হিন্দু ধৰ্মত জন্মাষ্টমী উৎসৱক অতি বিশেষ বুলি গণ্য কৰা হয় ৷ প্ৰতি বছৰে জন্মাষ্টমী উৎসৱ ৰক্ষাবন্ধনৰ অষ্টম দিনা পালন কৰা হয় ৷ এইবাৰ ২০২৪ চনৰ ২৬ আগষ্ট আৰু ২৭ আগষ্টত শ্ৰী কৃষ্ণ জন্মাষ্টমী পালন কৰা হ'ব ৷ এই দিনটোত বহুলোকে ব্ৰত ৰাখি কৃষ্ণ জন্মৰ পিছত ৰাতি ১২ বজাত পূজা কৰি ব্ৰত ভাঙে৷ জন্মাষ্টমীৰ আজিৰ দিনটোত বিভিন্ন ৰঙৰ কাপোৰৰ তাৎপৰ্য বেলেগ বেলেগ ৷
কিছুমান বিশেষ ৰঙৰ কাপোৰ পিন্ধাটো অতি শুভ বুলি গণ্য কৰা হয় ৷ কিছুমান ৰং ভগৱান শ্ৰীকৃষ্ণৰ অতি প্ৰিয় আৰু এই ৰং পৰিধান কৰিলে ব্যক্তিজনৰ মানসিক শান্তি আৰু আধ্যাত্মিক উন্নতি সাধন হয় ৷ যদিও উৎসৱৰ দিনত যিকোনো পাতল ৰঙৰ কাপোৰ পিন্ধাটো শুভ বুলি গণ্য কৰা হয়, কিন্তু কিছুমান বিশেষ ৰং বাছি ল’লে আপোনাৰ ভাগ্য উজ্জ্বল হ’ব পাৰে ৷ ইয়াৰ বাবে আটাইতকৈ গুৰুত্বপূৰ্ণ কথাটো হ’ল আপোনাৰ মনত ভগৱান শ্ৰীকৃষ্ণৰ প্ৰতি বিশ্বাস আৰু ভক্তি থাকিব লাগে ৷ দ্বিতীয়তে, তলত দিয়া ৰংবোৰৰ মহত্ব ভালদৰে বুজিলে আপুনি নিজৰ পছন্দ অনুসৰি পোচাক ক্ৰয় কৰিব পাৰিব ৷ এই বিষয়ে বিতংভাৱে এই প্ৰতিবেদনৰ জৰিয়তে জানো আহক-
গোলাপী ৰঙৰ বস্ত্ৰ
গোলাপী ৰং প্ৰেম আৰু সুখৰ প্ৰতীক । এই ৰং শুক্ৰ গ্ৰহৰ লগতো জড়িত । এনে পৰিস্থিতিত জন্মাষ্টমীৰ দিনা যদি আপুনি গোলাপী ৰঙৰ কাপোৰ পৰিধান কৰে, তেন্তে আপোনাৰ জীৱনত প্ৰেম, সুখ আৰু সমৃদ্ধিৰ আগমণ ঘটিব ।
ৰঙা ৰঙৰ বস্ত্ৰ
জন্মাষ্টমী উৎসৱৰ বাবে ৰঙা ৰং অতি শুভ বুলি গণ্য কৰা হয় । বহুতো জ্যোতিষশাস্ত্ৰবিদ ৰঙা আৰু হালধীয়া ৰঙৰ কাপোৰ পৰিধান কৰিবলৈ পৰামৰ্শ দিয়ে । ৰঙা ৰঙকো শক্তি আৰু সাহসৰ প্ৰতীক বুলি গণ্য কৰা হয় । ৰঙা ৰং মংগল গ্ৰহৰ লগতো জড়িত । এনে পৰিস্থিতিত এইবাৰ কৃষ্ণ জন্মাষ্টমী উৎসৱত ৰঙা ৰঙৰ বস্ত্ৰ পৰিধান কৰিলে আপোনাৰ জীৱনত অপৰিসীম উৎসাহ আৰু শক্তিৰ সৃষ্টি হ’ব ।
হালধীয়া ৰঙৰ বস্ত্ৰ
হালধীয়া ৰং ভগৱান বিষ্ণুৰ প্ৰিয় ৰং, ধৰ্মীয় বিশ্বাস অনুসৰি শ্ৰী কৃষ্ণ তেওঁৰ অৱতাৰ । সেয়ে জন্মাষ্টমীৰ দিনা আপুনি হালধীয়া ৰঙৰ বস্ত্ৰ পৰিধান কৰিলে জীৱনত সুখ আৰু সমৃদ্ধিয়ে বিৰাজ কৰিব । লগতে এই কাম কৰাৰ বাবে ভগৱান শ্ৰীকৃষ্ণৰ বিশেষ আশীৰ্বাদ আপুনি লাভ কৰিব ।
বগা ৰঙৰ বস্ত্ৰ
বগা ৰং শান্তিৰ প্ৰতীক আৰু চন্দ্ৰৰ লগত জড়িত । সেয়ে যদি আপুনি বগা ৰঙৰ কাপোৰ পিন্ধে তেন্তে আপোনাৰ জীৱনত সুখ, শান্তি আৰু সমৃদ্ধি স্বয়ংক্ৰিয়ভাৱে আহিবলৈ আৰম্ভ কৰে ।
নীলা ৰঙৰ বস্ত্ৰ
নীলা ৰঙৰ প্ৰত্যক্ষ সম্পৰ্ক ভগৱান শ্ৰীকৃষ্ণৰ লগত আছে । ধৰ্মীয় বিশ্বাস অনুসৰি নীলা ৰঙৰ কাপোৰ পৰিধান কৰিলে মানসিক শান্তি লাভ কৰাৰ লগতে জীৱনৰ অন্যান্য পৰিস্থিতিতো ভাৰসাম্য ৰক্ষা কৰিব পৰা যায় ।
সেউজীয়া ৰঙৰ বস্ত্ৰ
সেউজীয়া ৰঙৰ সম্পৰ্ক আমাৰ সেউজীয়া প্ৰকৃতিৰ সৈতে জড়িত । ইয়াৰ উপৰিও সেউজীয়া ৰঙক সুখৰ প্ৰতীক বুলিও গণ্য কৰা হয় । এনে পৰিস্থিতিত জন্মাষ্টমীৰ দিনা যদি আপুনি সেউজীয়া ৰঙৰ বস্ত্ৰ পৰিধান কৰে, তেন্তে ভগৱান শ্ৰীকৃষ্ণৰ আশীৰ্বাদ সদায় আপোনাৰ ওপৰত বৰষি থাকিব ।
