কলিয়াবৰ : জখলাবন্ধা হৈছে এক বাণিজ্যিক কেন্দ্ৰ । চৌব্বিশ ঘণ্টাই গ্ৰাহকৰ বাবে মুকলি হৈ থাকে প্ৰায়বোৰ দোকান । দূৰণীবটীয়া যাত্ৰীবাহী বাছসমূহৰ যাত্ৰীৰ দিনে-নিশাই খাদ্য গ্ৰহণ কৰাৰ স্থান এয়া ।
সমান্তৰালকৈ ইয়াৰ হোটেলসমূহৰ কাষতে গঢ় লৈ উঠিছিল পাণ-তামোলৰ দোকান । যিসমূহ দোকান হোটেলৰ গ্ৰাহকৰ ওপৰত নিৰ্ভৰশীল আছিল । এই দোকানসমূহত নব্বৈৰ দশকৰ পৰা মনোৰঞ্জনৰ বাবে প্ৰায় চৌব্বিশ ঘণ্টাই অসমীয়া-হিন্দী গীতৰ কেছেট বাজিছিল ।
এই দোকানসমূহৰ বেছিভাগতে তামোল-পাণ, চকলেট-টফী, চানা-ভূজিয়া-চীপ্চ উপলব্ধ হৈছিল ৷ লগতে জনপ্ৰিয় গীতৰ কেছেটো বিক্ৰী হৈছিল । সেই সময়ত বিহুৰ শ্ৰব্য কেছেটে জনপ্ৰিয়তাৰ সকলো অভিলেখ ভংগ কৰিছিল আৰু এই বিহুগীতৰ কেছেটসমূহৰ অন্যতম প্ৰাপ্তিস্থান আছিল জখলাবন্ধা ।
এটা সময়ত জখলাবন্ধাই কোনটো বিহুগীতৰ কেছেট জনপ্ৰিয় হ'ব, তাৰ মান নিৰূপন কৰিছিল । জখলাবন্ধাত যিটো বিহুগীতৰ কেছেট বিক্ৰী সৰ্বাধিক হয়, সেই কেছেটটো সমগ্ৰ অসমতে জনপ্ৰিয় হ'ব যে ই খাটাং । স্থানীয় বিহুবলিয়া লোকৰ লগতে জখলাবন্ধাৰ এই বিখ্যাত কেছেটৰ গ্ৰাহক আছিল উজনি-নামনিলৈ যাতায়ত কৰা দূৰণীবটীয়া বাছ আৰু ব্যক্তিগত বাহনৰ যাত্ৰীসকল ।
এই বিহু কেছেটসমূহ এন. কে. প্ৰডাক্সন, আৰ. এম. চি. মিউজিক, ৱেভ্, এ. এম. চি., সোণ প্ৰডাক্সন, পল্লবী এণ্টাৰপ্ৰাইজেছ, জে. ডি. প্ৰডাক্সন, এইচ. এম. ভি. চিম্ফনিৰ লগতে বহুকেইটা প্ৰযোজনা গোষ্ঠীয়ে প্ৰযোজনা কৰিছিল ।
| লগতে পঢ়ক : নতুন বছৰত আহি আছে বীৰাংগনা সাধনী |
তেনে এক সময়তে অসমৰ বিভিন্ন স্থানত বিহু প্ৰদৰ্শন কৰি বিশেষভাৱে স্বীকৃত কলিয়াবৰৰ তিনিগৰাকী জনপ্ৰিয় বিহুৱা ডেকা অচ্যুৎ শইকীয়া, দুষ্মন্ত হাজৰিকা আৰু প্ৰফুল্ল দাসে মিলি এক কেছেট প্ৰযোজনা গোষ্ঠী প্ৰতিষ্ঠা কৰিলে । তিনিওজন বিহুৱাৰ নামৰ ইংৰাজী আদি আখৰেৰে নামাকৰণ কৰা এ. ডি. পি. প্ৰডাক্সনে ১৯৯৭ চনত প্ৰথমবাৰলৈ 'গীতাঞ্জলী' নামৰ এটি বিহুগীতৰ কেছেট প্ৰযোজনা কৰি উলিয়াইছিল ।
পুৰণি বিহুনামৰ মাধুৰ্য হেৰ-ফেৰ নোহোৱাকৈ নতুনৰ সংমিশ্ৰণেৰে নিৰ্মাণ কৰি নগঞা বিহুৱা কৃষ্ণমণি নাথৰ কণ্ঠত উলিওৱা গীতসমূহে সমগ্ৰ অসমতে জনপ্ৰিয়তা লাভ কৰিবলৈ সক্ষম হ'ল ।
এই গোষ্ঠীটোৰ জৰিয়তে বহুকেইজন স্থানীয় গীতিকাৰৰ জন্ম হ'ল ৷ বহু গায়ক-গায়িকা, পৰিচালকৰ ভাগ্যৰ দুৱাৰ মেল খালে । তিনি প্ৰযোজকৰ উপৰিও ৰবীন বৰা, মুকুন্দ তামুলীৰ দৰে কেইবাজনো গীতিকাৰে বহুকেইটা জনপ্ৰিয় বিহুৰ জন্ম দিলে । লগতে আধুনিক আৰু টোকাৰী-দিহানামৰ জৰিয়তেও পৰিচিতি লাভ কৰিলে ।
১৯৯৭ চনৰ পৰা ২০০১লৈকে 'গীতাঞ্জলী' বিহু কেছেটে জনপ্ৰিয়তা অক্ষুণ্ণ ৰাখিবলৈ সক্ষম হৈছিল । 'এ. ডি. পি. প্ৰডাক্সনে বিহুগীতৰ লগতে টোকাৰী, দিহানাম আৰু আধুনিক গীতৰ বহুকেইটা কেছেটো প্ৰযোজনা কৰিছিল । কিন্তু সময়ৰ গতিত সিও লুপ্ত হ'ল । এটা জনপ্ৰিয় শিল্পকৰ্ম নোহোৱা হ'ল ।
গায়ক-গায়িকা, গীতিকাৰ, বাদ্য বাদক, বাদ্যযন্ত্ৰী, কেছেট বিক্ৰেতা, প্ৰযোজক আদিৰ উপাৰ্জনৰ পথ এটা নোহোৱা হ'ল বুলি আক্ষেপ প্ৰকাশ কৰিলে এই প্ৰযোজনা গোষ্ঠীৰ অন্যতম প্ৰযোজক অচ্যুত শইকীয়াই ।
| লগতে পঢ়ক : 27 বছৰৰ পিছত আকৌ আহি আছে "টাইটানিক" |
এটা সময়ত বিহুৰ কেছেটৰ স্থান ল'লে চি ডি আৰু পৰৱৰ্তী পৰ্যায়ত ভি চি ডিয়ে সীমাহীন জনপ্ৰিয়তা লাভ কৰিবলৈ সক্ষম হৈছিল । বিহুগীতসমৃদ্ধ এই ভি চি ডিবোৰ জনপ্ৰিয় হোৱাৰ অন্যতম কাৰণ আছিল বিহুনাচৰ লগতে সেই গীতসমূহক কেন্দ্ৰ কৰি অসমীয়া জনপ্ৰিয় অভিনেতা-অভিনেত্ৰীৰ অভিনয়ৰে এখন চুটি ছবি উপভোগ কৰিবলৈ পোৱা সুবিধা ।
পিছে এই ভি চি ডিও এতিয়া অতীত হ'ল । বৰ্তমান সময়ত পূৰ্বৰ সেই বিহু শুনিবলৈ নোপোৱা হ'ল । দুই-এটা বিহু ইউ টিউব বা আন প্লেটফৰ্মৰ যোগেদি প্ৰচাৰ হয় যদিও পূৰ্বৰ জনপ্ৰিয়তা নাই ।
এটা সময় আছিল, য'ত বিহুৰ জাননী বসন্তৰ কুলি-কেতেকীয়ে দিয়াৰ আগেয়ে দিছিল বিহু কেছেটে । সিও আঘোণ-পুহ মাহৰ শীত কালত । ডিচেম্বৰ মাহৰ প্ৰথম দিনটোৰ পৰাই বিহু কেছেটসমূহ মুক্তি দিয়াৰ পৰ্ব আৰম্ভ কৰিছিল । ইয়াৰ কাৰণ আছিল দুটা –
- এটা হ'ল, বিহু প্ৰযোজক গোষ্ঠীসমূহে নিজৰ লাভৰ বাবে বহু আগেয়ে বিহুৰ কেছেটৰ মুক্তি দিছিল, যাৰ বাবে কিছু গোষ্ঠীৰ সমস্যা হৈছিল । সেয়েহে, এটা নিৰ্দিষ্ট দিন ঠিক কৰিছিল যাতে সকলোৱে তাৰ বাবে পূৰ্বৰে পৰা সাজু হ'ব পাৰে ।
- দ্বিতীয়টো হ'ল, ডিচেম্বৰ মাহৰ পৰা অসমত পিকনিক পৰ্ব আৰম্ভ হয় । এই পিকনিকৰ সময়ত নতুন গীতৰ তালে-তালে নচাৰ এক আকাংক্ষা বনভোজ দলৰ লোকসকলৰ মাজত দেখা যায় । অসমীয়া যেতিয়া বনভোজত নাচিবলৈ বিহুতকৈ আৰু কি উপযুক্ত হ'ব পাৰে ! ফলস্বৰূপে বনভোজৰ সময়ত এই কেছেটসমূহ মুক্তি দিয়াৰ ফলত বনভোজস্থলীত বিহুগীতৰ বিপণন অতি সহজতে হয় । ফলত বিহু কেছেটসমূহৰ বিক্ৰী বৃদ্ধি পায় ।
জখলাবন্ধাত ডিচেম্বৰ মাহত দিনে-নিশাই নতুনকৈ মুক্তি দিয়া বিহুগীতসমূহ বাজি উঠিছিল । ডিচেম্বৰ মহাটোত কোনে আগতে বিহু কেছেট মুক্তি দি জনপ্ৰিয়তা লাভ কৰি ব্যৱসায়িকভাৱেও লাভৱান্বিত হয় তাৰ প্ৰতিযোগিতাত নামি পৰিছিল । এতিয়া আৰু জখলাবন্ধাত নাবাজে দেহ-মন আলোড়িত কৰা সেই বিহুগীতৰ কেছেট । বছৰ পূৰ্বে এই ডিচেম্বৰ মাহতে উন্মোচন হৈছিল বহু বিহুগীতৰ কেছেট, ভি চি ডি ।
কলিয়াবৰৰ জখলাবন্ধাতে উপলব্ধ হৈছিল বিহুগীতৰ কেছেট । কিন্তু যান্ত্ৰিকতাৰ ধামখুমীয়াত হেৰাই গ’ল সেই মধুৰ সময় । উপেক্ষিত হৈ যেন ৰ’ল ডিচেম্বৰ । বহু জনপ্ৰিয় বিহু আৰু বিহুসুৰীয়া গীতৰ ভি চি ডিৰ শ্বুটিং হৈছিল কলিয়াবৰত । সেই মধুৰ স্মৃতি ৰোমন্থন কৰি পুৰণি কেছেট কেইটাকে বুকুতে সাৱটি আজিও নষ্টালজিক হৈ উঠে কলিয়াবৰৰ বহু সাংস্কৃতিবান ব্যক্তি ।
