নেশ্যনেল ডেস্ক, ৩০ জুলাই : দেশত পুনৰ ৰে'ল দুৰ্ঘটনা । এইবাৰ স্থান ঝাৰখণ্ড । হাওৰা-মুম্বাই মেইল ৰে'লখন দুৰ্ঘটনাত পতিত হয় । চক্ৰধৰপুৰৰ বাৰাবাম্বো আৰু ৰাজখৰচাৱান ৰে'ল ষ্টেচনৰ মাজত এই দুৰ্ঘটনাটো সংঘটিত হয় । দুৰ্ঘটনাটোত দুগৰাকী যাত্ৰী নিহত হোৱাৰ বিপৰীতে বহু লোক আহত হোৱাৰ খবৰ পোৱা গৈছে । ইতিমধ্যে ৰে'ল বিভাগ আৰু প্ৰশাসনে উদ্ধাৰ অভিযান আৰম্ভ কৰিছে ।
চক্ৰধৰপুৰত ৰে'ল দুৰ্ঘটনা :
মঙলবাৰে পুৱা প্ৰায় ৪.৩০ বজাত এই দুৰ্ঘটনাটো সংঘটিত হয় । হাওৰাৰ পৰা মুম্বাইৰ দিশে গৈ থকা ১২৮১০ নম্বৰৰ ৰে'লখন চক্ৰধৰপুৰ ডিভিজনৰ বাৰাবাম্বো-ৰাজখৰচাৱান ৰে'ল ষ্টেচনৰ মাজত পোটো বেদা গাঁৱৰ ওচৰত লাইনচ্যুত হয় । ৰে'লখনৰ ৪ টা সাধাৰণ ডবাৰ বাহিৰেও মুঠ ১৮ টা ডবা লাইনচ্যুত হয় ।
এই দুৰ্ঘটনাটোত বহু লোক আহত হোৱাৰ খবৰ পোৱা গৈছে যদিও এতিয়ালৈ কোনো নিৰ্দিষ্ট তথ্য পোহৰলৈ অহা নাই । একে সময়তে ৰে'ল বিভাগ আৰু প্ৰশাসনৰ উচ্চ পদস্থ বিষয়াসকল ঘটনাস্থলীত উপস্থিত হৈছে আৰু উদ্ধাৰৰ কাম আৰম্ভ কৰিছে ।
দুৰ্ঘটনাটোৰ খবৰ পোৱাৰ পিচতে চেৰাইকেলা-খৰচাৱানৰ উপায়ুক্ত ৰবি শংকৰ শুক্লাও উপস্থিত হয় । ৰে'ল বিভাগৰ জ্যেষ্ঠ বিষয়াসকলেও উদ্ধাৰ অভিযানৰ তদাৰক কৰিছে ।
জানিব পৰা মতে, আহত লোকসকলক চক্ৰধৰপুৰ চিকিৎসালয়ত ভৰ্তি কৰোৱা হৈছে । আহতৰ সংখ্যা বৃদ্ধি হোৱাৰ আশংকা কৰা হৈছে । কিয়নো দুৰ্ঘটনাটোৰ সময়ত বেছিভাগ যাত্ৰীয়ে শুই আছিল । দুৰ্ঘটনাটোৰ পিচত একাংশ যাত্ৰী ডবাবোৰৰ পৰা ওলাই অহা দেখা গৈছে ।
আনহাতে একাংশ লোক তাত আৱদ্ধ হৈ আছে । যিসকলক উদ্ধাৰৰ কাম চলি আছে । এই ৰে'ল দুৰ্ঘটনাটোৰ কাৰণ এতিয়ালৈ জানিব পৰা হোৱা নাই । দুৰ্ঘটনাটোৰ ফলত উক্ত ৰে'লপথত বহু ৰে'ল আৱদ্ধ হৈ পৰিছে । ইতিমধ্যে ৰে’ল বিভাগৰ ফালৰ পৰা হেল্পলাইন মুকলি কৰা হৈছে ৷
ইফালে টাটানগৰৰ পৰা দুৰ্ঘটনাস্থলীলৈ তিনিখন সাহায্য ৰে'ল প্ৰেৰণ কৰা হৈছে । মুখ্য লাইনৰ বহুতো ৰে'ল বাতিল কৰা হৈছে । বহু ৰে'লৰ পথ সলনি কৰা হৈছে । হাওৰা-মুম্বাই মেইল ৰে'লখনৰ দুৰ্ঘটনাৰ পিচত ভাৰতীয় ৰে'লৱেয়ে হেল্পলাইন নম্বৰ জাৰী কৰিছে :
- টাটানগৰ : ০৬৫৭২২৯০৩২৪
- চক্ৰধৰপুৰ : ০৬৫৮৭২৩৮০৭২
- ৰাউৰকেলা : ০৬৬১২৫০১০৭২, ০৬৬১২৫০০২৪৪
- হাওৰা : ৯৪৩৩৩৫৭৯২০, ০৩৩২৬৩৮২২১৭
- ৰাঁচী : ০৬৫১২৭৮৭১১৫
- হাওৰা হেল্প ডেস্ক : ০৩৩২৬৩৮২২১৭, ৯৪৩৩৩৫৭৯২০
- শালিমাৰ হেল্প ডেস্ক : ৬২৯৫৫৩১৪৭১, ৭৫৯৫০৭৪৪২৭
- খড়গপুৰ হেল্প ডেস্ক : ০৩২২২২৯৩৭৬৪
- চিএচএমটি হেল্পলাইন অটো নম্বৰ: ৫৫৯৯৩
- পি এণ্ড টি- ০২২২২৬৯৪০৪০
- মুম্বাই : ০২২২২৬৯৪০৪০
- নাগপুৰ: ৭৭৫৭৯১২৭৯০
