নেশ্যনেল ডেস্ক,১৫ এপ্ৰিল : অহা ১৯ এপ্ৰিলৰ পৰা দেশত লোকসভা নিৰ্বাচন অনুষ্ঠিত হ'ব । তাৰ প্ৰাকক্ষণত নিৰ্বাচন আয়োগৰ ফ্লায়িং স্কোৱাডৰ অভিযান অব্যাহত আছে । এই অভিযানৰ মাজতে বিভিন্ন সংস্থাই দেশত কোটি কোটি টকা উদ্ধাৰ কৰিছে । প্ৰথম পৰ্যায়ৰ নিৰ্বাচনৰ পূৰ্বে ইতিমধ্যে ধন জব্দৰ সকলো অভিলেখ ভংগ হৈছে । সংস্থাসমূহে দেশৰ ভিন্ন প্ৰান্তৰ পৰা এতিয়ালৈ ৪৬৫০ কোটি টকা জব্দ কৰিবলৈ সক্ষম হৈছে ।
২০১৯ চনৰ লোকসভা নিৰ্বাচনৰ সময়ত জব্দ হৈছিল ৩৪৭৫ কোটি টকা । তাৎপৰ্যপূৰ্ণভাৱে, জব্দ হোৱা ধনৰ ৪৫ শতাংশ ড্ৰাগছ আৰু নিচাজাতীয় সামগ্ৰীৰ ।
নিৰ্বাচন আয়োগৰ তথ্য অনুসৰি ৰাজ্যসমূহৰ ভিতৰত ৰাজস্থানত সৰ্বাধিক ৭৭৮.৫২ কোটি টকাৰ নগদ ধন আৰু সামগ্ৰী জব্দ হৈছে । তাৰ পিচত গুজৰাটত ৬০৫.৩৫ কোটি টকাৰ, তামিলনাডুত ৪৬০.৮৪ কোটি টকাৰ, মহাৰাষ্ট্ৰত ৪৩১.৩৪ কোটি টকাৰ, পাঞ্জাবত ৩১১.৮৪ কোটি টকাৰ, মহাৰাষ্ট্ৰত ২৮১.৪৩ কোটি টকাৰ আৰু নতুন দিল্লীৰ লগতে আন স্থানত ২৬ কোটি টকাৰ সামগ্ৰী জব্দ হৈছে ।
ইফালে বিভিন্ন ৰাজ্যত ড্ৰাগছ জব্দ হৈছে । গুজৰাটত সৰ্বাধিক ৪৮৫.৯৯ কোটি টকাৰ ড্ৰাগছ জব্দ হৈছে । তামিলনাডুত ২৯৩.০২ কোটি টকাৰ ড্ৰাগছ, পাঞ্জাবত ২৮০.৮১ কোটি টকাৰ, নতুন দিল্লী আৰু আন স্থানৰ পৰা ১৮৯.৯৪ কোটি টকাৰ ড্ৰাগছ জব্দ হৈছে । মুঠ ২০৬৮.৮৫ কোটি টকাৰ ড্ৰাগছ জব্দ হৈছে ।
সুৰাৰ ক্ষেত্ৰত, শীৰ্ষত আছে কৰ্ণাটক (১২৪.৩৩ কোটি) । পশ্চিমবংগত ৫১.১৭ কোটি টকা, ৰাজস্থান আৰু অন্যান্য স্থানত ৪০.৭৮ কোটি টকাৰ সুৰা জব্দ হৈছে । দেশত মুঠ ৪৮৯.৩১ কোটি টকাৰ সুৰা জব্দ হৈছে ।
দেশত ৩৯৫,৯৩ কোটি নগদ ধন জব্দ হৈছে । সৰ্বাধিক তামিলনাডুত ৫৩.৫৮ কোটি নগদ ধন জব্দ হৈছে । তাৰ পিচত তেলেংগানাত ৪৯.১৮ কোটি টকা, মহাৰাষ্ট্ৰত ৪০.০৫ কোটি টকা জব্দ হৈছে ।
১২ এপ্ৰিলত মুখ্য নিৰ্বাচন আয়ুক্ত ৰাজীৱ কুমাৰৰ নেতৃত্বত গৌণকুমাৰ আৰু সুখবীৰ সিং সান্ধুৰ নেতৃত্বত আয়োগে ১৯ এপ্ৰিলত নিৰ্বাচন অনুষ্ঠিত হ'বলগীয়া নিৰ্বাচনৰ প্ৰথম পৰ্যায়ত নিয়োজিত সকলো কেন্দ্ৰীয় পৰ্যবেক্ষকৰ পৰ্যালোচনা কৰে । প্ৰলোভন-মুক্ত নিৰ্বাচন অনুষ্ঠিত কৰাৰ বাবে নিৰ্বাচন আয়োগে সকলো পদক্ষেপ গ্ৰহণ কৰিছে ।
লগতে পঢ়ক :ৰাজ্যত সক্ৰিয় ফ্লায়িং স্কোৱাড; এই পৰ্যন্ত জব্দ 102 কোটি টকা - Lok Sabha Election 2024