নেশ্যনেল ডেস্ক, 7 জুলাই : 26 দিনৰ দীঘলীয়া অপেক্ষাৰ অন্তত দেওবাৰে সন্ধিয়া চীনৰ পৰা আহি পালে মাৰ্চেণ্ট নেভীৰ বিষয়া অনিল কুমাৰৰ মৃতদেহ ৷ আজি আগ্ৰাত থকা নিজ বাসগৃহ পায়হি মাৰ্চেণ্ট নেভী বিষয়াজনৰ মৃতদেহ ৷ এম্বুলেন্সত মৃতদেহটো ঘৰ আহি পোৱাৰ লগে লগে পৰিয়ালৰ লোকসকল শোকত ভাগি পৰে ৷ বিষয়াজনৰ পত্নী, বৃদ্ধ মাতৃ আৰু দুটা সন্তান শোকত ভাগি পৰে ৷ অচেতন পত্নীয়ে মাথোঁ কৈছে 'আপোনাক নিৰাপদে পঠাইছিলো ৷ আৰু এতিয়া আপুনি এইদৰে আহিছে ৷
মাৰ্চেন্ট নেভীৰ বিষয়াগৰাকীৰ মৃত্যুৰ পিচত পৰিয়ালটোৱে প্ৰধানমন্ত্ৰী মোদীক তেওঁৰ মৃতদেহ অতি শীঘ্ৰে ভাৰতলৈ আনিবলৈ আহ্বান জনাইছিল ৷ ইয়াৰ পিচতে আগ্ৰাৰ সাংসদ তথা কেন্দ্ৰীয় মন্ত্ৰী এছ পি সিং বাঘেলে বৈদেশিক মন্ত্ৰী এছ জয়শংকৰৰ সৈতে বাৰ্তালাপ কৰে ৷ ইয়াৰ পিচত এতিয়া দেওবাৰে পুৱা ভাৰতলৈ আনিব গ’ল মাৰ্চেণ্ট নেভীৰ বিষয়াজনৰ মৃতদেহ ৷
উল্লেখ্য যে আগ্ৰাৰ শ্বাহগঞ্জ থানা এলেকাৰ চানক্য পুৰীৰ ছাই ধাম ৰেচিডেন্সিত বাস কৰা 49 বছৰীয়া অনিল কুমাৰ শ্ৰীবাস্তৱ মাৰ্চেণ্ট নেভীৰ এগৰাকী মুখ্য অভিযন্তা আছিল৷ অনিল কুমাৰ আছিল এম ভি জি এইচ নাইটিংগেলৰ মুখ্য অভিযন্তা ৷ ড্ৰাই ডকিঙৰ বাবে চীনৰ ঝেজিয়াং প্ৰদেশৰ ঝৌছান চহৰত আছিল জাহাজখন ৷ 11 জুনৰ গভীৰ নিশা জাহাজত থকা অনিলৰ স্বাস্থ্যৰ অৱনতি ঘটে ৷ ইয়াৰ পিচতে তেওঁক ঝৌছান হাস্পতালত ভৰ্তি কৰোৱা হয় ৷ নিশা চিকিৎসাৰ অন্তত অনিল কুমাৰক পুৱা চিকিৎসালয়ৰ পৰা যাবলৈ দিয়া হয় ৷ কিন্তু সেইদিনাই দুপৰীয়া বুকুৰ বিষৰ বাবে অনিলক পুনৰ চিকিৎসালয়ত ভৰ্তি কৰোৱা হয় আৰু চিকিৎসাধীন অৱস্থাতে তেওঁৰ মৃত্যু হয় ৷
মাৰ্চেণ্ট নেভীৰ বিষয়া অনিল কুমাৰে পত্নী অঞ্জুলতা, বৃদ্ধ মাতৃ ৰামকিশোৰী শ্ৰীবাস্তৱ আৰু দুটা সন্তানক এৰি থৈ যায় ৷ তেওঁৰ মৃত্যুৰ খবৰ পোৱাৰ পিচৰে পৰা পৰিয়ালটো শোকত ভাগি পৰিছে ৷ পত্নী অঞ্জুলতাই স্বামীৰ কোম্পানী, ভাৰতীয় দূতাবাস আৰু অন্যান্য বিষয়াৰ সৈতে অহৰহ যোগাযোগ কৰি স্বামীৰ মৃতদেহ অতি সোনকালে ভাৰতলৈ আনিবলৈ আহ্বান জনাইছিল ৷ যেতিয়া তেওঁ কাৰো পৰা কোনো সহায় নাপালে, তেতিয়া বৈদেশিক পৰিক্ৰমা মন্ত্ৰালয়ৰ বিষয়াসকলৰ সৈতে যোগাযোগ কৰে ৷ প্ৰধানমন্ত্ৰী মোদীৰ ওচৰতো আবেদন জনাইছিল তেওঁ ৷ ইয়াৰ পিচতে কেন্দ্ৰীয় মন্ত্ৰী এছ পি সিং বাঘেলে বৈদেশিক পৰিক্ৰমা মন্ত্ৰী এছ জয়শংকৰৰ সৈতে এই বিষয়ত আলোচনা কৰাত এই সমস্যাৰ সমাধান হয়৷
অনিল কুমাৰ শ্ৰীবাস্তৱৰ মৃতদেহ ঘৰত পোৱাৰ পিচত যোগী চৰকাৰৰ কেবিনেট মন্ত্ৰী যোগেন্দ্ৰ উপাধ্যায় পৰিয়ালটোক সান্ত্বনা দিবলৈ উপস্থিত হয় ৷ পৰিয়ালৰ লগত তেওঁ বাৰ্তালাপ কৰে ৷ এই সময়ত অনিল কুমাৰ শ্ৰীবাস্তৱৰ পত্নী অঞ্জুলতাই চীন চৰকাৰে তেওঁৰ স্বামীক হাৰাশাস্তি কৰাৰ অভিযোগ উত্থাপন কৰে ৷ তেওঁ কয় যে, চীন চৰকাৰৰ বাবেই পৰিয়ালটোৱে 25 দিন ধৰি স্বামীৰ মৃতদেহৰ পোৱোৰ বাবে অপেক্ষা কৰি থাকিব লগা হ’ল ৷
লগতে পঢ়ক : ১৪ দিন ধৰি চীনত আবদ্ধ ভাৰতীয় মাৰ্চেণ্ট নেভী বিষয়াৰ মৃতদেহ - INDIAN MERCHANT NAVY OFFICER DEATH
