নেশ্যনেল ডেস্ক, ১৭ মাৰ্চ : ইডিৰ এটাৰ পিচত আন এটা চমন প্ৰত্যাখ্যান কৰিছে দিল্লীৰ মুখ্যমন্ত্ৰী অৰবিন্দ কেজৰিৱালে । অষ্টম চমন প্ৰত্যাখ্যান কৰাৰ পিচত ইডিয়ে মুখ্যমন্ত্ৰী কেজৰিৱাললৈ আন এখন চমন প্ৰেৰণ কৰিছে । দিল্লীৰ সুৰা নীতি কেলেংকাৰী গোচৰত ইডিয়ে কেজৰিৱালৰ বিৰুদ্ধে এই চমন প্ৰেৰণ কৰিছে । ইডিয়ে পূৰ্বে সোধ-পোছৰ বাবে মাতি পঠিয়াইছিল যদিও তাক প্ৰত্যাখ্যান কৰিছিল কেজৰিৱালে ।
অৱশ্যে মুখ্যমন্ত্ৰীগৰাকী এই সন্দৰ্ভত আদালতত হাজিৰ হৈছে । শনিবাৰে, অৰবিন্দ কেজৰিৱালে ৰাউজ এভিনিউ আদালতত হাজিৰ হয় আৰু তাৰ পিচত তেওঁৰ জামিনৰ আবেদন গ্ৰহণ কৰা হয় । দিল্লী সুৰা নীতি কেলেংকাৰী সম্পৰ্কীয় ধন আত্মসাৎ গোচৰত অৰবিন্দ কেজৰিৱাল এতিয়ালৈ ইডিৰ সন্মুখত হাজিৰ হোৱা নাই ।
আদালতত কেজৰিৱালে ইডিক কিছুমান বিশেষ নথি পত্ৰ প্ৰদান কৰিবলৈও অনুৰোধ জনায় । আদালতে তেওঁক জামিন প্ৰদান কৰে আৰু বিষয়টো ১ এপ্ৰিলত পৰৱৰ্তী শুনানিৰ বাবে তালিকাভুক্ত কৰে । কিন্তু তাৰ পিচতে ইডিয়ে কেজৰিৱালৰ বিৰুদ্ধে নৱম চমন প্ৰেৰণ কৰে আৰু কেজৰিৱালক ২১ মাৰ্চত সোধা-পোছাৰ বাবে কাৰ্যালয়ত উপস্থিত হ'বলৈ কয় ।
আনহাতে আম আদমি পাৰ্টীয়ে অভিযোগ কৰিছে যে ইডিয়ে লোকসভা নিৰ্বাচনৰ দিন ঘোষণা কৰাৰ লগে লগে কেজৰিৱালক গ্ৰেপ্তাৰ কৰিব বিচাৰিছে । দিল্লী সুৰা নীতি কেলেংকাৰী সন্দৰ্ভত অৰবিন্দ কেজৰিৱালৰ বিৰুদ্ধে অভিযোগ কৰা হৈছে যে এই সুৰা নীতি সন্দৰ্ভত প্ৰস্তুত কৰা খচৰা নীতি মুখ্যমন্ত্ৰী অৰবিন্দ কেজৰিৱালৰ বাসগৃহতে কৰা হৈছিল আৰু গোটেই বিষয়টো তেওঁৰ জ্ঞাত ।
দিল্লী চৰকাৰৰ সুৰা নীতি কেলেংকাৰীৰ তদন্ত কৰি থকা ইডিয়ে নৱেম্বৰত মুখ্যমন্ত্ৰী অৰবিন্দ কেজৰিৱাললৈ প্ৰথম চমন প্ৰেৰণ কৰিছিল । মুখ্যমন্ত্ৰী অৰবিন্দ কেজৰিৱালে তাৰ পিচত প্ৰেৰণ কৰা সকলো চমন উপেক্ষা কৰিছে । তেওঁ ইডিৰ দ্বাৰা প্ৰেৰণ কৰা চমনৰ সলনি লিখিত উত্তৰ প্ৰেৰণ কৰিছিল । ইয়াৰ পূৰ্বে, চিবিআইয়েও একেটা অভিযোগত কেজৰিৱালক সোধা-পোছা কৰিছে ।
লগতে পঢ়ক :চাৰি ৰাজ্যৰ বিধানসভা নিৰ্বাচন: ১৯ এপ্ৰিলত অৰুণাচল-ছিকিমত বিধানসভা নিৰ্বাচন
