গুৱাহাটী, 3 জুলাই: সঘনাই হৈ থকা জলবায়ু পৰিবৰ্তনৰ ফলত বৰ্তমান এই সময়ছোৱাত শিশুৰ পৰা আৰম্ভ কৰি জ্যেষ্ঠলোক সকলৈকে ভিন্ন ৰোগত আক্ৰান্ত হোৱা দেখা যায় । এই সময়ছোৱাত শিশুসকলৰ স্বাস্থ্যৰ যতন লোৱাটো অতিকৈ প্ৰয়োজনীয় । বিভিন্নধৰণৰ বীজাণু এই সময়ত বাঢ়িবলৈ ধৰে ।
বানপানীৰ বাবেও ৰাজ্যৰ বহু অঞ্চলত ডেংগুৰ প্ৰভাৱো বাঢ়ি গৈছে । সেয়ে এই সময়ত শিশুসকলক সাৱধানে ৰখাটো খুবেই প্ৰয়োজনীয় । বিশেষকৈ আপোনালোকৰ ঘৰৰ যদি পানী জমা হৈ আছে , ততাতৈয়াকৈ সেই পানী তাৰ পৰা আঁতৰাই দিয়ক । অন্যথা তাত মহে কণী পাৰিলে তাৰ পৰা মহৰ বংশ বৃদ্ধি হ'ব পাৰে আৰু যাৰ ফলত ডেংগু, মেলেৰিয়াৰ ৰোগে দেখা দিব পাৰে ৷
বৰ্তমান অসমত ৰাজ্যত সঘনাই হৈ থকা বৰষুণৰ ফলত ভিন্ন ধৰণৰ ৰোগৰ সৃষ্টি হোৱা দেখা গৈছে । বিশেষকৈ এই সময়ত ডেংগু, মেলেৰিয়াত আক্ৰান্তৰ সংখ্যা বৃদ্ধি পাইছে । লগতে এই সময়ছোৱাত শিশুসকলক বাহিৰলৈ নিয়াৰ ক্ষেত্ৰত সাৱধান হোৱাটো খুবেই জৰুৰী । বৰষুণত যাতে মূৰত নপৰে সেইটোৰ ওপৰত গুৰুত্ব দিব লাগে । কাৰণ তিতিলে শিশুটিৰ শৰীৰৰ ভিতৰত ঠাণ্ডা সোমাই যাব পাৰে । যদিহে শিশুটিৰ দেহত ঠাণ্ডা সোমাই যায় তেন্তে বিভিন্ন ভাইৰেল ৰোগ হোৱাৰ সম্ভাৱনা বাঢ়ি যায় ।
লগতে এই সময়ছোৱাত শিশুৰ খাদ্যৰ ওপৰতো গুৰুত্ব দিয়াটো উচিত । শিশুক এই সময়ছোৱাত সুষম আহাৰ খুওৱাৰ লগতে পানী সদায় গৰম কৰিহে খুওৱাব লাগে । গৰম বেছি পৰিলে শিশুসকলক পাতল কাপোৰ পিন্ধাব লাগে । লগতে প্ৰখৰ ৰ'দত শিশুক বাহিৰলৈ ওলাব দিব নালাগে । যিমান পাৰি এই সময়ছোৱাত ওপৰত উল্লেখিত সাৱধানতাসনূহ অৱলম্ৱন কৰিলে আপোনাৰ শিশুটি বিভিন্ন ৰোগৰ পৰা সুৰক্ষিত হৈ থাকিব ৷
