চিটাৰা ডেস্ক, ১৩ ফেব্ৰুৱাৰী: আজি আমি ক’ম বলীউডৰ এগৰাকী ছুপাৰষ্টাৰৰ কন্যাৰ বিষয়ে যি বৰ্তমান এগৰাকী অভিনেত্ৰী যদিও বহুতে নাজানে যে তাইক জাবৰৰ দমৰ পৰা ঘৰলৈ আনিছিল ছুপাৰষ্টাৰগৰাকীয়ে ৷ ইয়াৰ পিচত প্ৰবীণ অভিনেতাগৰাকীয়ে আৰু তেওঁৰ পত্নীয়ে তুলি লোৱা কন্যাক খুব মৰম দিছিল আৰু প্ৰতিটো সুবিধা থকা বিলাসী ঘৰত ডাঙৰ-দীঘল হোৱাৰ সুযোগ দিছিল ।
এতিয়া ছুপাৰষ্টাৰ পিতৃৰ পদাংক অনুসৰণ কৰি অভিনয়ৰ ক্ষেত্ৰত কেৰিয়াৰ গঢ়ি তুলিবলৈ সক্ষম হৈছে সেই কণমানিজনীয়ে ৷ অৱশ্যে বলীউডৰ পৰিৱৰ্তে হলিউডত কেৰিয়াৰ গঢ়িবলৈ সক্ষম হৈছে ছুপাৰষ্টাৰগৰাকীৰ কন্যাই । তেওঁৰ হলিউডৰ ছবি ‘দ্য গেষ্ট’ক সমগ্ৰ বিশ্বতে প্ৰশংসা কৰা হৈছিল । এতিয়ালৈকে হয়তো আপুনি গমেই পাইছে আমি কাৰ কথা কৈছো ৷ হয়, আমি কৈছো মিঠুন চক্ৰৱৰ্তীৰ কন্যাৰ কথা ৷
মিঠুন চক্ৰৱৰ্তী চাৰিটা সন্তানৰ পিতৃ ৷ ইয়াৰে তিনিজন পুত্ৰ আৰু এগৰাকী কন্যা সন্তান । তেওঁৰ ডাঙৰ পুত্ৰ মিমোহ চক্ৰৱৰ্তী, দ্বিতীয় পুত্ৰ ৰিমো চক্ৰৱৰ্তী আৰু তৃতীয় পুত্ৰ নমাশী চক্ৰৱৰ্তী । তেওঁৰ একমাত্ৰ কন্যা - দিশানী চক্ৰৱৰ্তী । দেউতাকৰ দৰেই দিশানীও অভিনয় ভাল পায় আৰু ইয়াৰ বাবেই অভিনয় জগতত নিজৰ কেৰিয়াৰ গঢ়ি তুলিছে দিশানীয়ে ৷ যদিও বহুতে হয়তো নাজানে, দিশানী চক্ৰৱৰ্তী মিঠুন চক্ৰৱৰ্তীৰ তুলি লোৱা কন্যা ।
মিঠুন চক্ৰৱৰ্তী আৰু তেওঁৰ পত্নী যোগিতা বালিৰ প্ৰথম দৃষ্টিতেই দিশানীৰ প্ৰতি মৰম জাগি উঠিছিল । ইয়াৰ পিচত আইনী কাগজ-পত্ৰ চহী কৰি তেওঁলোকে দিশানীক নিজৰ ঘৰলৈ লৈ যায়, তেতিয়াৰ পৰাই দিশানী গোটেই ঘৰখনৰ প্ৰিয় হৈ পৰিছিল । ছুপাৰষ্টাৰগৰাকীয়ে নিজৰ কন্যাক বহুত ভাল পায় ।
দিশানী চক্ৰৱৰ্তীক কেনেকৈ লগ পাইছিল মিঠুনে ?
আচলতে দিশানী চক্ৰৱৰ্তীৰ জন্ম হৈছিল কলকাতাত । এদিন হঠাৎ বাংলা কাকত এখনত এটা বাতৰি প্ৰকাশ পালে যে জন্মৰ পিচতে পৰিয়ালে পৰিত্যাগ কৰা এগৰাকী কন্যা শিশু জাবৰৰ দমত পৰি থকা অৱস্থাত উদ্ধাৰ হৈছে । একাংশ লোকে শিশুটিক গুৰুত্ব দিছিল, তাৰে এজনে শিশুটিক নিজৰ ঘৰলৈ লৈ আহিছিল ।
এই খবৰ যেতিয়া মিঠুন চক্ৰৱৰ্তীয়ে লাভ কৰিলে, তেতিয়া কন্যা শিশুটিক তুলি লোৱাৰ ইচ্ছা প্ৰকাশ কৰিলে । ছুপাৰষ্টাৰগৰাকীৰ পত্নী যোগিতা বালিয়ে স্বামীৰ সিদ্ধান্তত সমৰ্থন আগবঢ়ায় ।
উল্লেখ্য যে, দিশানীয়ে ভাৰতত প্ৰাথমিক শিক্ষা সমাপ্ত কৰে, তাৰ পিচত উচ্চ শিক্ষাৰ বাবে আমেৰিকাৰ লছ এঞ্জেলছলৈ যায় । নিউয়ৰ্ক ফিল্ম একাডেমীৰ পৰা অভিনয়ত স্নাতক ডিগ্ৰী লাভ কৰিছে দিশানীয়ে । সংবাদ মাধ্যমৰ বাতৰি অনুসৰি ষ্টাৰ কিডগৰাকীয়ে সৰুৰে পৰাই অভিনয়ৰ প্ৰতি আকৰ্ষিত আৰু তেওঁৰ প্ৰিয় নায়ক হৈছে ছলমান খান ।
২০১৭ চনত মুক্তি পোৱা হলিউডৰ চুটি ছবি ‘গিফ্ট’ৰ জৰিয়তে অভিনয় যাত্ৰা আৰম্ভ কৰিছিল দিশানীয়ে । শেষবাৰৰ বাবে ২০২২ চনৰ চুটি ছবি ‘দ্য গেষ্ট’ত দেখা পোৱা গৈছিল, যিখন ছবিয়ে বহু প্ৰশংসা লাভ কৰিছিল । অভিনেত্ৰীগৰাকীয়ে এক সাক্ষাৎকাৰত কয় যে তেওঁ পিতৃ মিঠুন চক্ৰৱৰ্তীৰ পৰা বহু কথা শিকিছিল, যিটো তেওঁ নিজৰ কৰ্মৰ জৰিয়তে দেখুৱাব বিচাৰে ।
দিশানীৰ প্ৰেম জীৱনৰ কথা ক’বলৈ গ’লে হলিউডৰ অভিনেতা ক’ডি চুলেকৰ সৈতে সম্পৰ্কত আছে দিশানী, যাৰ সৈতে তেওঁ ইনষ্টাগ্ৰামতো ছবি শ্বেয়াৰ কৰিছে ৷
লগতে পঢ়ক: চিকিৎসালয়ৰ পৰা মুকলি হ’ল মিঠুন চক্ৰৱৰ্তী, ডায়েবেটিছ ৰোগীক দিলে পৰামৰ্শ
