নেশ্যনেল ডেস্ক, 7 জুলাই : মুম্বাইত ক্ৰমে বৃদ্ধি পাইছে হিট এণ্ড ৰাণৰ ঘটনা ৷ দেওবাৰে পুনৰ ৱৰ্লি অঞ্চলত হিট এণ্ড ৰাণৰ এক ঘটনা সংঘটিত হয় ৷ জানিব পৰা মতে এখন বিলাসী বি এম ডব্লিউ গাড়ীয়ে এটা মাছমৰীয়া দম্পতীক খুন্দা মাৰি পলায়ন কৰে ৷ বিলাসী গাড়ীখনে ইমান তীব্ৰভাৱে খুন্দা মাৰে যে মহিলাগৰাকী গাড়ীৰ বনেটত বাগৰি পৰে ৷ এই ঘটনাৰ পিচতো চালকে গাড়ীখন নৰখাই বুলি অভিযোগ উঠিছে ৷ জানিব পৰা মতে খুন্দা মৰাৰ পিচতো মহিলাগৰাকীক প্ৰায় 100 মিটাৰ চোচঁৰাই লৈ যায় গাড়ীখনে ৷ এই দুৰ্ঘটনাত মহিলাগৰাকীৰ মৃত্যু হোৱাৰ বিপৰীতে তেওঁৰ স্বামী গুৰুতৰভাৱে আহত হৈ চিকিৎসাধীন হৈ আছে ৷ এই গোচৰত মুম্বাই আৰক্ষীয়ে শিৱসেনাৰ নেতা ৰাজেশ শ্বাহক আটক কৰে ৷ অভিযুক্ত মিহিৰ শ্বাহ আৰু গাড়ী চালক এতিয়াও পলাতক হৈ আছে ৷
কিছুদিন পূৰ্বে সংঘটিত হোৱা পোৰ্চে হিট এণ্ড ৰাণ ঘটনাই সমগ্ৰ দেশ জোকাৰি গৈছিল৷ ইয়াৰ পিচত এনে ঘটনা হ্ৰাস হ'ব বুলি আশা কৰা হৈছিল যদিও পুনৰ এনে ঘটনা পোহৰলৈ আহিছে৷ ৰাজ্যখনৰ বহু ঠাইত হিট এণ্ড ৰাণ ঘটনা সংঘটিত হৈছে ৷ দেওবাৰেও মুম্বাইত ৱৰ্লি হিট এণ্ড ৰাণৰ ঘটনা পোহৰলৈ অহাৰ পিচত মুম্বাই কঁপি উঠিছে ৷
এই ঘটনাত এগৰাকী মহিলাৰ মৃত্যু হোৱাৰ তথ্য পোহৰলৈ আহিছে ৷ দুৰ্ঘটনা সংঘটিত কৰিয়েই গাড়ী চালক ঘটনাস্থলীৰ পৰা পলাই যায় আৰু আৰক্ষীয়ে তেওঁক বিচাৰি অভিযান চলাই আছে ৷ এই ঘটনা ৱৰ্লি অঞ্চলৰ বিখ্যাত এট্ৰিয়া মলৰ ওচৰত পুৱাৰ ভাত সংঘটিত হয় ৷ স্বামী আৰু পত্নী ক্ৰমে প্ৰদীপ নাখৱা আৰু কাবেৰী নাখৱা (45) তেওঁলোকৰ স্কুটীত মাছ ধৰিবলৈ ঘৰৰ পৰা ওলাই গৈছিল ৷ দম্পতীটো ৱৰ্লি কলিৱাড়া অঞ্চলত বাস কৰে ৷
মাছ ধৰি উভতি অহাৰ সময়ত, তেওঁলোকৰ স্কুটীখন এখন বি এম ডব্লিউ গাড়ীয়ে খুন্দা মাৰে ৷ স্কুটীত বৃহৎ পৰিমাণৰ মাছ আৰু সামগ্ৰী কঢ়িয়াই অনা নাখৱা দম্পতীয়ে স্কুটীৰ নিয়ন্ত্ৰণ হেৰুৱাই দুয়ো গাড়ীৰ বনেটত পৰি যায় ৷ মহিলাগৰাকীৰ স্বামী কেনেবাকৈ বনেটৰ পৰা তললৈ বাগৰি পৰে কিন্তু মহিলাগৰাকী তাতেই আৱদ্ধ হৈ পৰে ৷ জানিব পৰা মতে মহিলাগৰাকীয়ে চিঞৰি আছিল আৰু চালকজনে গাড়ীখন লৈ পলায়ন কৰিছিল ৷ ফলত মহিলাগৰাকী প্ৰায় 100 মিটাৰ দূৰত বাগৰি পৰে ৷
দুৰ্ঘটনাত স্বামীৰ ৰক্ষা পৰে যদিও তেওঁৰ পত্নী গুৰুতৰভাৱে আঘাতপ্ৰাপ্ত হয় ৷ মহিলাগৰাকীক মুম্বাই চেণ্ট্ৰেলৰ নায়াৰ চিকিৎসালয়ত ভৰ্তি কৰোৱা হয় ৷ অৱশ্যে তেতিয়ালৈ বহু পলম হৈ যায় আৰু চিকিৎসকে মহিলাগৰাকীক মৃত বুলি ঘোষণা কৰে ৷ ৱৰ্লি আৰক্ষীয়ে বিষয়টো অধিক অনুসন্ধান কৰি আছে ৷ বি এম ডব্লিউ গাড়ীখনৰ চালকৰ সন্ধানত তীব্ৰ অনুসন্ধান আৰম্ভ কৰা হৈছে ৷
উল্লেখ্য যে, যোৱা কেইদিনমানত মহাৰাষ্ট্ৰত বৃহৎ পৰিমাণে হিট এণ্ড ৰাণৰ ঘটনা সংঘটিত হৈ আহিছে ৷ পুনে, জলগাঁও, বুলধানা আৰু ৰাজ্যখনৰ অন্যান্য চহৰতো একে ধৰণৰ ঘটনা সংঘটিত হৈছে ৷ আনকি পথচাৰীসকলে হাতৰ মুঠিত জীৱন লৈ ৰাস্তাত খোজ কাঢ়িব লগা পৰিস্থিতিৰ উদ্ভৱ হৈছে ৷
এই ঘটনা সন্দৰ্ভত কঠোৰ ব্যৱস্থা গ্ৰহণৰ দাবী জনাইছে আদিত্য থাকৰেই ৷ এতিয়া এই বিষয়টো সন্দৰ্ভত ৰাজনৈতিক অভিযোগ আৰু প্ৰতি অভিযোগ আৰম্ভ হৈছে ৷ এই ঘটনাৰ পিচত ৰাজনৈতিক নেতাসকলে ভুক্তভোগী পৰিয়ালক সাক্ষাৎ অব্যাহত ৰাখিছে ৷
ৱৰ্লি বিধান সভা সমষ্টিৰ বিধায়ক আদিত্য থাকৰেই ভুক্তভোগী পৰিয়ালক সাক্ষাৎ কৰে ৷ এই সময়ত আদিত্য থাকৰেই সংবাদ মাধ্যমৰ আগত কয়, ‘এই ঘটনা অতি গুৰুতৰ ৷ আৰক্ষীয়ে অভিযুক্তক আটক তেওঁৰ বিৰুদ্ধে কঠোৰ ব্যৱস্থা ল’ব লাগে ৷ এই ক্ষেত্ৰত কোনো ৰাজনৈতিক হস্তক্ষেপ নোহোৱাকৈ আৰক্ষীয়ে নিৰপেক্ষ তদন্ত চলাব লাগে ৷ কোনেও উচ্চপদস্থ বিষয়াক ফোন কৰিব নালাগে ৷ এই ঘটনাক লৈ আমি ৰাজনীতি কৰা নাই ৷"
এই চৰকাৰে অন্যায়ৰ বলি হোৱা সকলক ন্যায় প্ৰদান কৰিব বুলি মন্তব্য কৰিছে মুখ্যমন্ত্ৰী একনাথ সিন্দেই ৷ শিৱসেনাৰ কৰ্মী হ'লেও ব্যৱস্থা লোৱা হ'ব বুলি কয় তেওঁ ৷ সিন্দেই কয় যে আইনৰ আগত সকলো সমান ৷ গতিকে এই ঘটনাত দোষীক সুকীয়াকৈ ন্যায় প্ৰদান কৰা নহ’ব ৷ যি হ’ব সেয়া আইনগতভাৱে কৰা হ’ব ৷ কাকো ৰেহাই দিয়া নহ’ব ৷ লগতে ৱৰ্লিৰ হিট এণ্ড ৰাণ কাণ্ডটো অতি দুৰ্ভাগ্যজনক আৰু দুখজনক বুলি আখ্যা দিয়ে তেওঁ ৷
লগতে পঢ়ক : হিট্ এণ্ড ৰাণ : যোৰহাটৰ শোকাৱহ পথ দুৰ্ঘটনাত প্ৰাণ হেৰুৱালে দুজনে - HIT AND RUN CASE
