মৰিগাঁও, 22 জুলাই : পশ্চিমীয়া দেশৰ অন্যতম জনপ্ৰিয় হিপ হপ নৃত্য কৰিবলৈ আমেৰিকালৈ উৰা মাৰিব অসমৰ তিনিজনীয়া নৃত্যশিল্পীৰ এটা দল । বিশ্বৰ নৃত্য ক্ষেত্ৰখনত আছে বহুকেইটা নৃত্যশৈলী । ইয়াৰে অন্যতম জনপ্ৰিয় শৈলী এটা হৈছে Hip hop নৃত্য । পশ্চিমীয়া দেশসমূহত এই নৃত্য শৈলী খুবেই জনপ্ৰিয় । প্ৰথমবাৰৰ বাবে এই নৃত্য কৰিবলৈ আমেৰিকালৈ উৰা মাৰিব ধেমাজিৰ অভিষেশ মাহাতো, মৰিগাঁৱৰ ভৱজিৎ মেধি আৰু গুৱাহাটীৰ চন্দন নাথে ।
আমেৰিকাত অনুষ্ঠিত হোৱা World Hip Hip dance championship 2024 ত অংশগ্ৰহণ কৰাৰ দীৰ্ঘদিনীয়া সপোন পুহি ৰাখিছিল অসমৰ এই তিনিজনীয়া নৃত্যশিল্পীৰ দলটোৱে ৷ বিশ্বৰ আটাইতকৈ উচ্চ পৰ্যায়ৰ নৃত্য প্ৰতিযোগিতাত দেশক প্ৰতিনিধিত্ব কৰিব বিচাৰিছিল তেওঁলোকে । কিয়নো বিশ্ববিখ্যাত এই প্ৰতিযোগিতাত বিশ্বৰ প্ৰায় 4 ৰ পৰা 5 হাজাৰ প্ৰতিযোগীয়ে ভাগ লৈ নিজ নিজ দেশক প্ৰতিনিধিত্ব কৰে । উৎকৃষ্ট নৃত্য প্ৰদৰ্শন কৰি আঁজুৰি আনে খিতাপ । সকলো নৃত্যশিল্পীৰ সপোনৰ এই প্ৰতিযোগিতালৈ দেশৰ হৈ এইবেলি প্ৰতিনিধিত্ব কৰিবলৈ কঁকালত টঙালি বান্ধিছে ৰাজ্যৰ তিনি নৃত্যশিল্পীয়ে ।
ভাৰতক প্ৰতিনিধিত্ব কৰিবলগীয়া তিনি নৃত্যশিল্পীৰ ভাষ্য মতে আমেৰিকাত অনুষ্ঠিত হোৱাৰ এই উচ্চ পৰ্যায়ৰ প্ৰতিযোগিতালৈ নিৰ্বাচিত হ’বলৈ বিগত ন-দহ বছৰে কষ্ট কৰিব লগীয়া হৈছে তেওঁলোকে । সোমবাৰে সংবাদ মাধ্যমৰ সৈতে হোৱা সাক্ষাৎকাৰত তেওঁলোকে কয় যে এই বিশ্ব চেম্পিয়নশ্বিপত ভাগ ল’বলৈ তিনি শিল্পীয়ে খৰচ কৰিব লগা হৈছে 15 ৰ পৰা 17 লাখ টকা । আনহাতে আমেৰিকাতো বহু খৰচ কৰিবলগীয় হ’ব প্ৰতিযোগিতাৰ সময়ছোৱাত । সেয়েহে তেওঁলোকে চৰকাৰৰ পৰা আৰ্থিকভাৱে সহায় বিচাৰিছে ৷
লগতে পঢ়ক : নতুন অসমীয়া ছবি "সুন্দৰপুৰ কেঅ’ছ" ৰ পৰিচালকে ক’লে এডজাষ্ট কৰাৰ কথা... - assamese film Sundarpur Chaos
