পাঠশালা,৮ ছেপ্টেম্বৰ: ভ্ৰাম্যমান থিয়েটাৰ নে চাৰ্কাছ ? এই বিতৰ্কই অসমৰ সাংস্কৃতিক জগতক জোকাৰি যোৱাৰ সময়ত সামাজিক মাধ্যমত ব্যাপক ট্ৰ’লৰ সন্মুখীন হৈছে ভ্ৰাম্যমান থিয়েটাৰ শিল্প আৰু শিল্পীসকল । তাৰ মাজতেই ঘটিছে আন এক অঘটন । এখন ভ্ৰাম্যমান থিয়েটাৰৰ এগৰাকী অভিনেত্ৰীয়ে মঞ্চত নৃত্য কৰি থাকোতেই দুৰ্ভাগ্যক্ৰমে বস্ত্ৰ খুলি পৰা ঘটনাৰ ভিডিঅ’ সামাজিক মাধ্যমত ভাইৰেল হৈ পৰে । লগতে নেটিজেনসকলে ট্ৰ’লৰ লক্ষ্য কৰি লয় অভিনেত্ৰীগৰাকী তথা ভ্ৰাম্যমান থিয়েটাৰকো ।
এই বিষয়ত ভ্ৰাম্যমানৰ এগৰাকী অভিনেত্ৰীৰ হাতযোৰ কৰি অসমবাসীলৈ কাতৰ আহ্বান । অভিনেত্ৰী গৰাকী হ’ল শৰ্মিষ্ঠা চক্ৰৱৰ্তী । অভিনেত্ৰীগৰাকীয়ে এই বছৰ অভিনয় কৰিছে ইতিহাস থিয়েটাৰত । পাঠশালাত থিয়েটাৰখনৰ দৰ্শনী চলি থকাৰ মাজতেই চাৰ্কাছ, ভ্ৰাম্যমাণ থিয়েটাৰ আৰু সমালোচনা সন্দৰ্ভত ভ্ৰাম্যমাণৰ অভিনেত্ৰী শৰ্মিষ্ঠা চক্ৰৱৰ্তীৰ হাতযোৰ কৰি আবেগিক আহ্বান, “অভিনেতা-অভিনেত্ৰীসকলক ট্ৰ'ল কৰোতে ভাবি-চিন্তি পোষ্ট দিয়ক । ভ্ৰাম্যমানত মহিলা শিল্পী এগৰাকীৰ পোচাক খুলি পৰাক লৈ যি ভিডিঅ’ শ্বেয়াৰ হৈছে সেয়া দুখ লগা । তেনে কাম যাতে কোনেও নকৰে হাতযোৰ কৰি অনুৰোধ জনালো ।”
লগতে বিষয়টোক লৈ আবেগিক হৈ পৰা অভিনেত্ৰীগৰাকীয়ে কয়,“আজি তেওঁৰ হৈছে । কাইলৈ বেলেগ কিবা এটা মোৰো হ’ব পাৰে । যি কোনো শিল্পীৰ ক্ষেত্ৰত তেনে অবাঞ্চিত মুহূৰ্ত আহিব পাৰে । কিন্তু এনেদৰে ৰাইজে যাতে দুখ নিদিয়ে তাৰ বাবে অনুৰোধ জনালো ।”
আনহাতে, ভ্ৰাম্যমান নে চাৰ্কাছ বিতৰ্ক সন্দৰ্ভতো অভিনেত্ৰীগৰাকীৰ মন্তব্য,“ এয়া কাৰিকৰী দিশ । কেতিয়াবা পথেদি খোজ কাঢ়ি গৈ থাকোতেও দুৰ্ঘটনা হ’ব পাৰে । কেতেয়াবা এনে সৰু-সুৰা দুৰ্ঘটনা ঘটে । প্লিজ আমাক ট্ৰ’ল নকৰিব । ট্ৰ’ল কৰাৰ আগতে এবাৰ ভাবিব । এনে কাৰিকৰী দিশ ৰাইজে আকোঁৱালি লৈছে ।”
