নিউজ ডেস্ক, ১৬ ছেপ্টেম্বৰ : আপুনি বাৰু আজি বেংকলৈ যোৱাৰ কথা ভাবিছে নেকি ? যদিহে ভাবিছে, তেন্তে আমাৰ এই বাতৰিটো প্ৰথমতে পঢ়ি লওক ৷ কিয়নো আজি বেংক সম্পৰ্কত আপোনাৰ বাবে আছে এটা খবৰ ৷
সোমবাৰ অৰ্থাৎ বন্ধৰ বাৰ নহয় যদিও আজি বন্ধ হৈ থাকিব পাৰে আপোনাৰ নিচেই কাষৰ বেংকটো ৷ কিয়নো আজি মুছলমান সম্প্ৰদায়ৰ ঈদ-ই-মিলাদ-উন-নবী ৷ যাৰ বাবে বন্ধ থাকিব পাৰে একাংশ বেংক ।
ভাৰতত এই ঈদক চৰকাৰী বন্ধৰ দিন হিচাপে স্বীকৃতি দিয়া হৈছে । সেই হেতুকে গুজৰাট, মিজোৰাম, কৰ্ণাটক, তামিলনাডু, উত্তৰাখণ্ড, অন্ধ্ৰ প্ৰদেশ, তেলেংগানা, মণিপুৰ, জম্মু, কেৰালা, উত্তৰ প্ৰদেশ, নতুন দিল্লী, ছত্তীশগড় আৰু ঝাৰখণ্ডত আজি বন্ধ থাকিব বেংক সেৱা ।
- ঈদ-ই-মিলাদ :
হজৰত মহম্মদক সন্মান জনোৱাৰ উদ্দেশ্যে ঈদ-ই-মিলাদক পালন কৰা হয় ৷ এই উৎসৱক মহম্মদৰ জন্মদিন, নবীৰ দিৱস বা মৌলিদ বুলিও কোৱা হয় । ভাৰতত ঈদ-ই-মিলাদক ৰাজহুৱা বন্ধৰ দিন হিচাপে স্বীকৃতি দিয়া হৈছে আৰু বিশ্বৰ ইছলাম ধৰ্মাৱলম্বী লোকসকলে ইয়াক অতি আনন্দৰে পালন কৰে ।
RBI য়ে জনোৱা মতে, ১৮৮১ চনৰ ২৫ নং ধাৰাত মহাৰাষ্ট্ৰ চৰকাৰে ২০২৪ চনৰ ১৮ ছেপ্টেম্বৰক চৰকাৰী বন্ধ হিচাপে ঘোষণা কৰে । পূৰ্বে ঘোষণা কৰা ১৬ ছেপ্টেম্বৰ, ২০২৪ৰ চৰকাৰী বন্ধৰ দিন বাতিল কৰা হৈছে । সেই অনুসৰি ২০২৪ চনৰ ১৮ ছেপ্টেম্বৰত চৰকাৰী ছিকিউৰিটি, বৈদেশিক মুদ্ৰা, মুদ্ৰা বজাৰ আৰু টকাৰ সুদৰ হাৰৰ ডেৰাইভেটিভত কোনো ধৰণৰ লেনদেন আৰু নিষ্পত্তি নহয় ।
১৮ ছেপ্টেম্বৰ, ২০২৪ (বুধবাৰ)ত কৰিবলগীয়া সকলো বাকী থকা লেনদেনৰ নিষ্পত্তি পৰৱৰ্তী কৰ্মদিনলৈ অৰ্থাৎ ১৯ ছেপ্টেম্বৰ, ২০২৪ (বৃহস্পতিবাৰ)লৈ পিছুৱাই দিয়া হ’ব ।
- অনলাইন বেংকিং সেৱা উপলব্ধ হ’বনে ?
বেংকৰ শাখাসমূহ বন্ধ হৈ থাকিলেও অনলাইন বেংকিং সেৱা উপলব্ধ হ’ব যিবোৰ গ্ৰাহকে সহজেই লেনদেন, বেলেঞ্চ পৰীক্ষা আৰু অন্যান্য বিত্তীয় কাম-কাজ সম্পন্ন কৰিবলৈ ব্যৱহাৰ কৰিব পাৰিব ।
