হায়দৰাবাদ : নামপল্লী আদালতে সন্ধ্যা থিয়েটাৰৰ পদপিষ্ট গোচৰৰ সন্দৰ্ভত চলচ্চিত্ৰ অভিনেতা আল্লু অৰ্জুনৰ দ্বাৰা দাখিল কৰা জামিন আবেদনৰ শুনানি গ্ৰহণ কৰে । চিক্কাদাপল্লী আৰক্ষীয়ে জামিন মঞ্জুৰ নকৰিবলৈ অনুৰোধ কৰি এক প্ৰতিবাদী যুক্তি উপস্থাপন কৰে ৷ আনহাতে আল্লু অৰ্জুনৰ অধিবক্তাই জামিন মঞ্জুৰ কৰাৰ সপক্ষে যুক্তি দিয়ে । তৰ্ক-বিতৰ্কৰ অন্তত আদালতে ৰায়টো 3 জানুৱাৰীলৈ পিছুৱাই দিয়ে ।
শুনানিৰ সময়ত, আল্লু অৰ্জুনৰ আইনী দলে দৃঢ়তাৰে কয় যে সন্ধ্যা থিয়েটাৰত সংঘটিত ঘটনাটোত অভিনেতাজন কোনো প্ৰকাৰে জড়িত নহয় । তেওঁলোকে দাবী কৰে যে আৰক্ষীয়ে দাখিল কৰা গোচৰটো, য’ত কোৱা হৈছে যে আল্লু অৰ্জুন ৰেৱতীৰ মৃত্যুৰ বাবে দায়ী, এই কথা অভিনেতাজনৰ ক্ষেত্ৰত প্ৰযোজ্য নহয় । তেওঁৰ অধিবক্তাসকলে আৰু যুক্তি দিয়ে যে বিএনএছৰ ধাৰা ১০৫ অভিনেতাজনৰ ক্ষেত্ৰত প্ৰযোজ্য নহয় ৷ অধিবক্তাই নিয়মীয়া জামিনৰ বাবে অনুৰোধ কৰে ।
প্ৰত্যুত্তৰত, আৰক্ষীয়ে অনুৰোধ কৰিছিল যে যদি অভিনেতাজনক জামিন মঞ্জুৰ কৰা হয়, তেতিয়া আল্লু অৰ্জুনে চলিত তদন্তত সহযোগিতা কৰা উচিত ।
আল্লু অৰ্জুনক আৰক্ষীয়ে পদপিষ্ট ঘটনাৰ সন্দৰ্ভত গ্ৰেপ্তাৰ কৰিছিল কিন্তু উচ্চ ন্যায়ালয়ে তেওঁক অন্তৱৰ্তীকালীন জামিন প্ৰদান কৰাৰ পিছত তেওঁক যাবলৈ দিয়া হয় । নামপল্লী আদালতে প্ৰথমতে 14 দিনৰ ন্যায়িক ৰিমাণ্ড জাৰি কৰিছিল, যি 27 ডিচেম্বৰত সমাপ্ত হৈছিল । অৱশ্যে, আল্লু অৰ্জুন সেইদিনা আদালতত হাজিৰ হৈছিল আৰু তেওঁৰ অধিবক্তাসকলে পৰৱৰ্তী সময়ত জামিন আবেদন দাখিল কৰিছিল । আজিৰ শুনানিৰ ফলত ৰায়টো ৩ জানুৱাৰীলৈ পিছুৱাই দিয়া হৈছে ।
ইফালে, অন্ধ্ৰপ্ৰদেশৰ উপ মুখ্যমন্ত্ৰী তথা অভিনেতা পৱন কল্যাণে উক্ত সংঘটিত ঘটনাটোত আল্লু অৰ্জুনক সমৰ্থন কৰি কয় যে আল্লু অৰ্জুনক দোষী সাব্যস্ত কৰিব নালাগে । পৱনে অনুভৱ কৰে যে চিনেমাৰ আঁৰত এটা দল জড়িত হৈ থাকে ৷ পদপিষ্ট হৈ মৃত্যু হোৱা ঘটনাটোত আল্লুৱেও গভীৰভাৱে দুখ প্ৰকাশ কৰিছে । তাৰ পিছত তেওঁ আল্লু অৰ্জুনৰ হৈ কোনোবাই ভুক্তভোগীৰ পৰিয়ালৰ সদস্যসকলক লগ কৰাৰ বাবে অনুৰোধ জনায় ।
লগতে পঢ়ক : সন্ধ্যা থিয়েটাৰ গোচৰত আল্লু অৰ্জুনৰ জেৰা সমাপ্ত, অনুমতি অবিহনে প্ৰিমিয়াৰলৈ গৈছিল নেকি অভিনেতাজন ?
তেলুগু চলচ্চিত্ৰ উদ্যোগলৈ সম্পূৰ্ণ সমৰ্থন কিন্তু... ! মুখ্যমন্ত্ৰী ৰেৱন্ত ৰেড্ডীয়ে স্পষ্ট কৰি দিলে
