নিউজ ডেস্ক, ১০ ছেপ্টেম্বৰ : ইণ্ডিয়ান এয়াৰলাইন্সৰ বিমান ৮১৪ অপহৰণৰ দুটা দশকৰো অধিক সময়ৰ পাচত পুনৰ বাতৰিৰ শিৰোনামলৈ আহিছে । কাৰণ এই ঘটনাৰ আধাৰত জনপ্ৰিয় অ’টিটি প্লেটফৰ্ম নেটফ্লিক্সত শেহতীয়াকৈ মুক্তি পাইছে এখন ৱেব ছিৰিজ । অনুভৱ সিনহাৰ পৰিচালনাত নিৰ্মিত আইচি ৮১৪-কান্দাহাৰ হাইজেক ৱেব ছিৰিজত মুখ্য চৰিত্ৰত অভিনয় কৰিছে বিজয় বাৰ্মা, নাছিৰুদ্দিন শ্বাহ, পংকজ কাপুৰ, অৰবিন্দ স্বামী আৰু দিয়া মিৰ্জাই ।
ভাৰতৰ ইতিহাসৰ আটাইতকৈ দীৰ্ঘদিনীয়া বিমান অপহৰণৰ লগত জড়িত অপহৰণকাৰীক চিত্ৰিত কৰা ছবিখনে বিতৰ্কৰ সৃষ্টি কৰিছে । কাঠমাণ্ডুৰ পৰা নতুন দিল্লীলৈ অহা আই চি ৮১৪ বিমানখন ভাৰতীয় আকাশমাৰ্গত প্ৰৱেশ কৰাৰ লগে লগে অপহৰণ কৰি অমৃতসৰ, লাহোৰ, ডুবাইকে ধৰি বিভিন্ন স্থানলৈ লৈ যোৱা হয় । অৱশেষত বিমানখন তেতিয়াৰ তালিবান শাসিত আফগানিস্তানৰ কান্দাহাৰত অৱতৰণ কৰোৱা হয় ।
অৱশ্যে ৮ দিনৰ দীঘলীয়া সময়ৰ অন্তত ভাৰতে পণবন্দীসকলৰ বিনিময়ত তিনিজন সন্ত্ৰাসবাদী– আহমেদ ওমৰ ছাইদ শ্বেখ, মাছুদ আজহাৰ আৰু মুস্তাক আহমেদ জাৰগাৰক মুকলি কৰি দিবলৈ অপহৰণকাৰীৰ দাবী মানি লৈছিল । মুক্তি পোৱা সন্ত্ৰাসবাদীসকলৰ ভিতৰত অন্যতম মাছুদ আজহাৰে পৰৱৰ্তী সময়ত ২০১৯ চনৰ পুলৱামা আক্ৰমণকে ধৰি ভাৰতৰ ওপৰত কেইবাটাও আক্ৰমণৰ ষড়যন্ত্ৰৰ অভিযোগ উত্থাপন কৰা সন্ত্ৰাসবাদী সংগঠন জয়ছ-ই-মহম্মদ গঠন কৰে ।
- বিমানখনত ১৭৬ জন যাত্ৰী আছিল
উল্লেখ্য যে, ১৯৯৯ চনত অপহৰণ কৰা এই বিমানখনত মুঠ ১৭৬ জন যাত্ৰী আছিল । কিছুমান হাই প্ৰফাইল যাত্ৰীও আছিল এই বিমানখনত । বিশ্বাস কৰা হয় যে বিমানখনত এজন ভিআইপি যাত্ৰীৰ উপস্থিতিয়ে ভাৰতৰ ওপৰত আন্তঃৰাষ্ট্ৰীয় হেঁচা বৃদ্ধি কৰাত ডাঙৰ ভূমিকা পালন কৰিছিল । এই যাত্ৰীজনৰ নাম আছিল ৰবাৰ্ট’ জিঅ’ৰী ।
এনে পৰিস্থিতিত প্ৰশ্ন উত্থাপন হয় যে ৰবাৰ্ট’ জিঅ’ৰী কোন আৰু কি কাৰণত ভাৰত আন্তঃৰাষ্ট্ৰীয় চাপৰ সন্মুখীন হৈছিল ? গতিকে ৰবাৰ্ট’ জিঅ’ৰীৰ বিষয়ে জানো আহক-
- ৰবাৰ্ট’ জিঅ’ৰী কোন ?
ৰবাৰ্ট জিঅ’ৰী এজন ছুইজাৰলেণ্ড-ইটালীয় ব্যৱসায়ী । সেই সময়ত ৰবাৰ্ট জিঅ’ৰী আছিল ডি লা ৰু কোম্পানীৰ মালিক । এইটো আছিল ব্ৰিটেইনৰ এটা কোম্পানী, যিয়ে বিশ্বৰ মুদ্ৰা ছপাৰ ব্যৱসায়ৰ ৯০ শতাংশ নিয়ন্ত্ৰণ কৰিছিল । ২০০০ চনত প্ৰকাশিত টাইমৰ প্ৰতিবেদন অনুসৰি জিঅ’ৰীয়ে কাঠমাণ্ডুৰ পৰা অৱসৰ সময় কটাই উভতি আহিছিল তেওঁৰ সংগী ক্ৰীষ্টিনা কেলাব্ৰেসীৰ সৈতে ।
- জিঅ’ৰী আছিল ছুইজাৰলেণ্ডৰ আটাইতকৈ ধনী ব্যক্তি
টাইমৰ বাতৰি অনুসৰি জিঅ’ৰী সেই সময়ত ছুইজাৰলেণ্ডৰ অন্যতম ধনী ব্যক্তি আছিল । প্ৰতিবেদনত কোৱা হৈছে যে ইণ্ডিয়ান এয়াৰলাইন্সৰ বিমান ৮১৪ ৰ আঠ দিনীয়া অপহৰণ কালত এটা সময়ত অপহৰণকাৰীয়ে ভাৰত চৰকাৰৰ পৰা ২০ কোটি ডলাৰ দাবী কৰিছিল । ইকনমি ক্লাছত বহি থকা পণবন্দীসকলৰ এজনে যে সহজেই সেই ধনৰ চেক দিব পাৰে তাৰ কোনো ধাৰণা নাছিল অপহৰণকাৰীৰ ।
বিমানখনত জিঅ’ৰীৰ উপস্থিতিয়ে ভাৰত চৰকাৰৰ ওপৰত হেঁচা বৃদ্ধি কৰাৰ কথা আছিল ৷ কিয়নো ছুইজাৰলেণ্ডে তেওঁক শীঘ্ৰে মুক্তিৰ সুবিধাৰ বাবে গোপনে কান্দাহাৰলৈ বিশেষ কনভয় প্ৰেৰণ কৰিছিল ।
- ডি লা ৰুই কি কাম কৰে ?
ডি লা ৰু হৈছে মুদ্ৰা নোট প্ৰিন্ট কৰা আৰু বিশ্বৰ কেন্দ্ৰীয় বেংকসমূহক যোগান ধৰাৰ বাবে বেংক নোটত ব্যৱহৃত নিৰাপত্তা থ্ৰেড আৰু নিৰাপত্তা হ’ল’গ্ৰামৰ দৰে বৈশিষ্ট্য উৎপাদনৰ ব্যৱসায়ত এক বিশ্বব্যাপী প্ৰতিষ্ঠান । এই প্ৰতিষ্ঠানটোৱে ২০১৬ চনলৈকে ভাৰতলৈ এই সামগ্ৰীসমূহৰ প্ৰধান যোগানকাৰী আছিল ।
