নেশ্যনেল ডেস্ক,৪ এপ্ৰিল : উত্তৰ-পূৱৰ ৰাজ্য মেঘালয়ত তীব্ৰ উত্তেজনা অব্যাহত আছে । শেহতীয়াকৈ দুজন লোকৰ হত্যাক লৈ ৰাজ্যখনত অস্থিৰতাই বিৰাজ কৰিছে । খাচী আৰু জয়ন্তীয়া পাহাৰত প্ৰশাসনে হাই এলাৰ্ট জাৰি কৰিছে । যোৱা সপ্তাহত, খাচী ছাত্ৰ সন্থাই (কেএছইউ) সীমান্ত অঞ্চলত CAA বিৰোধী প্ৰতিবাদ সাব্যস্ত কৰিছিল । তাৰ পিচত পূব খাচী পাহাৰ জিলাৰ ভাৰত-বাংলাদেশ আন্তঃৰাষ্ট্ৰীয় সীমান্তৰ সমীপৰ ইচামাটি অঞ্চলত দুয়োজন লোকক মৃত অৱস্থাত পোৱা গৈছিল ।
আৰক্ষী অধীক্ষক ঋতুৰাজ ৰবিয়ে কোৱা মতে কেএছইউৰ দুজন সদস্যক চোহৰা চহৰৰ ঘৰৰ পৰা আটক কৰি অনা হৈছে আৰু পিচত হত্যাকাণ্ডত জড়িত থকাৰ অভিযোগত গ্ৰেপ্তাৰ কৰা হৈছে । ইফালে আৰক্ষীৰ এনে কাৰ্যকলাপৰ প্ৰতিবাদত বুধবাৰে স্থানীয় আৰক্ষী থানাৰ সন্মুখত কেএছইউৰ নেতৃত্বত এক বৃহৎ প্ৰতিবাদী কাৰ্যসূচী ৰূপায়ণ কৰা হয় আৰু তেওঁলোকৰ সদস্যক উগ্ৰপন্থীৰ দৰে ব্যৱহাৰ নকৰিবলৈ দাবী জনাইছে ।
আন এক ঘটনাত শ্বিলঙৰ মাওলাই আৰক্ষী থানাত অচিনাক্ত ব্যক্তিয়ে পেট্ৰ'ল বোমা নিক্ষেপ কৰাৰ পিচত আৰক্ষীৰ এখন বাহন ধ্বংসপ্ৰাপ্ত হয় । অৱশ্যে আৰক্ষীয়ে এই সন্দৰ্ভত এতিয়ালৈকে কোনো লোকক গ্ৰেপ্তাৰ কৰা নাই । এনে ঘটনাৰ পৰিপ্ৰেক্ষিতত আৰক্ষীৰ উপ মহাপৰিদৰ্শক ডিএনআৰ মাৰাকে পূব সীমান্তৰ ৭ খন জিলাৰ আৰক্ষী অধীক্ষকসকললৈ সতৰ্কবাণী জাৰি কৰে । য'ত ৰাজ্যৰ ৰাজধানী শ্বিলঙো অন্তৰ্ভুক্ত আছে ।
মাৰাকে নিৰ্দেশটোত কয় যে বেচৰকাৰী সংগঠনসমূহে অধিক আন্দোলন কৰাৰ সম্ভাৱনা অধিক আৰু আৰক্ষী থানা/আৰক্ষীৰ বাহন, চৰকাৰী সম্পত্তি/ভৱন আৰু বাহনক লক্ষ্য কৰি ল'ব পাৰে আৰু লগতে অ-জনজাতীয় লোকসকলক লক্ষ্য কৰি ল'ব পাৰে ।
তেওঁ কয় যে প্ৰভাৱশালী কেএছইউয়ে ৪ এপ্ৰিলক 'খাচী জাগৰণ দিৱস' হিচাপে পালন কৰি আছে, কিন্তু পূব জয়ন্তীয়া পাহাৰ জিলাৰ খলিহৰিয়াত ইয়াৰ বাবে অনুমতি দিয়া হোৱা নাই । ১৪৪ চিআৰপিচি ধাৰাৰ অধীনত নিষিদ্ধ আদেশ জাৰি কৰিবলৈ উপায়ুক্তসকলক পৰামৰ্শ দিয়াৰ দৰে সতৰ্কতামূলক ব্যৱস্থা গ্ৰহণ কৰিবলৈ তেওঁ নিৰ্দেশ দিছে ।
লগতে পঢ়ক : কেৰালাৰ দম্পতী আৰু বান্ধৱীক মৃত অৱস্থাত উদ্ধাৰ অৰুণাচলত - KERALA PERSONS DEATH IN ARUNACHAL
