তেজপুৰ, ২৬ ছেপ্টেম্বৰ : ‘‘আমি এখন জনগোষ্ঠীয় ৰাজ্যত বাস কৰো আৰু জনগোষ্ঠীয় লোক হোৱাৰ বাবে আমি কিছুমান খাদ্য গ্ৰহণ কৰো, কিন্তু আমি কাৰো বিৰোধিতা নকৰো । যিহেতু আমাৰ সংস্কৃতি তেনেধৰণৰ গতিকে আমি কি খাম নাখাম সেয়া আমাক শিকাব নালাগে , এয়া আমাৰ সাংবিধানিক অধিকাৰ ৷’’- এই মন্তব্য সদৌ অৰুণাচল প্ৰদেশ ছাত্ৰ সন্থাৰ সাধাৰণ সম্পাদক ঋতুম তালিৰ ।
উল্লেখ্য যে বৃহস্পতিবাৰে জগদগুৰু শংকৰাচাৰ্যক অৰুণাচল প্ৰদেশৰ ইটানগৰ ভ্ৰমণৰ পৰা ওভতাই পঠিয়াই অৰুণাচল প্ৰদেশ ছাত্ৰ সন্থাই । আপছুৰ সাধাৰণ সম্পাদক ঋতুম তালিয়ে এই বিষয়ে সদৰী কৰি কয় যে ৰাজ্যখনৰ পৰিৱেশ বিনষ্ট নকৰিবলৈ তেওঁক বিমানবন্দৰৰ পৰা ঘূৰাই পঠিওৱা হয় ।
এই সমগ্ৰ প্ৰতিবাদ সম্পৰ্কে সদৌ অৰুণাচল প্ৰদেশৰ ছাত্ৰ সন্থাৰ সাধাৰণ সম্পাদক ঋতুম তালিয়ে ই টিভি ভাৰতৰ লগত হোৱা এক বিশেষ টেলিফোন বাৰ্তালাপত কয়, ‘‘অৰুণাচল প্ৰদেশ এখন জনজাতীয় ৰাজ্য ৷ সেয়েহে ইয়াত সকলো জনগোষ্ঠীৰ লোকে নিজৰ খাদ্যাভ্যাস পূৰ্বৰ ৰুচি অনুসৰি গ্ৰহণ কৰি আহিছে । এই প্ৰচেষ্টাত কোনোৱে আহি বাধা দিলে বিভিন্ন অপ্ৰীতিকৰ পৰিস্থিতিৰ উদ্ভৱ হ’ব পাৰে ৷ সেইবাবে জগদগুৰু শংকৰাচাৰ্যক ৰাজ্যখনত প্ৰৱেশ কৰিবলৈ দিয়াত বাধা প্ৰদান কৰা হয় আৰু তেওঁক ইটানগৰৰ হোলংগীৰ ডনী প'লো বিমানবন্দৰৰ পৰা ঘূৰাই পঠিওৱা হয় ৷’’
তেওঁ কয়, ‘‘জগদগুৰু শংকৰাচাৰ্যই বৃহস্পতিবাৰে পুৱা প্ৰায় ৯.২০ বজাত বিমানবন্দৰত আহি উপস্থিত হৈছিল আৰু প্ৰায় ডেৰঘণ্টা সময় বিমানবন্দৰত অতিবাহিত কৰি তেওঁ উভতি যায় ৷’’
ছাত্ৰ সংগঠনটোৰ সম্পাদকগৰাকীয়ে পুনৰ কয়, ‘‘ ভাৰতীয় সংবিধান মতে সকলোৰে নিজৰ অধিকাৰ আছে , সেই অধিকাৰ অনুসৰি সকলোকে চলিবলৈ দিব লাগে ৷ আমি কোনো ব্যক্তি বিশেষৰ বিৰোধী নহয়, কাৰো অধিকাৰ খৰ্ব নকৰো, কিন্তু এখন জনগোষ্ঠীয় ৰাজ্য হিচাবে অৰুণাচল প্ৰদেশত ১০০ শতাংশ লোকে পূৰ্বৰ পৰা গো-ভক্ষণ কৰি আহিছে ৷ কিন্তু বহুতে পূজাও কৰে যদিও বৰ্তমান বহুলোকে পূৰ্বৰ ভক্ষণ ব্যৱস্থা বাদ দিছে ৷’’
জগদগুৰু শংকৰাচাৰ্যই আজি পাহাৰীয়া ৰাজ্যখনত গৌধ্বজ স্থাপনা ভাৰতযাত্ৰাৰ অংশ হিচাপে বৃহস্পতিবাৰে চাৰ্টাৰ্ড বিমানেৰে অৰুণাচল প্ৰদেশৰ ইটানগৰৰ হোলংগীৰ ডনী প'লো বিমানবন্দৰত উপস্থিত হৈছিল । কিন্তু তেওঁৰ এই যাত্ৰাই ৰাজ্যখনৰ আইন-শৃংখলা পৰিৱেশ বিনষ্ট কৰাৰ সম্ভাৱনা থকা বাবেই বিমানবন্দৰৰ পৰা ঘূৰাই পঠিওৱা হয় বুলি আপছুৰ সাধাৰণ সম্পাদক তালিয়ে কয় ।
তেওঁৰ এই ভ্ৰমণৰ বিৰোধিতা কৰি সদৌ অৰুণাচল প্ৰদেশ ছাত্ৰ সন্থাৰ সদস্যসকলে বিমানবন্দৰৰ বাহিৰত প্ৰতিবাদ সাব্যস্ত কৰে । পাপুম পাৰে জিলা প্ৰশাসনে জগদগুৰু আৰু তেওঁৰ শিষ্যসকলৰ সৈতে বাৰ্তালাপ কৰি তেওঁৰ ভ্ৰমণ স্পৰ্শকাতৰ বাবে তেওঁলোকক উভতি যাবলৈ পতিয়ন নিয়াই । উত্তৰ-পূৰ্বাঞ্চলৰ ৰাজ্যৰ বিভিন্ন প্ৰান্তলৈ গৈ গো-বধৰ ওপৰত নিষেধাজ্ঞা আৰোপ কৰিছে জগদগুৰুৱে । ইতিমধ্যে উত্তৰ পূৰ্বাঞ্চলৰ ৰাজ্যত তেওঁৰ এই যাত্ৰাৰ আৰম্ভণি কৰিছিল ।
উল্লেখযোগ্য যে, জগদগুৰু শংকৰাচাৰ্যই অযোধ্যাৰ ৰাম মন্দিৰত প্ৰাণ প্ৰতিষ্ঠাৰ সময়তো বিৰোধিতা কৰিছিল ৷
লগতে পঢ়ক : গণেশ চতুৰ্থীৰ বাবে গৰুৰ গোবৰেৰে নিৰ্মাণ পৰিৱেশ অনুকূল গণেশৰ মূৰ্তি
গো সংৰক্ষণ আৰু গো-হত্যাক লৈ ৰাজনীতি নকৰিব: সত্যৰঞ্জন বৰা
মন্দিৰৰ সমীপৰে গো-মাংস কঢ়িওৱাৰ অভিযোগত গ্ৰেপ্তাৰ ইছলাম ধৰ্মাৱলম্বী যুৱক
