হায়দৰাবাদ : অভিনেতা অভিষেক বচ্চনৰ সৈতে বিবাহ বিচ্ছেদৰ উৰাবাতৰিৰ মাজতে দুবাইত অনুষ্ঠিত এক হাই প্ৰফাইল অনুষ্ঠানত উপস্থিত হয় ঐশ্বৰ্য ৷ এই অনুষ্ঠানটোত বলীউডৰ আইকন ঐশ্বৰ্য ৰায়ৰ নাম ‘বচ্চন’ উপাধি অবিহনে প্ৰদৰ্শিত হয় । গ্ল’বেল উইমেনছ ফ’ৰামত অংশগ্ৰহণ কৰা অভিনেত্ৰীগৰাকীয়ে প্ৰভাৱশালী মহিলাসকলৰ এক সমাৱেশত ভাষণ দি উদ্ভাৱন, দৃঢ়তা আৰু স্থিতিস্থাপকতাক উৎসাহিত কৰে । কিন্তু এতিয়া চৰ্চালৈ আহিছে তেওঁৰ নামটো ৷ তেওঁৰ উপস্থিতিৰ সময়ত পৰ্দাত দেখা দিয়া নামটোৱে ছ’চিয়েল মিডিয়া ব্যৱহাৰকাৰীৰ দৃষ্টি আকৰ্ষণ কৰিছে, কিয়নো ইয়াত সৰলভাৱে লিখা আছিল ‘ঐশ্বৰ্য ৰায়-আন্তঃৰাষ্ট্ৰীয় তাৰকা’।
এই অনুষ্ঠানৰ ভিডিঅ’সমূহ দুবাই মহিলা প্ৰতিষ্ঠানৰ অফিচিয়েল ইনষ্টাগ্ৰাম একাউণ্টত শ্বেয়াৰ কৰা হয়, য’ত ঐশ্বৰ্যক এক গাঢ় নীলা ৰঙৰ সাজত দেখা গৈছে ৷ তেওঁৰ ভাষণে দৰ্শকক মোহিত কৰিছিল । ইয়াৰে এটা ভিডিঅ’ত তেওঁৰ নাম ‘ঐশ্বৰ্য ৰায় - ইণ্টাৰনেশ্যনেল ষ্টাৰ’ হিচাপে দেখুওৱা হৈছে, যিয়ে ২০০৭ চনৰ পৰা অভিষেকৰ সৈতে তেওঁৰ বিবাহিত সম্পৰ্কৰ বিষয়ে জল্পনা-কল্পনাক আৰু অধিক তীব্ৰতৰ কৰি তুলিছে ।
‘বচ্চন’ উপাধি তেতিয়া বাদ পৰিছে যেতিয়া হাই প্ৰফাইল বিয়া এখনত বচ্চন পৰিয়ালৰ পৰা পৃথকে ঐশ্বৰ্য কন্যা আৰাধ্যাৰ সৈতে উপস্থিত হয় । আনহাতে অভিষেকক তেওঁৰ পিতৃ বলীউডৰ কিংবদন্তি অমিতাভ বচ্চনসহ পৰিয়ালৰ আন সদস্যসকলৰ সৈতে দেখা যায় ৷ ইয়াৰ পিছতে অধিক জল্পনা-কল্পনাৰ সৃষ্টি হয় । বিবাহ বিচ্ছেদৰ বাতৰি ঘূৰি থকাৰ সময়তে অভিষেকৰ নামটো দশৱী ছবিৰ তেওঁৰ সহ-অভিনেত্ৰী নিম্ৰত কৌৰৰ সৈতে সাঙোৰ খাই পৰে ৷
কিন্তু শেহতীয়াকৈ অমিতাভ বচ্চনে নিজৰ ব্লগত এই উৰাবাতৰিৰ উত্তৰ দি পৰিয়ালত জল্পনা-কল্পনাৰ ক্ষতিকাৰক প্ৰভাৱৰ বিষয়ে লিখিছিল । তেওঁ গুৰুত্ব আৰোপ কৰে যে প্ৰশ্নবোধক চিহ্নৰে চিহ্নিত অসত্য তথ্য আৰু উৰাবাতৰিয়ে নেতিবাচক প্ৰভাৱ পেলাব পাৰে আৰু ইয়াক সাৱধানতাৰে লোৱা উচিত । পৰিয়ালৰ গোপনীয়তাক ৰক্ষা কৰি মেগাষ্টাৰগৰাকীয়ে লিখিছে যে জল্পনা-কল্পনা জল্পনা-কল্পনাই হয়... অসত্যই অপ্ৰয়োজনীয় বিশ্বাসৰ সৃষ্টি কৰিব পাৰে ।
লগতে পঢ়ক : ঐশ্বৰ্য ৰায় বচ্চনৰ মন আছিল চিকিৎসক হোৱাৰ, কিন্তু…
