ইণ্টাৰনেশ্যনেল ডেস্ক, 21 জুলাই: 28 জুলাইত অনুষ্ঠিত হ’ব বেলুচ ৰাষ্ট্ৰীয় সমাৱেশ ৷ এই সমাৱেশৰ পূৰ্বে বেলুচ অধিকাৰ কৰ্মী মহাৰাং বেলুচে পাকিস্তানক সতৰ্কবাণী জাৰি কৰি কয় যে যদি ৰাষ্ট্ৰই বেলুচ জনসাধাৰণৰ শান্তিপূৰ্ণ প্ৰতিবাদ দমন কৰিবলৈ বল প্ৰয়োগ কৰে তেন্তে তাৰ ফলত হোৱা পৰিস্থিতি অনিয়ন্ত্ৰিত হৈ পৰিব ।
মহাৰাং বেলুচে X যোগে কয়, "যদি ৰাষ্ট্ৰই শান্তিপূৰ্ণ জনসমাৱেশ ৰোধ কৰিবলৈ বল প্ৰয়োগ কৰে, তেন্তে যি পৰিস্থিতিৰ সৃষ্টি হ’ব সেয়া ৰাষ্ট্ৰই কল্পনা কৰিব নোৱাৰিব ৷ জনসমাবেশ নিয়ন্ত্ৰণ কৰাটো অসম্ভৱ ।"
শনিবাৰে বেলুচ অধিকাৰ কৰ্মীগৰাকীয়ে এক বিবৃতি প্ৰকাশ কৰি বেলুচ জনসাধাৰণক 28 জুলাইত একত্ৰিত হৈ বিশ্বৰ আগত নিজৰ ঐক্য প্ৰমাণ কৰিবলৈ আহ্বান জনায় । তদুপৰি এই দিনটো বেলুচ জাতিৰ বাবে নিজৰ শক্তি আৰু সভ্যতাক বিশ্ববাসীৰ আগত দেখুৱাবলৈ এক সুযোগ বুলি দাবী কৰে ৷ লগতে এই দিনটোত তেওঁলোকৰ ঐক্য আৰু সংহতি প্ৰদৰ্শন কৰিবলৈ উৎসাহিত কৰে ।
মহাৰাং বেলুচে কয়, "মই বেলুচ জাতিটোক আকৌ এবাৰ আহ্বান জনাইছো যে যদি আপুনি বেলুচ জাতিটোক বচাব বিচাৰে, যদি আপুনি ঐক্যৱদ্ধ জাতিৰ প্ৰমাণ বিশ্বৰ আগত দাঙি ধৰিব বিচাৰে, তেন্তে 28 জুলাই হ’ল বেলুচক এক সংযুক্ত আৰু সভ্য জাতি হিচাপে প্ৰমাণ কৰাৰ দিন ।"
ইয়াৰোপৰি নেত্ৰীগৰাকীয়ে আন দেশসমূহক পাকিস্তানী ৰাষ্ট্ৰক হেঁচা প্ৰয়োগ কৰাৰ পৰা বিৰত থাকিবলৈও আহ্বান জনায় । লগতে, তেওঁলোক সদায়ে শান্তিপূৰ্ণ প্ৰতিবাদৰ প্ৰতি দায়ৱদ্ধ বুলিও দাবী কৰে ৷
মহাৰাং বেলুচে কয়, "আমি শান্তিপূৰ্ণ আছিলো, আমি শান্তিপূৰ্ণ আৰু আমি শান্তিপূৰ্ণ হৈয়েই থাকিম । জাতীয় জ্ঞান, সজাগতা আৰু চেতনা আমাৰ প্ৰথম অগ্ৰাধিকাৰ । বেলুচ ৰাষ্ট্ৰীয় ঐক্য কাৰাভান আজি সমগ্ৰ বেলুচ জাতিৰ বাবে এক দায়িত্বশীল সংগঠন ৷ ইয়াৰ জাতীয় দায়িত্ব ভালদৰে বুজি পাওঁ আৰু পালন কৰো ।"
