ধৰ্ষণ তেনেহ’লে আপোনালোকৰ বাবে সহজ কথা ! - CISF Woman Slapping Kangana Ranaut

Kangana Ranaut slapped by CISF Woman: কংগনা ৰনৌতে তেওঁক চণ্ডীগড় বিমানবন্দৰৰ চৰ শোধোৱা ঘটনাত জড়িত চিআইএছএফ কনিষ্টবলক সমৰ্থন কৰাসকলক সমালোচনা কৰিছে । এক ছ'চিয়েল মিডিয়া পোষ্টত ৰনৌতে কনিষ্টবলজনৰ কাৰ্যকলাপক ধৰ্ষণ আৰু হত্যাৰ দৰে অপৰাধৰ সৈতে তুলনা কৰে ৷ তেওঁ কয় যে সকলো অপৰাধমূলক কাৰ্যৰে কাৰণ আছে কিন্তু তথাপিও যিকোনো অপৰাধমূলক কাৰ্য কৰা সকলোৱেই শাস্তিৰ যোগ্য ।

চিটাৰা ডেস্ক, 8 জুন : শেহতীয়াকৈ চণ্ডীগড় বিমানবন্দৰত সংঘটিত হোৱা ‘চৰ’ কাণ্ডৰ সৈতে জড়িত চিআইএছএফৰ কনিষ্টবলগৰাকীৰ সমৰ্থনত ওলাই অহাসকলক তীব্ৰ সমালোচনা কৰিছে বলীউডৰ অভিনেত্ৰী তথা বিজেপিৰ সাংসদ কংগনাই । ছ’চিয়েল মিডিয়া পোষ্টৰ জৰিয়তে ৰনৌতে কনিষ্টবগৰাকীৰ এই কাৰ্যক ন্যায্যতা প্ৰদান কৰাসকলক ধিক্কাৰ দি তেওঁলোকে ধৰ্ষণ আৰু হত্যাৰ দৰে জঘন্য অপৰাধকো সমৰ্থন কৰে বুলি মত ব্যক্ত কৰিছে ৷

স্পষ্ট মতামতৰ বাবে পৰিচিত ৰনৌতে শনিবাৰে নিজৰ এক্স হেণ্ডেলত তেওঁ সন্মুখীন হোৱা প্ৰতিক্ৰিয়াৰ সৈতে মোকাবিলা কৰে আৰু কনিষ্টবলগৰাকীৰ প্ৰতি সমৰ্থন জনোৱাসকলক লক্ষ্য কৰি লয় । কনিষ্টবলগৰাকীয়ে কংগনাক চৰ মৰা কাৰ্যৰ ব্যাখ্যা আগবঢ়াই কয় যে ৰনৌতে ১০০ টকাৰ বিনিময়ত কৃষকসকলে প্ৰতিবাদ কৰিছে বুলি কৰা মন্তব্যই তেওঁক ক্ষুণ্ণ কৰিছিল, কিয়নো প্ৰতিবাদকাৰীসকলৰ ভিতৰত তেওঁৰ মাতৃও আছিল ।

তেওঁৰ পোষ্টটোত ৰনৌতে যুক্তি দিয়ে যে প্ৰতিটো অপৰাধমূলক কাম এটা কাৰণত সংঘটিত হয়, তথাপিও দোষীক এতিয়াও জবাবদিহি কৰা হয় আৰু শাস্তি দিয়া হয় । তেওঁ লিখে, 'প্ৰতিজন ধৰ্ষণকাৰী, হত্যাকাৰী বা চোৰৰ অপৰাধ সংঘটিত কৰাৰ সদায় আৱেগিক, শাৰীৰিক, মানসিক বা আৰ্থিক কাৰণ থাকে, কোনো অপৰাধ কেতিয়াও কাৰণ নোহোৱাকৈ নহয়, তথাপিও তেওঁলোকক দোষী সাব্যস্ত কৰি জেললৈ পঠিওৱা হয় ।'

লগতে পঢ়ক : কুলবিন্দৰ কৌৰলৈ মুকলি সমৰ্থন বিশাল দাদলানীৰ - CISF Woman Slapping Kangana Ranaut

তেওঁ জোৰ দি কয় যে আইন উলংঘাৰ পৰিণাম আছে আৰু যিসকলে এনে আচৰণক সহ্য কৰে তেওঁলোকে নিজৰ মানসিক প্ৰৱণতাক আত্মনিৰীক্ষণ কৰিব লাগে । "মনত ৰাখিব যদি আপুনি কাৰোবাৰ অন্তৰংগ ক্ষেত্ৰত সোমাই যোৱা, অনুমতি অবিহনে তেওঁলোকৰ শৰীৰ স্পৰ্শ কৰি তেওঁলোকক আক্ৰমণ কৰাৰ সৈতে স্বাভাৱিক, তেন্তে গভীৰভাৱে আপুনি ধৰ্ষণ বা হত্যাৰ দৰে ঘটনাৰ সৈতেও স্বাভাৱিক, আপুনি আপোনাৰ মানসিক অপৰাধমূলক প্ৰৱণতাৰ গভীৰতালৈ চাব লাগিব, " তেওঁ লগতে এইদৰে লিখে ।

ৰনৌতে পৰামৰ্শ দিয়ে যে এই ব্যক্তিসকলে তেওঁলোকৰ নেতিবাচক আৱেগৰ পৰা নিজকে মুক্ত কৰিবলৈ যোগ আৰু ধ্যান অনুশীলন কৰা উচিত । "মই পৰামৰ্শ দিওঁ যে অনুগ্ৰহ কৰি যোগ আৰু ধ্যান কৰক নহ'লে জীৱনটো এক তিক্ত আৰু ভাৰাক্ৰান্ত অভিজ্ঞতা হৈ পৰিব, ইমান বিদ্বেষ, ঘৃণা আৰু ঈৰ্ষা কঢ়িয়াই লৈ নুফুৰিব, অনুগ্ৰহ কৰি নিজকে মুক্ত কৰক," ৰনৌতে লগতে কয় ।

কংগনাই অভিযোগ কৰা অনুসৰি চণ্ডীগড় বিমানবন্দৰত চিআইএছএফৰ কনিষ্টবল কুলবিন্দৰ কৌৰে তেওঁক আক্ৰমণ কৰিছিল । কৃষকসকলৰ প্ৰতিবাদ সন্দৰ্ভত কৰা মন্তব্যৰ প্ৰতিক্ৰিয়া স্বৰূপে এই ঘটনা সংঘটিত হয় বুলি অনুমান কৰা হৈছে ৷ কনিষ্টবলগৰাকীক তাৎক্ষণিকভাৱে নিলম্বিত কৰা হৈছে আৰু তেওঁৰ বিৰুদ্ধে এখন এজাহাৰ দাখিল কৰা হৈছে । ঘটনাটোৱে ছ'চিয়েল মিডিয়াত মিশ্ৰিত সঁহাৰি লাভ কৰিছে ৷ ইফালে, কেইবাজনো ৰাজহুৱা ব্যক্তি আৰু ৰাজনীতিবিদে ৰনৌতক তেওঁৰ বিৰূপ মন্তব্য আৰু কৃষকসকলক সন্ত্ৰাসবাদীৰ সৈতে তুলনা কৰাৰ বাবে সমালোচনা কৰিছে ।

লগতে পঢ়ক : অল আইজ অন ৰাফাহ গেঙলৈ কংগনা ৰনৌতৰ আহ্বান - who is Kulwinder Kaur