বাৰিষাৰ এই বতৰত আটাইতকৈ সাধাৰণ ৰোগ হ’ল জ্বৰ, চৰ্দি আৰু কাহ ৷ শিশুৰ পৰা প্ৰাপ্তবয়স্কলৈকে সকলোৱে চৰ্দি আৰু কাহত ভুগিবলগীয়া হয় ৷ চৰ্দি আৰু কাহৰ পৰা মুক্তি পাবলৈ ঔষধতকৈ বহু ঘৰুৱা উপায় অধিক ফলপ্ৰসূ বুলি প্ৰমাণিত হয় ৷ তেনে এক ফলপ্ৰসূ উপায় হ’ল ত্ৰিকুট চূৰ্ণ, যিটো তিনিবিধ সামগ্ৰীক গুড়ি কৰি একেলগে মিহলাই প্ৰস্তুত কৰা হয় ৷
এই তিনিবিধ সামগ্ৰী হৈছে শুকান আদা, জালুক আৰু পিপলি ৷ এই তিনিবিধ সামগ্ৰী একেলগে মিহলাই খালে কেৱল আপুনি চৰ্দিৰ পৰা পৰিত্ৰাণ পোৱাই নহয় জ্বৰ আৰু বতৰৰ পৰিৱৰ্তনৰ ফলত হোৱা সংক্ৰমণৰ পৰাও পৰিত্ৰাণ পোৱাত সহায় কৰিব ৷ এই গুড়ি কেনেকৈ তৈয়াৰ কৰিব লাগে তথা ইয়াৰ উপকাৰিতা কি কি জানো আহক-
শুকান আদা, জালুক আৰু পিপলিৰ পৰা এনেদৰে তৈয়াৰ কৰক ত্ৰিকুট চূৰ্ণ
প্ৰায় ১ গ্ৰাম শুকান আদা, ১ গ্ৰাম জালুক আৰু ১ গ্ৰাম পিপলি এই তিনিবিধ সামগ্ৰী সমান পৰিমাণত লৈ পিচি গুড়ি তৈয়াৰ কৰি লওক ৷ কিছু ক’লা বা দেশী চেনি লৈ গুড়ি কৰি মিহলাই মিঠা কৰি লওক ৷ এতিয়া সদায় শোৱাৰ আগত গাখীৰৰ লগত ১ চামুচ এই ত্ৰিকুট গুড়ি মিহলাই সেৱন কৰক ৷ ইয়াৰ লগে লগে যিকোনো ধৰণৰ সংক্ৰমণৰ পৰা আপুনি বাচি থাকিব পাৰিব ৷ চৰ্দি আৰু কাহৰ ৰোগৰ ক্ষেত্ৰত ৰামবাণ ঔষধ হিচাপে কাম কৰে এই গুড়ি ৷ ইয়াৰ ফলত পুৰণি জমা হৈ থকা কফটোও আঁতৰি যাব ৷ এই গুড়ি প্ৰস্তুত কৰি কেইবামাহলৈকে আপুনি বটলত ভৰাই ৰাখিব পাৰে ৷ ইচ্ছা কৰিলে এই গুড়িত মৌ মিহলাইও সেৱন কৰিব পাৰে ৷
শুকান আদা, জালুক আৰু পিপলিৰ উপকাৰিতা
জালুক, পিপলি আৰু শুকান আদাত পাচনতন্ত্ৰক পৰিষ্কাৰ কৰাৰ ক্ষমতা আছে যিয়ে আপোনাৰ শৰীৰত জমা হোৱা মলি আঁতৰোৱাত সহায় কৰে ৷ এই তিনিবিধ সামগ্ৰীয়ে শৰীৰৰ পৰা বিষাক্ত পদাৰ্থ আঁতৰোৱাৰ কাম কৰে ৷ শুকান আদা, পিপলি আৰু জালুকে দুৰ্বল হজম শক্তি শক্তিশালী কৰাৰ কাম কৰে ৷ এই গুড়ি খালে বদহজম, গেছৰ সমস্যা, পেটৰ বিষ, কলাইটিছ, পাইল, কাহ, চাইনাচাইটিছ, হাঁপানী আদি ৰোগ নিৰাময় কৰিব পাৰে ৷
