৈ চেষ্টা চলাইছে । কিন্তু ৰাখাইনত সংঘটিত হোৱা যুদ্ধই ৰোহিংগীয়া সংখ্যালঘুৰ সদস্যৰ বিৰুদ্ধে পুনৰ সংগঠিত হিংসা আৰম্ভ হোৱাৰ আশংকা সৃষ্টি কৰিছে ।
২০১৭ চনৰ পৰা বাংলাদেশত আশ্ৰয় লৈছিল লাখ লাখ লোকে
২০১৭ চনত সামৰিক বিদ্ৰোহ বিৰোধী অভিযানৰ সময়ত কমেও ৭ লাখ ৪০ হাজাৰ ৰোহিংগীয়াই বাংলাদেশত নিৰাপদ স্থান আশ্ৰয় বিচাৰি যায় । প্ৰায় সকলোৱেই এতিয়াও শৰণাৰ্থী শিবিৰত বাস কৰি আছে, অবিৰত অস্থিৰতাৰ বাবে ঘৰলৈ উভতি যাব পৰা নাই ।
উল্লেখযোগ্য যে বহু ৰোহিংগীয়াই ম্যানমাৰত প্ৰজন্ম ধৰি বাস কৰি আহিছে যদিও তেওঁলোকে ব্যাপক পক্ষপাতিত্বৰ সন্মুখীন হয় আৰু বৌদ্ধ সংখ্যাগৰিষ্ঠ দেশখনত সাধাৰণতে নাগৰিকত্ব আৰু অন্যান্য মৌলিক অধিকাৰৰ পৰা বঞ্চিত হয় ।
লগতে পঢ়ক: ভাৰতত ৰোহিংগীয়াৰ অনুপ্ৰৱেশ এক উদ্বেগৰ বিষয় : মুখ্যমন্ত্ৰী হিমন্ত বিশ্ব শৰ্মা - Himanta Biswa Sarma
Rohingya in Bangladesh: ৰোহিংগীয়া বিতাড়ণৰ বাবে ভাৰত আৰু ৰাষ্ট্ৰসংঘৰ সহায় ভিক্ষা বাংলাদেশৰ
