নিউজ ডেস্ক, ৩১ আগষ্ট: হাৰিয়ানাৰ চৰখী দাদৰী জিলাত গো-মাংস ভক্ষণ কৰাৰ সন্দেহ দুজন প্ৰব্ৰজিত শ্ৰমিকক নিৰ্মমভাৱে প্ৰহাৰ কৰাৰ অভিযোগ উত্থাপন হৈছে ৷ এই ঘটনাত এজন শ্ৰমিক নিহত হোৱাৰ লগতে আন এজন শ্ৰমিক গুৰুতৰভাৱে আহত হয় ৷ আহত শ্ৰমিকজন বৰপেটাৰ নিবাসী আছিৰুদ্দিন বুলি চিনাক্ত কৰা হৈছে ৷ আনহাতে নিহত শ্ৰমিকজন পশ্চিমবংগৰ ছাবিৰ মালিক বুলি জানিব পৰা হৈছে ৷
এজন জ্যেষ্ঠ আৰক্ষী বিষয়াই জানিবলৈ দিয়া মতে, ২৭ আগষ্টত সংঘটিত হৈছিল এই ঘটনা ৷ অসমৰ বৰপেটাৰ বাসিন্দা সুজাউদ্দিন চৰ্দাৰে এই সন্দৰ্ভত স্থানীয় আৰক্ষী চকীত এজাহাৰ দাখিল কৰাৰ পাছত সমগ্ৰ ঘটনা পোহৰলৈ আহে ৷ সুজাউদ্দিনে এজাহাৰত উল্লেখ কৰা মতে, তেওঁ বধৰা গাঁৱৰ এটা বস্তিত বাস কৰে আৰু জাবৰ সংগ্ৰাহক হিচাপে কাম কৰে । তেওঁৰ ভগ্নী ছাকিনা চৰ্দাৰো স্বামী ছাবিৰ মালিকৰ সৈতে তাতেই থাকে ।
এজাহাৰত লগতে উল্লেখ কৰা অনুসৰি, কলকাতাৰ প্ৰব্ৰজিত শ্ৰমিক ছাবিৰ মালিকৰ ওচৰলৈ কেইজনমান যুৱকে তেওঁক জাবৰ সংগ্ৰহ কৰাৰ চলেৰে বাছষ্টেণ্ডলৈ মাতি নিয়ে । ছাবিৰৰ লগতে বৰপেটা নিবাসী আছিৰুদ্দিনকো সেই স্থানলৈ মাতি অনা হৈছিল । তেওঁলোক সেই স্থানত উপস্থিত হোৱাৰ পাচত ৪-৫জনীয়া যুৱকৰ দলে তেওঁলোকক মাৰপিট কৰি মটৰ চাইকেলেৰে কোনো অজ্ঞাত স্থানলৈ লৈ যায় ।
ইয়াৰ পিছত ছাবিৰ মালিক আৰু আছিৰুদ্দিনক লাঠিৰে নিৰ্মমভাৱে প্ৰহাৰ কৰা হয় ৷ এই ঘটনাৰ এটা ভিডিঅ’ও পোহৰলৈ আহিছে । আক্ৰমণকাৰীকেইটাক গোৰক্ষক গোটৰ সদস্য হিচাপে চিনাক্ত কৰা হৈছে । এই ঘটনাত ছাবিৰ মালিকৰ মৃত্যু হোৱাৰ বিপৰীতে আছিৰুদ্দিন গুৰুতৰভাৱে আহত হয় ।
সুজাউদ্দিন চৰ্দাৰৰ এজাহাৰৰ ভিত্তিত আৰক্ষীয়ে ঘটনাৰ তদন্ত অব্যাহত ৰাখি দুই নাবালকসহ মুঠ ৭টা অভিযুক্তক গ্ৰেপ্তাৰ কৰিছে । আৰক্ষীয়ে জনোৱা মতে, ভাৰতীয় ন্যায় সংহিতাৰ বিধান অনুসৰি অভিযুক্তৰ বিৰুদ্ধে গোচৰ ৰুজু কৰা হৈছে ।
