নিউজ ডেস্ক, 19 জুন: পিতৃত্বৰ গৌৰৱেৰে গৌৰৱান্বিত হোৱাৰ বাবে থাকে কত যে সপোন ! সেই সপোনে যেতিয়া সাকাৰ ৰূপ লাভ কৰে, তেতিয়া পৃথিৱীৰ আটাইতকৈ সুখী মানুহজনেই হয় বিশেষ পুৰুষজন ৷ চিকিৎসালয়ৰ প্ৰসূতি কক্ষত যেতিয়া সন্তানসম্ভৱা পত্নী ভৰ্তি হৈ থাকে, বাহিৰত ৰৈ থকা পুৰুষজনৰ সমান উৎকণ্ঠা কাৰ থাকিব পাৰে ! যেতিয়াই শিশুটিয়ে পৃথিৱীলৈ আহি প্ৰথমবাৰৰ বাবে কান্দে, পিতৃৰ দুগালেৰে বৈ আহে সুখৰ চকুলো ৷
অধীৰ আগ্ৰহেৰে নিজ সন্তানক চাবলৈ ৰৈ থকা পিতৃয়ে যেতিয়া খবৰ পাই যে তেওঁৰ সদ্যোজাত সন্তান অসুবিধাৰ সন্মুখীন হৈছে, সেই মুহূৰ্তত পিতৃগৰাকীৰ সমান কষ্ট কৰিব পৰা লোক কোনো হ’ব নোৱাৰে ৷ অন্ধ্ৰপ্ৰদেশৰ এটা ভাইৰেল ভিডিঅ’ই চুই গৈছে প্ৰতিগৰাকী লোকৰ হৃদয় ৷ পিতৃ হোৱাৰ সুখ অনুভৱ কৰিব পৰা প্ৰতিগৰাকী লোকেই ভিডিঅ’টো চোৱাৰ পিচত হৈ পৰিছে আৱেগিক ৷
লগতে পঢ়ক: নিজহাতে 4 মহীয়া কন্যা সন্তানক হত্যা পিতৃৰ
ঘটনাটো বিশাখাপট্টনমৰ ৷ কিং জৰ্জ চিকিৎসালয়ৰ চৌহদত এগৰাকী পিতৃয়ে সদ্যোজাত সন্তানৰ জীৱন ৰক্ষাৰ বাবে কৰা কষ্টৰ এটা ভিডিঅ’ ভাইৰেল হৈ পৰিছে ৷ পিতৃগৰাকীৰ সন্তানটি জন্ম হৈছিল নিৰ্দিষ্ট সময়ৰ পূৰ্বেই ৷ পূৱ গোদাৱৰী জিলাৰ আল্লু চিৰিচা নামৰ এগৰাকী গৰ্ভৱতী মহিলাক মঙলবাৰে পৰিয়ালৰ সদস্যসকলে কিং জৰ্জ চিকিৎসালয়ৰ প্ৰসূতি ৱাৰ্ডত ভৰ্তি কৰোৱাইছিল । যিহেতু কেঁচুৱাটো অকালতে জন্ম হৈছিল, চিকিৎসকে পৰামৰ্শ দিছিল যে কেঁচুৱাটো শিশুৰ ৱাৰ্ডৰ সৈতে সংলগ্ন এন.আই.চি.ইউত ৰাখিব লাগে । শিশুটিক অক্সিজেন লগাই দিয়া হৈছিল এন আই চি ইউ কক্ষলৈ নিয়াৰ বাবে ৷
কিন্তু সেই সময়ত চিকিৎসালয়খনত নাছিল কোনো কৰ্মচাৰী ৷ সেয়ে শিশুটোৰ দেউতাকে অক্সিজেন চিলিণ্ডাৰটো কান্ধত লৈ নাৰ্ছৰ পিচে পিচে খোজকাঢ়ি গৈ থাকিবলগীয়া হয় ৷ সেই বিশেষ দৃশ্যটো কোনো লোকে বন্দী কৰিলে কমেৰাৰ লেন্সত ৷ পৰৱৰ্তী সময়ত ভাইৰেল হৈ পৰে ভিডিঅ’টো ৷ ইয়াৰ পিচতে চিকিৎসালয়ৰ চুপাৰভাইজাৰে চিকিৎসক আৰু কৰ্মচাৰীসকলক ফোন কৰি ধমকি দিয়ে ৷ লগে লগে নিৰ্দেশ দিয়া দিয়ে যাতে এনে ঘটনাৰ পুনৰাবৃত্তি নহয় । তদুপৰি এতিয়াৰে পৰা চিকিৎসালয়খনত বেটাৰীচালিত বাহন উপলব্ধ কৰা হ’ব বুলিও জানিব পৰা গৈছে ।
লগতে পঢ়ক: আনক সুখী কৰি সুখী হ’ব খোজা এজন যুৱকৰ বিশেষ সফলতাৰ কাহিনী...
