জম্মু: দেশৰ ভিন্ন প্ৰান্তত হিন্দু ধৰ্মৰ মহিলাসকলে সোমবাৰে পালন কৰিলে কৰৱা চৌথ ৷ স্বামীৰ দীৰ্ঘায়ু কামনা কৰি এই দিনটোত ব্ৰত ৰাখে পত্নীসকলে, সন্ধিয়া জোনৰ মুখ দেখা লগে লগে স্বামীয়ে তেওঁলোকৰ ব্ৰত ভংগ কৰাব লাগে ৷ বিশেষকৈ উত্তৰ ভাৰতত এই পৰম্পৰাক অতি ভক্তিভাৱেৰে পালন কৰা হয় ৷
কিন্তু শশীভূষণৰ পৰিয়ালৰ বাবে কৰৱা চৌথ হৈ পৰিল গোটেই জীৱনৰ বাবে এক দুখৰ দিন ৷ স্বামীৰ মংগল চিন্তা কৰি কৰৱা চৌথৰ ব্ৰত ৰখাৰ যো-জা চলাওঁতেই সকলো শেষ হৈ গ’ল ৷
পত্নী ৰুচিয়ে শশীক ফোন কৰি কৈছিল, কৰৱা চৌথৰ ব্ৰত ৰখাৰ বাবে যোগাৰ চলোৱাৰ কথা ৷ শশী সেই সময়ত আছিল কৰ্মস্থলীত ৷ ৰুচিয়ে যেনে-তেনে স্বামীক ঘৰলৈ আহিবলৈ অনুৰোধ জনাইছিল, যাতে স্বামীয়ে তেওঁৰ ব্ৰত ভাঙিব পাৰে ৷ কিন্তু ৰুচিৰ ব্ৰত ভঙা নহ’ল ! তাৰ পূৰ্বেই পৰিয়ালে লাভ কৰিলে অনাকংক্ষিত এটা খবৰ... শশী ঘৰলৈ আহিল ঠিকেই, কিন্তু পত্নী ৰুচিৰ ব্ৰত ভাঙিব নোৱাৰিলে ৷
বগা কাপোৰেৰে মেৰিয়াই থোৱা শশীৰ নিথৰ দেহটোত তেতিয়ালৈ চাগৈ তেজবোৰ গোট মাৰি হিমচেঁচা হৈ পৰিছিল ৷ পত্নীয়ে মাতিছিল, কিন্তু সেইবুলি এনেকৈ আহিব লাগেনে ? শশীৰ দীৰ্ঘায়ুৰ বাবেইটো ৰুচিয়ে কৰৱা চৌথৰ ব্ৰত ৰখা যো-জা চলাইছিল ৷ তেন্তে ঈশ্বৰেনো ৰুচিৰ আহ্বান কিয় নুশুনিলে ? কিয় কপাল উকা কৰি কাঢ়ি নিলে শশীক ? হিয়া ঢাকুৰি কান্দিলেও ৰুচিৰ ব্ৰত ভাঙিবলৈ শশী আৰু নাই ৷ এই প্ৰশ্নবোৰৰ উত্তৰো ৰুচিক কোনেও দিব নোৱাৰে ৷
জম্মুৰ গান্দেৰৱাল জিলাৰ গগণগিৰ অঞ্চলত নিৰ্মীয়মান এটা সুৰংগত সন্ত্ৰাসবাদীৰ আক্ৰমণত নিহত হৈছিল সাতগৰাকীকৈ কৰ্মচাৰী ৷ তাৰ ভিতৰত এজন আছিল শশীভূষণ আব্ৰল ৷ আৰ্কিটেক্ট তথা পৰিয়ালৰ একমাত্ৰ উপাৰ্জনকাৰী শশী আব্ৰল কৰ্মনিষ্ঠাৰ বাবে পৰিচিত আছিল আৰু কাশ্মীৰত থকাৰ সময়ত কেতিয়াও ভয় প্ৰকাশ কৰা নাছিল । এই আক্ৰমণৰ মাত্ৰ কেইঘণ্টামান পূৰ্বে পত্নী ৰুচিয়ে তেওঁৰ সৈতে কথা পাতিছিল, কৰৱা চৌথ উদযাপনৰ বাবে প্ৰস্তুতি চলাইছিল । গোটেই ৰাতিটো ৰৈ থাকি শশীৰ নিৰাপত্তাৰ বাবে প্ৰাৰ্থনা কৰিছিল ৰুচিয়ে, কিন্তু শেষত ভয়ংকৰ খবৰটোহে আহিল ৷
সন্ত্ৰাসবাদীৰ এই জঘন্য কাণ্ডক সকলোৱে ধিক্কাৰ দিছে ৷ সোমবাৰে জম্মু-কাশ্মীৰৰ উপ-ৰাজ্যপাল মনোজ সিনহাই গান্দেৰৱাল জিলাত সংঘটিত সন্ত্ৰাসবাদীৰ আক্ৰমণত নিহত হোৱা শশী আব্ৰলৰ পৰিয়ালক সাক্ষাৎ কৰে । তেওঁ আব্ৰলৰ আত্মীয়ক সান্ত্বনা দিয়ে ।
গান্দেৰৱালত সন্ত্ৰাসবাদী আক্ৰমণ; ঘটনাস্থলীত এনআইএৰ দল উপস্থিত
