গুৱাহাটী, 10 জুন : আহিবলহীয়া নতুন ছবিসমূহৰ ভিতৰত শেহতীয়াকৈ এখন হিন্দী ছবিয়ে বিশেষভাৱে চৰ্চা লাভ কৰিবলৈ সক্ষম হৈছে । এই নতুন হিন্দী ছবিখনৰ নাম হৈছে ‘কুকি’ । অসমৰ পটভূমিত নিৰ্মাণ কৰা এই হিন্দী ছবিখনৰ পৰিচালনা তথা ছবিখনত অভিনয় কৰিছে অসমৰ এদল শিল্পীয়ে ।
দেওবাৰে মুক্তি দিয়া হয় এই নতুন ছবিখনৰ টীজাৰ আৰু ট্ৰেইলাৰ । মহানগৰীৰ চিটি চেণ্টাৰত অনুষ্ঠিত হয় টীজাৰ আৰু ট্ৰেইলাৰ মুকলি অনুষ্ঠান । এই অনুষ্ঠানত উপস্থিত থাকে প্ৰযোজক ড৹ জোনমণি দেৱী খাউণ্ড, পৰিচালক প্ৰণৱ জে ডেকা, অভিনেত্ৰী ৰিতিশা খাউণ্ড, চাউণ্ড ডিজাইন আৰু সংমিশ্ৰণৰ দায়িত্বত থকা অমৃত প্ৰীতমকে ধৰি ছবিখনৰ কলা-কুশলী ।
অসম তথা উত্তৰ-পূৰ্বাঞ্চলৰ এটি হৃদয়স্পৰ্শী কাহিনীৰ আধাৰত, এদল অসমীয়া অভিনেতা-অভিনেত্ৰীক লৈ নিৰ্মাণ কৰা হৈছে এখন হিন্দী ছবি ‘কুকি’ । নিৰি মিডিয়া অপিচি প্ৰাইভেট লিমিটেডৰ বেনাৰত নিৰ্মাণ কৰা এই ছবিখন পৰিচালনা কৰিছে ৰাষ্ট্ৰীয় প্ৰেক্ষাপটত প্ৰতিষ্ঠিত অসম সন্তান প্ৰণৱ জে ডেকাই আৰু প্ৰযোজনা কৰিছে ড৹ জোনমণি দেৱী খাউণ্ডে ।