নেশ্যনেল ডেস্ক, 10 আগষ্ট : পশ্চিমবংগৰ মুখ্যমন্ত্ৰী মমতা বেনাৰ্জীয়ে দেওবাৰে কয় যে ৰাজ্য চৰকাৰে চৰকাৰী মালিকানাধীন আৰ জি কৰ চিকিৎসা মহাবিদ্যালয় আৰু চিকিৎসালয়ত এগৰাকী স্নাতকোত্তৰ প্ৰশিক্ষাৰ্থী চিকিৎসকক ধৰ্ষণ আৰু হত্যাৰ অভিযোগত অভিযুক্তৰ বিৰুদ্ধে মৃত্যুদণ্ড বিচাৰিব ৷ মুখ্যমন্ত্ৰীগৰাকীয়ে জনোৱা মতে, তেখেতে বিষয়াসকলক এই গোচৰৰ বিচাৰ ফাষ্ট ট্ৰেক আদালতত হোৱাটো নিশ্চিত কৰিবলৈ কয় ৷ শুকুৰবাৰে উত্তৰ কলকাতাৰ চিকিৎসালয়খনৰ চেমিনাৰ হলত উদ্ধাৰ হয় চিকিৎসা বিজ্ঞানৰ ছাত্ৰীগৰাকীৰ মৃতদেহ ৷ প্ৰাথমিক মৰণোত্তৰ পৰীক্ষাৰ প্ৰতিবেদনৰ ইংগিত অনুসৰি মহিলা চিকিৎসকগৰাকীক হত্যা কৰাৰ পূৰ্বে যৌন নিৰ্যাতনৰ বলি হৈছিল ৷
অভিযুক্তক দৃষ্টান্তমূলক শাস্তি প্ৰদানৰ দাবীত কনিষ্ঠ চিকিৎসকৰ প্ৰতিবাদ আৰু সমদলকো ন্যায্যতা প্ৰদান কৰে মুখ্যমন্ত্ৰীয়ে ৷ বাংলা নিউজ চেনেলৰ সৈতে হোৱা এক সাক্ষাৎকাৰত মুখ্যমন্ত্ৰীগৰাকীয়ে কয় যে কনিষ্ঠ চিকিৎসকসকলে যি দাবী উত্থাপন কৰিছে তাক তেওঁ সমৰ্থন কৰে ৷ মমতা বেনাৰ্জীয়ে লগতে কয় যে প্ৰয়োজন সাপেক্ষে কেন্দ্ৰীয় তদন্তকাৰী সংস্থা (CBI)কে ধৰি কোনো সংস্থাই গোচৰৰ তদন্ত কৰিলে পশ্চিম বংগ চৰকাৰে আপত্তি নকৰে ৷
এই ঘটনাক ভয়ংকৰ আৰু ঘৃণনীয় বুলি অভিহিত কৰি মুখ্যমন্ত্ৰী মমতা বেনাৰ্জীয়ে কনিষ্ঠ চিকিৎসকসকলক স্বাস্থ্যসেৱা অব্যাহত ৰাখিবলৈ আৰু সমান্তৰালভাৱে প্ৰতিবাদ সাব্যস্ত কৰিবলৈ আহ্বান জনায় ৷ ইয়াৰ পূৰ্বে কলকাতা আৰক্ষী আয়ুক্ত বিনীত গোৱেলে কয় যে দোষী সাব্যস্ত হ’লে অভিযুক্তই সৰ্বোচ্চ শাস্তি পোৱাটো আৰক্ষীয়ে নিশ্চিত কৰিব ৷
ইফালে কলকাতাৰ আৰ জি কৰ মেডিকেল কলেজ এণ্ড হাস্পতালৰ মহিলা প্ৰশিক্ষাৰ্থী চিকিৎসকগৰাকীৰ মৃত্যুত পশ্চিম বংগত ৰাজনৈতিক ধুমুহাৰ সৃষ্টি হৈছে ৷ আৰক্ষীয়ে এই গোচৰত এজন ব্যক্তিক গ্ৰেপ্তাৰ কৰিছে বুলি জানিব পৰা গৈছে ৷
শনিবাৰে এজন জ্যেষ্ঠ আৰক্ষী বিষয়াই জনোৱা মতে, চৰকাৰী চিকিৎসা মহাবিদ্যালয়খনৰ মহিলা স্নাতকোত্তৰ প্ৰশিক্ষাৰ্থী চিকিৎসকগৰাকীৰ হত্যাকাণ্ডত জড়িত থকাৰ অভিযোগত এজন লোকক গ্ৰেপ্তাৰ কৰিছে ৷ সংবাদ সংস্থা পি টি আই (PTI)ৰ উদ্ধৃতিৰে বিষয়াগৰাকীৰ উদ্ধৃতিৰে প্ৰকাশ কৰা অনুসৰি লোকজন এজন বাহিৰৰ লোক আছিল আৰু চিকিৎসালয়খনৰ বিভিন্ন বিভাগত বিনামূলীয়াকৈ প্ৰৱেশ কৰিব পাৰিছিল ৷
লগতে পঢ়ক : 850 কোটি টকা মূল্যৰ কেলিফৰ্ণিয়ামসহ গ্ৰেপ্তাৰ তিনি সৰবৰাহকাৰী - Radioactive metal Californium
ঘটনাৰ তদন্তৰ বাবে কলকাতা আৰক্ষীৰ চোৰাংচোৱা বিভাগে বিশেষ তদন্তকাৰী দল গঠন কৰিছে ৷ এই SIT ৰ নেতৃত্বত আছে কলকাতা আৰক্ষীৰ অতিৰিক্ত অধীক্ষক পদৰ এজন আৰক্ষী বিষয়া ৷ গ্ৰেপ্তাৰ অভিযুক্তৰ বিষয়ে অধিক জানবলৈ দি আৰক্ষীয়ে কয় যে তেওঁলোকে এটা ব্লুটুথ ইয়াৰফোনৰ এটা ফাটি যোৱা অংশ উদ্ধাৰ কৰে ৷ যাৰ দ্বাৰা অপৰাধীৰ কাষ চপাত সহদ হৈছিল ৷ দৰাচলতে আন পি জি টি আৰু মহিলা চিকিৎসকেও চিকিৎসালয় চৌহদৰ অন্যান্য প্ৰান্তৰ পৰা সংগ্ৰহ কৰা চি চি টিভি ফুটেজৰ পৰা দোষীক চিনাক্ত কৰিছে বুলি আৰক্ষী বিভাগৰ এক সূত্ৰই প্ৰকাশ কৰিছে ৷ আৰক্ষী বিষয়াসকলে দাবী কৰে যে ধৃত অভিযুক্তই সোধা-পোছাৰ সময়ত বিভিন্ন ধৰণৰ বক্তব্য দিছিল ৷
বি এন এছৰ 64 (ধৰ্ষণ) আৰু 103 (হত্যা) ধাৰাত অভিযুক্তক 14 দিনৰ বাবে আৰক্ষীৰ ৰিমাণ্ডৰ নিৰ্দেশ দিয়ে চহৰৰ আদালতে ৷ এই অপৰাধৰ সৈতে জড়িত অধিক সোধা-পোছাৰ বাবে 23 আগষ্টলৈকে 14 দিনৰ আৰক্ষীৰ ৰিমাণ্ডৰ বাবে বিচাৰ বিভাগৰ অনুৰোধ মঞ্জুৰ কৰে ন্যায়াধীশগৰাকীয়ে ৷ চিকিৎসকগৰাকীৰ মৃত্যুৰ তদন্ত চলি থকাৰ সন্দৰ্ভত আৰক্ষীয়ে শুকুৰবাৰে নিশা দুজন ইন্টাৰ্ণ চিকিৎসককো সোধা-পোছা কৰিছে বুলিও তেওঁ কয় ৷
শুকুৰবাৰে কলকাতাৰ চৰকাৰী চিকিৎসালয়খনৰ চেমিনাৰ হলৰ ভিতৰত এগৰাকী মহিলা স্নাতকোত্তৰ প্ৰশিক্ষাৰ্থী (PGT) চিকিৎসকৰ অৰ্ধনগ্ন মৃতদেহ উদ্ধাৰ হয় ৷ বৃহস্পতিবাৰে নিশা কৰ্তব্যৰত আছিল দ্বিতীয় বৰ্ষৰ ছাত্ৰীগৰাকী ৷ মৃতদেহত আঘাতৰ চিন আছিল ৷ পিতৃয়ে কৰ মেডিকেল কলেজ এণ্ড হাস্পতালৰ ভিতৰতে ছাত্ৰীগৰাকীক ধৰ্ষণ কৰি হত্যা কৰাৰ অভিযোগ উত্থাপন কৰিছিল আৰু লগতে এই ঘটনাৰ সত্য লুকুৱাবলৈ চেষ্টা অব্যাহত আছে বুলি অভিযোগ কৰিছিল ৷ আৰক্ষীয়ে জনোৱা মতে, প্ৰাথমিক মৰণোত্তৰ পৰীক্ষাৰ প্ৰতিবেদনত মহিলা চিকিৎসকগৰাকীক হত্যা কৰাৰ পূৰ্বে যৌন নিৰ্যাতন চলোৱাৰ কথা নিশ্চিত কৰা হৈছে ৷
লগতে পঢ়ক : চিকিৎসা মহাবিদ্যালয়ৰ শিক্ষাৰ্থীক ধৰ্ষণ: দেশজুৰি প্ৰতিবাদ - Kolkata PGT Doctor rape
