বৰ্তমান যুগত প্ৰতিজন ব্যক্তি ছ’চিয়েল মিডিয়াত ইমানেই সক্ৰিয় যে ক’ৰবাত ভ্ৰমণৰ সময়ত, নতুন কাপোৰ ক্ৰয় কৰিলে আৰু আনকি খাদ্য খোৱাৰ আগতেও ফটো আৰু ভিডিঅ’ তুলিবলৈ ধৰে, যাতে ইনষ্টাগ্ৰাম, ৰীল আৰু ফেচবুকত আপলোড কৰিব পাৰে ৷ ইফালে আজিকালি ছ’চিয়েল মিডিয়াত স্ক্ৰ’ল কৰি থাকোঁতে হয়তো আপুনি দেখিছে যে মানুহে একো নভবা-নিচিন্তাকৈ এখন টেবুলত বহি একেলগে বহুত খাদ্য খাই ইউটিউব বা অন্য সামাজিক মাধ্যমযোগে পোষ্ট কৰে ৷ বহুলোকে এনে ভিডিঅ'বোৰ ফুড লাইফ বা ফুড লাইফৰ নামত শ্বেয়াৰ কৰে ৷ বহুতে ইয়াক মুকবেং বুলিও কয় ৷
ব্লগাৰসকলে যিমানেই আনন্দৰে সীমাহীন খাদ্যৰ ভিডিঅ’ শ্বেয়াৰ কৰে, ব্যৱহাৰকাৰীসকলে এই ভিডিঅ’বোৰ আৰু অধিক উৎসাহেৰে চায় ৷ কিছুমান মানুহৰ খাদ্যৰ ভিডিঅ’ চোৱাৰ ইমানেই অভ্যাস আছে যে শোৱা-বহা বিভিন্ন সময়ত এই ভিডিঅ’বোৰ চাই এই ব্লগাৰৰ দৰে অনিয়ন্ত্ৰিতভাৱে খাবলৈ আৰম্ভ কৰে ৷ যদি আপুনিও এনে খাদ্য খোৱা ভিডিঅ’ চোৱাৰ পিছত ভোক অনুভৱ কৰে আৰু অকালতে খাদ্য গ্ৰহণ কৰিবলৈ আৰম্ভ কৰে, তেন্তে সাৱধান হওক ৷
স্বাস্থ্য বিশেষজ্ঞসকলে কয় যে, এই নিচাক ফুড পৰ্ণ বুলি কোৱা হয় ৷ ফুড পৰ্ণ আপোনাৰ মন আৰু শৰীৰ উভয়ৰে স্বাস্থ্যৰ বাবে ক্ষতিকাৰক বুলি প্ৰমাণিত হ’ব পাৰে ৷ সেয়ে আজি এই প্ৰতিবেদনৰ জৰিয়তে আমি আপোনালোকক জনাম যে ফুড পৰ্ণ কি আৰু ফুড পৰ্ণে স্বাস্থ্যৰ কেনেধৰণে ক্ষতি কৰিব পাৰে ৷
ফুড পৰ্ণ কি ?
স্বাস্থ্য প্ৰশিক্ষক তথা পুষ্টিবিদ মিৰুনা বুক্সাৰে কয় যে, ফুড পৰ্ণ হৈছে খাদ্য আৰু ছ’চিয়েল মিডিয়াৰ মাজৰ সংযোগক বুজাবলৈ ব্যৱহাৰ কৰা এটা শব্দ ৷ ফুড পৰ্ণে ছ’চিয়েল মিডিয়াত খাদ্য খোৱাৰ ভিডিঅ’ আৰু ফটো শ্বেয়াৰ কৰে ৷ কিছুমান লোকৰ মতে ফুড পৰ্ণ হৈছে ফুড ব্ৰেণ্ডসমূহে নিজৰ সামগ্ৰীৰ বিজ্ঞাপন দিয়াৰ এক ফলপ্ৰসূ উপায় ৷ ছ’চিয়েল মিডিয়া ব্যৱহাৰকাৰীসকলে এনে খাদ্যৰ ভিডিঅ’ দেখি আপ্লুত হয় ৷
বিশেষজ্ঞসকলৰ মতে, এনেধৰণৰ খাদ্যৰ ভিডিঅ’ চোৱাৰ পিছত মানুহে অত্যধিক খাদ্য গ্ৰহণ কৰিবলৈ আৰম্ভ কৰে, যাৰ বাবে তেওঁলোকে মেদবহুলতা, হৃদযন্ত্ৰৰ সমস্যা আৰু ৰক্তচাপৰ সৈতে জড়িত সমস্যাৰ সন্মুখীন হ’ব পাৰে ৷
স্বাস্থ্যৰ ওপৰত ফুড পৰ্ণৰ ক্ষতিকাৰক প্ৰভাৱ
পুষ্টিবিদ মিৰুনা বুক্সাৰৰ মতে, ফুড পৰ্ণ এক প্ৰকাৰৰ নিচা, যাৰ প্ৰতি এজন ব্যক্তি এবাৰ আসক্ত হৈ পৰিলে তেওঁ ইয়াক সোনকালে এৰিব নিবিচাৰে ৷ আহক আমি ফুড পৰ্ণৰ দ্বাৰা স্বাস্থ্যৰ ক্ষতিৰ বিষয়ে অধিক জানিবলৈ চেষ্টা কৰো ৷
ফুড পৰ্ণ ভিডিঅ’ চালে আপুনি যিকোনো সময়তে ভোক অনুভৱ কৰিব পাৰে ৷ এই পৰিস্থিতিত আপুনি বহুত জাংক ফুড আৰু প্ৰচেছড ফুড খাবলৈ আৰম্ভ কৰে ৷ যাৰ বাবে মেদবহুলতা আৰু ওজন বৃদ্ধিৰ সমস্যা হ’ব পাৰে ৷
বিশেষজ্ঞসকলৰ মতে, জাংক ফুডত প্ৰচুৰ পৰিমাণে কাৰ্বহাইড্ৰেট থাকে ৷ কেৱল এয়াই নহয়, জাংক ফুডত ফাইবাৰ আৰু প্ৰ’টিনৰ পৰিমাণ শূন্য ৷ যেতিয়া পাচনতন্ত্ৰই এই খাদ্যসমূহ ভাঙি শৰীৰক উপকাৰিতা প্ৰদান কৰে তেতিয়া এই কাৰ্বহাইড্ৰেট গ্লুক’জ হিচাপে তেজত নিৰ্গত হয় ৷ যাৰ ফলত তেজত শৰ্কৰা বৃদ্ধি পায় ৷ ৰক্ত শৰ্কৰা বৃদ্ধিৰ বাবে ডায়েবেটিছ আৰু হৃদযন্ত্ৰৰ সমস্যাৰ সম্ভাৱনা বৃদ্ধি পায় ৷
ফুড পৰ্ণ ভিডিঅ' চোৱাৰ ফলত Brain Fogৰ সৃষ্টি হ’ব পাৰে ৷ যাৰ ফলত চিন্তা আৰু বুজাৰ ক্ষমতাৰ ওপৰত প্ৰভাৱ পৰিব পাৰে ৷ বিশেষজ্ঞসকলৰ মতে, বাৰে বাৰে খাদ্য খোৱাৰ ভিডিঅ’ চোৱাটোৱে অনবৰতে ভোক অনুভৱ কৰাব পাৰে, যাৰ বাবে কামত মনোনিৱেশ কৰাত অসুবিধা হ’ব পাৰে আৰু আপুনি ইয়াৰ প্ৰতি অভ্যস্ত হৈ পৰিব পাৰে ৷
