নিউজ ডেস্ক, 11 জুন: লোকসভা নিৰ্বাচন অন্ত পৰাৰ পিচতেই বৃদ্ধি পাইছিল টোল টেক্স ৷ ৰাজপথেৰে যাত্ৰা কৰাৰ সময়ত টোল টেক্স প্ৰদানৰ অভিজ্ঞতা আপোনাৰো নিশ্চয় হৈছে ৷ বহু সময়ত টোল প্লাজাত গুণ্ডাগিৰি চলাৰ গোচৰো পোহৰলৈ আহে । টোল প্লাজাত টোল টেক্সক লৈ সঘনাই টোল কৰ্মী আৰু চালকৰ মাজত কাজিয়াৰ ঘটনা সংঘটিত হয় ।
শেহতীয়াকৈ এটা টোল প্লাজাত একেধৰণৰ ঘটনা পোহৰলৈ আহিছে, য’ত টোল টেক্সক লৈ হোৱা বিবাদৰ ফলত এখন এক্সকেভেটৰৰ চালকে সংঘটিত কৰিলে এক আচৰিত কাণ্ড ৷ খঙত হিতাহিত জ্ঞান হেৰুৱাই চালকজনে এক্সকেভেটৰেৰে টোল প্লাজাটোৰ কিছু অংশ ভাঙি পেলায় ।
লগতে পঢ়ক: যাত্ৰা কৰোঁতে বাৰম্বাৰ ভাবক, টোল কৰত খালী হ’ব পাৰে পকেট - Toll Tax Rate Increase Expressway
এক্সকেভেটৰেৰে টোল প্লাজাটো ভাঙি পেলোৱা দেখি টোল কৰ্মীসকলে সেই স্থানৰ পৰা পলাই গৈ দূৰৈত অৱস্থান কৰে । ছ’চিয়েল মিডিয়াত ভাইৰেল হৈ পৰিছে এক্সকেভেটৰৰ চালকে টোল প্লাজা ভাঙি পেলোৱাৰ ভিডিঅ’ ।
ঘটনাটো উত্তৰ প্ৰদেশৰ হাপুৰ জিলাৰ পিলখুৱা কোটৱালি অঞ্চলৰ । মঙলবাৰে পুৱা পিলখুৱা কোটৱালি অঞ্চলৰ ছিজৰ্চী টোল প্লাজাত টোল টেক্স নিদিয়াকৈ পাৰ হ’বলৈ চেষ্টা চলাইছিল এজন এক্সকেভেটৰৰ চালকে । টোল কৰ্মীসকলে টোল টেক্স দিবলৈ কোৱাত চালক আৰু টোল কৰ্মীৰ মাজত কাজিয়াৰ সূত্ৰপাত ঘটে ।
লগতে পঢ়ক: টোলগেটত প্ৰচণ্ড মাৰপিটৰ ঘটনা, গাড়ীচালকক প্ৰহাৰ কৰ্মচাৰীৰ - Daboka Toll Plaza
এই কাজিয়াৰ পিচত ক্ষুব্ধ এক্সকেভেটৰ চালকজনে নিজৰ এক্সকেভেটৰেৰে টোল প্লাজাটো ভাঙি লণ্ডভণ্ড কৰে । এক্সকেভেটৰেৰে টোল প্লাজা ভাঙি পেলোৱাৰ লগে লগে ৰাষ্ট্ৰীয় ঘাইপথত টোল কৰ্মী আৰু আন চালকৰ মাজত আতংকৰ সৃষ্টি হয় ।
টোল কৰ্মীসকলে ভয় খাই এক্সকেভেটৰখনৰ ওচৰৰ পৰা পলাই যায় । টোল প্লাজাৰ দুয়োদিশে বাহনৰ দীঘলীয়া শাৰী সৃষ্টি হয় । ইয়াৰ পিচতে টোল কৰ্মীসকলে এলাৰ্ম বজাবলৈ ধৰে । কিন্তু এক্সকেভেটৰৰ সৈতে সেই স্থানৰ পৰা পলায়ন কৰে চালকজনে । ৰাষ্ট্ৰীয় ঘাইপথৰ টোল প্লাজাত এনেধৰণৰ গুণ্ডাগিৰিৰ ভিডিঅ’ ভাইৰেল হৈ পৰিছে ছ’চিয়েল মিডিয়াত ।
ছিজৰ্চী টোল প্লাজাৰ মেনেজাৰ অজিত চৌধাৰীয়ে এক্সকেভেটৰ অপাৰেটৰৰ পৰা টোল দাবী কৰাৰ পিচত টোল প্লাজাৰ কেবাটাও কাউনন্টাৰৰ ক্ষতিসাধন কৰা বুলি জানিবলৈ দিয়ে । ইয়াৰ সমান্তৰালকৈ টোল কৰ্মীক হত্যা কৰাৰো চেষ্টা চলোৱা বুলি অভিযোগ উঠিছে । এই সন্দৰ্ভত আৰক্ষীয়ে তদন্ত অব্যাহত ৰাখিছে ।
লগতে পঢ়ক: ব্যয়বহুল হ’ব আপোনাৰ যাত্ৰা, 3-5 শতাংশ বৃদ্ধি টোল কৰ - Toll Tax Rate Increase Expressway
