সন্তানহীনতাৰ আঁৰৰ প্ৰকৃত কাৰণ কি ? IVFএ এনেক্ষেত্ৰত আপোনাক কেনেদৰে সহায় কৰিব পাৰে - IVF

In Vitro Fertilization: বন্ধ্যাত্ব ক্ৰমাৎ বৃদ্ধি পোৱা এক সমস্যালৈ পৰিণত হৈছে আৰু ইয়াৰ প্ৰভাৱ বহু দম্পতীৰ মাজত দেখা যায় । ইয়াৰ কাৰণ বহুতো হ’ব পাৰে, যিয়ে পুৰুষ আৰু মহিলা উভয়কে প্ৰভাৱিত কৰে । এনে ক্ষেত্ৰত IVF এনে পুৰুষ-মহিলাৰ বাবে কোনো বৰদানতকৈ কম নহয় আজি এই বিষয়েই বিশেষজ্ঞৰ পৰা জানিবলৈ চেষ্টা কৰো আহক-

আপুনি সন্তান সুখৰ বাবে অপেক্ষা কৰি আছে কিন্তু আপোনাৰ ইচ্ছা পূৰণ হোৱা নাই নেকি ? কেৱল আপুনিয়েই নহয় এনে লাখ লাখ দম্পতীয়ে নিজৰ বৈবাহিক জীৱনত এই সুখৰ বাবে অপেক্ষা কৰে ৷ প্ৰতিগৰাকী বিবাহিত মহিলাই নিজৰ জীৱনত মাতৃ হ’বলৈ বিচাৰে ৷ কিন্তু বহু কাৰণত এই সপোন সপোনেই হৈ ৰয় ৷

সন্তান নথকাৰ বহু কাৰণত হ’ব পাৰে, যিটো পুৰুষ-মহিলা উভয়ৰে ক্ষেত্ৰত হ’ব পাৰে ৷ কেতিয়াবা দুয়োজন সংগীৰ একেলগে সমস্যা হয় ৷ কিন্তু কেতিয়াবা শৰীৰে আন কিবাহে কয় ৷ সেয়ে আজি এই প্ৰতিবেদনৰ জৰিয়তে জানো আহক ইয়াৰ আঁৰৰ কাৰণ কি ?

আইভিএফ পদ্ধতি (ETV Bharat)

মহিলাৰ বন্ধ্যাত্বৰ কিছুমান সাধাৰণ কাৰণ হ’ল ডিম্বাণু নিঃসৰণৰ বিকাৰ (যেনে পলিচিষ্টিক অভাৰী চিনড্ৰম (PCOS)), যিয়ে নিয়মীয়া ডিম্বাণু নিঃসৰণত ব্যাঘাত জন্মায় ৷ ইয়াৰ উপৰিও ফেল’পিয়ান টিউব বন্ধ বা ক্ষতিগ্ৰস্ত হোৱাটোও এটা গুৰুত্বপূৰ্ণ কাৰক কাৰণ ই ডিম্বক শুক্ৰাণুৰ সৈতে লগ হোৱাত বাধা দিয়ে ৷

এণ্ডোমেট্ৰিয়াছিছ (য’ত জৰায়ুৰ বাহিৰত জৰায়ুৰ আৱৰণৰ দৰে কলা বৃদ্ধি পায়)ও বন্ধ্যাত্বত অৰিহণা যোগাব পাৰে কাৰণ ই ডিম্বৰ গুণাগুণত প্ৰভাৱ পেলায় বা ফেল’পিয়ান টিউবত বাধা প্ৰদান কৰে ৷ লগতে বয়স বৃদ্ধিৰ লগে লগে মহিলাৰ ডিম্বৰ গুণাগুণ আৰু পৰিমাণ কমি যায়, যাৰ ফলত গৰ্ভধাৰণত অসুবিধাৰ সৃষ্টি হয় ।

পুৰুষৰ বন্ধ্যাত্বৰ কাৰণ

পুৰুষৰ বন্ধ্যাত্বৰ মূল কাৰণসমূহ হ’ল শুক্ৰাণুৰ সংখ্যা কম বা গতিশীলতা কম, যিয়ে প্ৰাকৃতিক গৰ্ভধাৰণত প্ৰভাৱ পেলায় । কিছুমান জিনীয় বিকাৰেও শুক্ৰাণুৰ উৎপাদন বা কাৰ্যত প্ৰভাৱ পেলাব পাৰে । কিন্তু কিছুমান ক্ষেত্ৰত বন্ধ্যাত্বৰ কোনো স্পষ্ট কাৰণ নাথাকিবও পাৰে, যাক অস্পষ্ট বন্ধ্যাত্ব বুলি কোৱা হয়।

আইভিএফ

আইভিএফৰ সম্পূৰ্ণ অৰ্থ হৈছে ইন ভিট্ৰ’ ফাৰ্টিলাইজেচন ৷ এগৰাকী মহিলাক গৰ্ভৱতী হোৱাত সহায় কৰিবলৈ IVFৰ সহায় লোৱা হয় । বন্ধ্যাত্বৰ বহু কাৰণৰ চিকিৎসাত ইয়াক ব্যৱহাৰ কৰা হয়, যেনে- মহিলাৰ বয়স বৃদ্ধি (মাতৃৰ বয়স বৃদ্ধি) ফেল’পিয়ান টিউব ক্ষতিগ্ৰস্ত বা বন্ধ হৈ যোৱা আদি ৷

বেংগালুৰুস্থিত এপ’ল’ ফাৰ্টিলিটিৰ জ্যেষ্ঠ পৰামৰ্শদাতা-ফাৰ্টিলিটি এণ্ড আইভিএফ ডাঃ চিত্ৰ ৰামামূৰ্তিয়ে কয় যে, এই সকলোবোৰ পৰিস্থিতিত আইভিএফে এক ফলপ্ৰসূ সমাধান প্ৰদান কৰে । ই নিয়ন্ত্ৰিত পৰীক্ষাগাৰৰ পৰিৱেশত ডিম্বানু আৰু শুক্ৰাণু মিহলাই গৰ্ভধাৰণৰ প্ৰাকৃতিক বাধাসমূহ দূৰ কৰে । ইয়াৰ উপৰিও আইভিএফ প্ৰট’কল বিশেষ বন্ধ্যাত্বৰ কাৰকৰ ওপৰত ভিত্তি কৰি নিজৰ ইচ্ছা অনুসৰি তৈয়াৰ কৰিব পাৰি, যাৰ ফলত সফল গৰ্ভাৱস্থাৰ সম্ভাৱনা বৃদ্ধি পায় । ভ্ৰূণ নিৰ্বাচন কৰাৰ ক্ষমতাও আইভিএফৰ এটা গুৰুত্বপূৰ্ণ সুবিধা, কিয়নো ইয়াৰ দ্বাৰা সুস্থ ভ্ৰূণ স্থানান্তৰ কৰিব পৰা যায় ।

লগতে পঢ়ক: এবাৰ IVF বিফল হ'লে পুনৰ কেতিয়া কৰিব পাৰে ? - IVF