নেশ্যনেল ডেস্ক,২২ আগষ্ট : অসমৰ এক দম্পতীয়ে শেহতীয়াকৈ তিৰুৱন্তপুৰম আৰক্ষীৰ ওচৰত তেওঁলোকৰ কন্যাৰ নিৰুদ্দেশৰ অভিযোগ দাখিল কৰিছে । জানিব পৰা মতে সন্ধানহীন কিশোৰীগৰাকী হৈছে তাছমিন বেগম । তাছমিনৰ পৰিয়ালটো প্ৰায় ১ বছৰ ধৰি কেৰালাত বাস কৰি আছে । কিছুদিন পূৰ্বে তাছমিন আৰু ভগ্নীৰ তৰ্কাতৰ্কি হৈছিল । যাক লৈ মাতৃয়ে তাছমিনক গালি দিছিল । সেই ঘটনাৰ পিচতে তাছমিন ঘৰৰ পৰা ওলাই যায় আৰু তেতিয়াৰে পৰা কিশোৰীগৰাকীৰ কোনো সন্ধান নাই ।
সন্ধানহীন কিশোৰীক বিচাৰি অনুসন্ধান
পৰিয়ালটোৰ অভিযোগৰ ভিত্তিত তিৰুৱন্তপুৰম আৰক্ষীয়ে তদন্ত আৰম্ভ কৰিছে । ইফালে সন্ধানহীন কিশোৰীগৰাকীক অকলে ৰে'লত ভ্ৰমণ কৰাৰ তথ্য পোহৰলৈ আহিছে । তিৰুৱন্তপুৰমৰ পৰা কন্যাকুমাৰীলৈ ৰে'লত যাত্ৰা কৰা এগৰাকী যাত্ৰীয়ে অকলে ভ্ৰমণ কৰা কিশোৰীগৰাকীক কান্দি থকা দেখিছিল । তেওঁ নিজৰ ফোনত কিশোৰীগৰাকীৰ এখন ফটোও তুলিছিল । যাত্ৰীজনে আৰক্ষীক কোৱা মতে তেওঁ সন্ধানহীন কিশোৰীগৰাকীক কন্যাকুমাৰীলৈ ৰে'লযোগে যাত্ৰা কৰা প্ৰত্যক্ষ কৰিছিল ।
কন্যাকুমাৰীলৈ গৈছে কিশোৰীগৰাকী
আৰক্ষীয়ে ইতিমধ্যে নিশ্চিত কৰিছে যে যাত্ৰীজনে মোবাইলত তোলা ফটোখন সন্ধানহীন তাছমিনৰে আছিল । তথ্য লাভ কৰাৰ পিচতে আৰক্ষীয়ে তাছমিনৰ সন্ধানত অভিযান আৰম্ভ কৰিছে । কেৰালা আৰক্ষীয়ে কন্যাকুমাৰী জিলা আৰক্ষীক এই বিষয়ে অৱগত কৰিছে । কিশোৰীগৰাকীৰ ফটো কন্যাকুমাৰী আৰক্ষীক হস্তান্তৰ কৰা হৈছে । এই তথ্য়ৰ ভিত্তিত কন্যাকুমাৰী আৰক্ষীয়ে ৰে'ল ষ্টেচনকে ধৰি বিভিন্ন স্থানত তদন্ত আৰম্ভ কৰিছে । ৰে'ল ষ্টেচনৰ বাহিৰত থকা একাংশ অটো চালকেও তাছমিনক দেখা বুলি আৰক্ষীক অৱগত কৰিছে ।
দুই ৰাজ্যৰ আৰক্ষীৰ অভিযান
চিচিটিভি কেমেৰাত স্পষ্টভাৱে দেখা গৈছে যে তাছমিনে ৰে'ল ষ্টেচনৰ পৰা ওলাই গৈছে । ইয়াৰ পৰা আৰক্ষী নিশ্চিত হৈছে যে সন্ধানহীন তাছমিন কন্যাকুমাৰীত আছে । জানিব পৰা মতে কেৰালা আৰক্ষীও ইতিমধ্যে কন্যাকুমাৰীত উপস্থিত হৈছে ।
কন্যাকুমাৰীৰ হোটেল, পৰ্যটনস্থলী আদিকে ধৰি বিভিন্ন স্থানত আৰক্ষীয়ে তাছমিনক বিচাৰি অনুসন্ধান চলাইছে যদিও এতিয়ালৈ আৰক্ষীয়ে তেওঁৰ কোনো সম্ভেদ পোৱা নাই । এনে পৰিস্থিতিত কোনো লোকে তাছমিনক অপহৰণ কৰাৰ সন্দেহ কৰা হৈছে । একেদৰে কিশোৰীগৰাকীৰ আত্মীয় চেন্নাইত কৰ্মৰত নেকি তাৰো অনুসন্ধান চলাই থকা হৈছে । কিয়নো বুধবাৰে সন্ধিয়া কন্যাকুমাৰী এক্সপ্ৰেছ ৰে'লখন চেন্নাই অভিমুখে ৰাওনা হৈছে । সন্ধানহীন তাছমিন সেই ৰে'লখনতে চেন্নাইলৈ যোৱাৰো সন্দেহ কৰা হৈছে ।
লগতে পঢ়ক :কান্দি কান্দি ক’লৈ গ’ল তাছমীত - Assamese Girl Missing from Kerala
