নিউজ ডেস্ক, ৬ জুন : ৰাষ্ট্ৰপতিক আনুষ্ঠানিকভাৱে এন ডি এয়ে চৰকাৰ গঠনৰ বাবে দাবী জনোৱাৰ পিচত দেশে পুনৰবাৰ নৰেন্দ্ৰ মোদীক প্ৰধানমন্ত্ৰী হিচাপে লাভ কৰিবলৈ গৈ আছে । সকলো ঠিকে থাকিলে চলিত সপ্তাহৰ অন্তিম দিনটোত নৰেন্দ্ৰ মোদীয়ে তৃতীয়টো কাৰ্যকালৰ বাবে প্ৰধানমন্ত্ৰী হিচাপে শপত গ্ৰহণৰ সম্ভাৱনা আছে ।
এই শপত গ্ৰহণ অনুষ্ঠানলৈ শ্ৰীলংকা আৰু বাংলাদেশকে ধৰি ভাৰতৰ কেইবাখনো চুবুৰীয়া দেশৰ ৰাষ্ট্ৰনেতাক আমন্ত্ৰণ জনোৱাৰ সম্ভাৱনা আছে বুলি সূত্ৰত প্ৰকাশ।
উল্লেখ্য, ভাৰতীয় জনতা পাৰ্টী নেতৃত্বাধীন ৰাষ্ট্ৰীয় গণতান্ত্ৰিক মিত্ৰজোঁটে (এন ডি এ) লোকসভা নিৰ্বাচনত ২৯৩ খন আসন লাভ কৰাৰ পিচত মোদীয়ে একেৰাহে তৃতীয়বাৰৰ বাবে প্ৰধানমন্ত্ৰী হিচাপে দায়িত্ব ল'বলৈ সাজু হৈছে । আনহাতে, এক ভিতৰুৱা সূত্ৰ মতে, মোদীৰ শপত গ্ৰহণ অনুষ্ঠানলৈ আমন্ত্ৰণ জনাবলগীয়া বিদেশী নেতাসকলৰ ভিতৰত বাংলাদেশ, শ্ৰীলংকা, ভূটান, নেপাল আৰু মৰিচাছৰ শীৰ্ষ নেতাসকল উপস্থিত থকাৰ সম্ভাৱনা আছে ।
ইফালে শ্ৰীলংকাৰ ৰাষ্ট্ৰপতি ৰণিল বিক্ৰমসিংহেৰ কাৰ্যালয়ৰ মিডিয়া বিভাগে কৈছে যে মোদীয়ে তেওঁক শপত গ্ৰহণ অনুষ্ঠানলৈ আমন্ত্ৰণ জনাইছে । লগতে কৈছে যে বিক্ৰমসিংহেয়ে এই আমন্ত্ৰণ গ্ৰহণ কৰিছে আৰু মোদীক বিজয়ৰ বাবে ফোনযোগে অভিনন্দন জনাইছে ।
"বাৰ্তালাপৰ সময়ত প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰপতি বিক্ৰমসিংহেক তেওঁৰ শপত গ্ৰহণ অনুষ্ঠানলৈ আমন্ত্ৰণ জনায়, যিটো ৰাষ্ট্ৰপতিয়ে গ্ৰহণ কৰে ।" ৰাষ্ট্ৰপতি কাৰ্যালয়ে এনেদৰে কয় ।
