নেশ্যনেল ডেস্ক, ২৯ জুন : গ্ৰেটাৰ নয়ডাৰ সুৰজপুৰ আৰক্ষী থানা অঞ্চলৰ খোদনা কালা গাঁৱত শুকুৰবাৰে সন্ধিয়া হঠাতে এটা নিৰ্মীয়মাণ ঘৰ খহি পৰে । এই ঘটনাত ঘৰটোত খেলি থকা আঠটা শিশু ধ্বংসাৱশেষৰ তলত পোত যায় আৰু গুৰুতৰভাৱে আহত হয় ।
দুৰ্ঘটনাটোৰ খবৰ পোৱা মাত্ৰকে স্থানীয় ৰাইজ গৈ তৎক্ষণাত দুৰ্ঘটনাস্থলীত উপস্থিত হৈ শিশুকেইটাক ধ্বংসাৱশেষৰ তলৰ পৰা উদ্ধাৰ কৰি ওচৰৰ চিকিৎসালয়ত ভৰ্তি কৰায় । কিন্তু চিকিৎসাৰ সময়তে তাৰে মাজৰ তিনিটা শিশুৰ মৃত্যু হয় । আনহাতে, পাঁচটা শিশুৰ অৱস্থা এতিয়াও সংকটজনক হৈ আছে । ঘটনাস্থলীত আৰক্ষী আৰু প্ৰশাসনিক বিষয়াসকলো উপস্থিত হয় ।
উল্লেখ্য যে, বৰ্তমান দিল্লীকে ধৰি সমগ্ৰ এন চি আৰ অঞ্চলত ধাৰাসাৰ বৰষুণ হৈ আছে । তাৰে মাজতে সুৰজপুৰ আৰক্ষী থানাৰ অধীনৰ খোদনা কালা গাঁৱত নিৰ্মীয়মাণ ঘৰটো খহি পৰে । সেই সময়ত তাত 8 টা শিশুৱে খেলি আছিল । কিন্তু হঠাতে ঘৰটোৰ চাল আৰু দেৱাল খহি পৰাত তেওঁলোক ঘৰটোৰ ধ্বংসাৱশেষৰ তলত পোত যায় আৰু গুৰুতৰভাৱে আহত হয় ।
ঘটনাটো সংঘটিত হোৱাৰ পিচতে সমগ্ৰ গাঁৱখনত হুৱাদুৱা লাগে ৷ কিন্তু লগে লগে গাঁৱবাসীয়ে ধ্বংসাৱশেষ আঁতৰাই শিশুকেইটাক তাৰ পৰা উদ্ধাৰ কৰি নিকটৱৰ্তী চিকিৎসালয়ত ভৰ্তি কৰায় ।
যুটীয়া আৰক্ষী আয়ুক্ত শিৱহাৰী মীনাই জনোৱা মতে, সুৰজপুৰ আৰক্ষী থানাৰ অন্তৰ্গত চাগিৰৰ নিৰ্মীয়মাণ ঘৰটো শুকুৰবাৰে সন্ধিয়া হঠাতে খহি পৰে । সেই সময়ত তাত 8 টা শিশুৱে খেলি আছিল । কিন্তু হঠাতে ঘৰৰ চাল আৰু দেৱাল খহি পৰাত সকলোকে ধ্বংসাৱশেষে পুতি পেলায় বুলি আৰক্ষী প্ৰশাসনক জনোৱা হৈছিল ।
এই তথ্য লাভ কৰাৰ পিচত আৰক্ষী আৰু প্ৰশাসনকে ধৰি গাঁৱবাসী ঘটনাস্থলীত উপস্থিত হৈ ধ্বংসাৱশেষ আঁতৰাই তাৰ পৰা আটাইকেইটা শিশুক উদ্ধাৰ কৰি ওচৰৰ চিকিৎসালয়ত ভৰ্তি কৰোৱায় । তাত চিকিৎসকে তিনিটা শিশুক মৃত বুলি ঘোষণা কৰে । বৰ্তমান চিকিৎসালয়ত চিকিৎসাধীন হৈ থকা পাঁচটা শিশু গুৰুতৰভাৱে আহত হৈছে ।
স্থানীয় বাসিন্দা ৰহিমুদ্দিনে জনোৱা মতে, নিহত আৰু আহত শিশুকেইটাক আয়েশা(১৬), আহাদ(৪), হুছেইন(৫), আদিল(৮), আলফিজা(২), চোহানা(১২), ভাচিল(১১) আৰু সমীৰ (১৫) বুলি চিনাক্ত কৰা হৈছে । ইয়াৰে ভিতৰত চিকিৎসাৰ সময়ত আহাদ, আদিল আৰু আলফিজাৰ মৃত্যু হয় । অৱশ্যে ঘৰটো কিয় খহি পৰিল, তাৰ কাৰণ এতিয়ালৈকে জানিব পৰা হোৱা নাই । কিন্তু অতিমাত্ৰা বৰষুণৰ বাবেই ঘৰটো খহি পৰাৰ সম্ভাৱনা ব্যক্ত কৰা হৈছে ।
