নেশ্যনেল ডেস্ক, ৩ ছেপ্টেম্বৰ : এয়াৰ ইণ্ডিয়াই মুকলি কৰিলে নতুন এয়াৰবাছ A৩৫০-৯০০ বিমান । সোমবাৰে মুকলি কৰা এই বৃহৎ আৰু বিলাসী এয়াৰবাছে দিল্লী আৰু লণ্ডনৰ হিথ্ৰোৰ মাজত সেৱা আগবঢ়াব । দুদিনীয়া যাত্ৰাৰ দৰে এই দীঘলীয়া সেৱাত ‘‘নতুন এয়াৰ ইণ্ডিয়া’’ অভিজ্ঞতাৰ প্ৰথম নিয়োজন আৰু ইয়াক এয়াৰলাইনৰ পৰিৱৰ্তন কাৰ্যসূচীত এক গুৰুত্বপূৰ্ণ মাইলৰ খুঁটি হিচাপে বৰ্ণনা কৰা হৈছে ।
এয়াৰ ইণ্ডিয়াৰ মুখ্য কাৰ্যবাহী বিষয়া আৰু পৰিচালনা সঞ্চালক কেম্পবেল উইলচনে এই সন্দৰ্ভত কয়, "দিল্লী-লণ্ডন হিথ্ৰো পথত ফ্লেগশ্বিপ A৩৫০ৰ নিয়োজন এয়াৰ ইণ্ডিয়াৰ বাবে এক গুৰুত্বপূৰ্ণ মাইলৰ খুঁটি হিচাপে চিহ্নিত হৈছে । ই আমাৰ যাত্ৰীসকলৰ ভ্ৰমণৰ অভিজ্ঞতাক সঁচাকৈয়ে বিশ্বমানৰ মানদণ্ডলৈ উন্নীত কৰাৰ বাবে এয়াৰ ইণ্ডিয়াৰ প্ৰতিশ্ৰুতি প্ৰদৰ্শন কৰে আৰু আমি আমাৰ বিমান বৃদ্ধি আৰু নৱীকৰণ অব্যাহত ৰখাৰ লগে লগে গ্ৰাহকৰ প্ৰত্যাশা পূৰণ কৰাৰ প্ৰতিশ্ৰুতিও সন্মুখত ৰাখিছো ।"
- এয়াৰবাছৰ সুবিধাসমূহ
এয়াৰ ইণ্ডিয়া A৩৫০ বিমানখনৰ কেবিন প্ৰডাক্টত এক নতুন তৃতীয়-শ্ৰেণী কনফিগাৰেচন অন্তৰ্ভুক্ত আছে ৷ য'ত সম্পূৰ্ণ-ফ্লেট বিচনা প্ৰদান আছে । একেদৰে যাত্ৰীসকলে এক নতুন ‘‘Premium Economy’’ৰ অভিজ্ঞতা লাভ কৰিব । সকলো যাত্ৰীয়ে নতুন প্ৰজন্মৰ ইনফ্লাইট মনোৰঞ্জন প্ৰণালীৰ আনন্দ ল'ব পাৰিব । যিয়ে ৩০০০ ঘণ্টাতকৈ অধিক মনোৰঞ্জন সমল আগবঢ়াব । ইয়াক শীঘ্ৰে ৱাই-ফাই বোৰ্ডৰ দ্বাৰা পৰিপূৰক কৰিব পৰা যাব ।
- কেবিন ক্ৰুৱে পিন্ধিব মনীষ মালহোত্ৰাই ডিজাইন কৰা পোছাক
'Business' আৰু ‘‘Premium Economy’’ৰ যাত্ৰীসকলে ফেৰাগামো আৰু টিইউএমআইৰ দ্বাৰা ডিজাইন কৰা এমেনিটি কিট লাভ কৰিব । ইয়াৰ উপৰিও এয়াৰ ইণ্ডিয়াৰ নতুন ছফ্ট প্ৰডাক্ট -ভিষ্টা ভাৰ্ভৰ লগতে এই বিমানত নতুন চাইনাৱেৰ, টেবলৱেৰ, গ্লাছৱেৰ আৰু বিচনাও অন্তৰ্ভুক্ত থাকিব বুলি আশা কৰা হৈছে ।
কেৱল এয়াই নহয় নতুন ৰূপত দেখা যাব ফ্লাইট আৰু কেবিন ক্ৰুসকলক । দেশৰ বিশিষ্ট ফেশ্বন ডিজাইনাৰ মনীষ মালহোত্ৰাই প্ৰস্তুত কৰা নতুন ডিজাইনৰ পোছাকত দেখা যাব ফ্লাইট আৰু কেবিন ক্ৰুসকলক ।
- ব্যক্তিগত চুইট
এয়াৰ ইণ্ডিয়াৰ A৩৫০ বিমানৰ 'Business' শ্ৰেণীত সম্পূৰ্ণ ফ্লেট বিচনাৰ সৈতে ২৮ টা ব্যক্তিগত চুইট আছে । অতিৰিক্ত লেগৰুম আৰু অন্যান্য সুবিধাৰ সৈতে ২৪ খন আসনৰ এক সমৰ্পিত ‘‘Premium Economy’’ কেবিন আছে । 'Economy' শ্ৰেণীত ২৬৪ খন আড়ম্বৰপূৰ্ণ আসন আছে ।
বিমানখনৰ সকলো আসন ইন-ফ্লাইট মনোৰঞ্জন প্ৰণালীৰ সৈতে নতুন প্ৰজন্মৰ ‘‘Panasonic eX3’’ আৰু এইচডি স্ক্ৰীণৰো সুবিধা আছে । শিশুসকলৰ বাবে ১০০ৰো অধিক ঘণ্টাৰ সমলৰ বাবে এক নিৰ্দিষ্ট শ্ৰেণীৰ সৈতে ১৩ টা আন্তৰ্জাতিক আৰু ৮ টা ভাৰতীয় আঞ্চলিক ভাষাত ৩০০০ ঘণ্টাতকৈ অধিক মনোৰঞ্জন সমল আছে ।
- ব্যতিক্ৰমী খাদ্য সম্ভাৰ
ভাৰতীয় আৰু আন্তৰ্জাতিক দুয়োধৰণৰ ব্যঞ্জনৰ সৈতে এক মেনু ৰখা হৈছে । য'ত যাত্ৰীসকলে এক বিলাসী আৰু সাংস্কৃতিকভাৱে সমৃদ্ধ ডাইনিং অভিজ্ঞতা উপভোগ কৰিব পাৰিব ।
এয়াৰ ইণ্ডিয়াই এই বছৰৰ আৰম্ভণিতে A৩৫০ক অন্তৰ্ভুক্ত কৰে । তেতিয়াৰ পৰা ভাৰতৰ ভিতৰত আৰু কম সময়ৰ আন্তঃৰাষ্ট্ৰীয় পথত ই সেৱা আগবঢ়ায় আছে । বোয়িং ৭৭৭-৩০০ইআৰ আৰু বোয়িং ৭৮৭-৮ ড্ৰিমলাইনাৰৰ স্থান ল'ব A৩৫০ বিমানে । ফলস্বৰূপে, প্ৰতি সপ্তাহত দিল্লী-লণ্ডন হিথ্ৰো পথত অতিৰিক্ত ৩৩৬ খন আসন উপলব্ধ হ'ব ।
লগতে পঢ়ক :ভিস্তাৰা-এয়াৰ ইণ্ডিয়াৰ একত্ৰিকৰণ : প্ৰভাৱিত হ'ব নেকি যাত্ৰীসকল ? - Air India Vistara Merger
