নিউজ ডেস্ক, ২৬ ছেপ্টেম্বৰ : আৰ জি কৰ চিকিৎসা মহাবিদ্যালয় আৰু চিকিৎসালয়ৰ প্ৰশিক্ষাৰ্থী চিকিৎসকক ধৰ্ষণ আৰু হত্যাৰ প্ৰতিবাদত বিৰতি ঘোষণা বংগ বিজেপিৰ । এই ঘোষণা কৰি কেন্দ্ৰীয় মন্ত্ৰী তথা পশ্চিমবংগ ৰাজ্যিক বিজেপিৰ সভাপতি সুকান্ত মজুমদাৰে বুধবাৰে কয়, "আমি দুৰ্গাপূজা উদযাপনৰ সময়ত কোনো প্ৰতিবাদ নকৰো ।"
অৱশ্যে তেওঁ কয় যে মুখ্যমন্ত্ৰী মমতা বেনাৰ্জীয়ে পদত্যাগ কৰিবলৈ বাধ্য নোহোৱালৈকে বিজেপিয়ে প্ৰতিবাদ অব্যাহত ৰাখিব । তেওঁ কয়, "যেতিয়ালৈকে মুখ্যমন্ত্ৰীয়ে পদত্যাগ নকৰে তেতিয়ালৈকে দুৰ্গা পূজা উদযাপনৰ পিচত প্ৰতিবাদ অব্যাহত ৰাখিব ।"
সুকান্ত মজুমদাৰে কয়, "আমাৰ আন্দোলন চলি আছে আৰু অব্যাহত থাকিব । দুৰ্গা পূজা উদযাপনৰ পূৰ্বে আজি ৰাজনৈতিক কাৰ্যসূচীৰ অন্তিম দিন আছিল । পূজাৰ সময়ত আমি কোনো প্ৰতিবাদ নকৰো । দুৰ্গা পূজাৰ পিচত আমি পুনৰ ৰাজপথলৈ ওলাম । আমি নৱান্ন ঘেৰাও কৰিম । আমি মুখ্যমন্ত্ৰীক পদত্যাগ কৰিবলৈ বাধ্য নকৰালৈকে বিজেপি পথৰ ওপৰত প্ৰতিবাদত থাকিব ।"
উল্লেখ্য যে ইয়াৰ পূৰ্বে আৰ জি কৰ চিকিৎসা মহাবিদ্যালয়ৰ প্ৰাক্তন অধ্যক্ষ সন্দীপ ঘোষ আৰু তলা আৰক্ষী থানাৰ ভাৰপ্ৰাপ্ত বিষয়া অভিজিত মণ্ডলক বুধবাৰে শিয়ালদহ আদালতৰ পৰা প্ৰেছিডেন্সী কাৰাগাৰলৈ প্ৰেৰণ কৰা হয় ।
আৰ জি কৰ মেডিকেল কলেজত এগৰাকী মহিলা চিকিৎসকক বলাৎকাৰ আৰু হত্যা সন্দৰ্ভত কেন্দ্ৰীয় অনুসন্ধান ব্যুৰোৱে দুয়োকে গ্ৰেপ্তাৰ কৰিছিল । ইফালে বুধবাৰে কনিষ্ঠ চিকিৎসকসকলেও ধৰ্ষণ আৰু হত্যাৰ বলি হোৱা চিকিৎসকগৰাকীক শ্ৰদ্ধাঞ্জলি জনোৱাৰ বাবে সমবেত হয় ।
ইফালে চলিত সপ্তাহৰ আৰম্ভণিতে পশ্চিমবংগ চিকিৎসা পৰিষদে অধ্যক্ষগৰাকীৰ চিকিৎসাৰ পঞ্জীয়ন বাতিল কৰে ।
আনহাতে, অনুসন্ধানৰ সময়ত ইডিয়ে কলকাতাৰ চিনাৰ পাৰ্কত অৱস্থিত আৰ জি কৰ মেডিকেল কলেজ আৰু হাস্পতালৰ প্ৰাক্তন অধ্যক্ষ সন্দীপ ঘোষৰ বাসগৃহত তালাচী অভিযান চলায় । ইডিয়ে সন্দীপ ঘোষৰ বিৰুদ্ধে বিত্তীয় অনিয়মৰ গোচৰত ধন আত্মসাতৰ অভিযোগৰ তদন্তৰ বাবে ধন সৰবৰাহ প্ৰতিৰোধ আইনৰ (পি এম এল এ) অধীনত এটা গোচৰ ৰুজু কৰিছে ।
১০ ছেপ্টেম্বৰত কেন্দ্ৰীয় অনুসন্ধান ব্যুৰ' (চি বি আই) আদালতে সন্দীপ ঘোষ আৰু আন তিনিজনক আৰ জি ক ৰ চিকিৎসা মহাবিদ্যালয় আৰু চিকিৎসালয়ৰ বিত্তীয় অনিয়মৰ গোচৰত ন্যায়িক জিম্মালৈ প্ৰেৰণ কৰে ।
কলিকতা উচ্চ ন্যায়ালয়ৰ একক বিচাৰপীঠৰ নিৰ্দেশনা অনুসৰি, মহাবিদ্যালয় আৰু চিকিৎসালয়ত দুৰ্নীতি আৰু বিত্তীয় অনিয়মৰ অভিযোগত তদন্তৰ অধীনত আছে সন্দীপ ঘোষ । এই বিচাৰপীঠে বিষয়টোৰ তদন্ত কৰিবলৈ চি বি আইক নিৰ্দেশ দিয়ে ।
