নেশ্যনেল ডেস্ক,১৪ মাৰ্চ : কেন্দ্ৰীয় চৰকাৰে নাগৰিকত্ব সংশোধনী আইনৰ অধিসূচনা জাৰি কৰা পিচতে কেন্দ্ৰীয় গৃহ মন্ত্ৰী অমিত শ্বাহে কয় যে আইনখন কেতিয়াও উঠাই লোৱা নহ'ব আৰু বিজেপি নেতৃত্বাধীন চৰকাৰে ইয়াৰ সৈতে কেতিয়াও আপোচ নকৰে । সংবাদমাধ্যমৰ এক সাক্ষাৎকাৰত অমিত শ্বাহে কয় যে দেশত ভাৰতীয় নাগৰিকত্ব নিশ্চিত কৰাৰ এয়া সাৰ্বভৌম অধিকাৰ । চৰকাৰে ইয়াৰ সৈতে কেতিয়াও আপোচ নকৰে ।
বিৰোধী ইণ্ডিয়া ব্লকৰ নেতাসকলে শাসনলৈ আহিলে আইনখন বাতিল কৰিব বুলি দাবী কৰা সন্দৰ্ভত এক প্ৰশ্নৰ উত্তৰত মন্ত্ৰীগৰাকীয়ে কয় যে বিৰোধীয়ে জানে যে তেওঁলোকৰ ক্ষমতালৈ অহাৰ সম্ভাৱনা ক্ষীণ ।
গৃহ মন্ত্ৰীগৰাকীৰ মতে চিএএ বিজেপি দলে আনিছে আৰু নৰেন্দ্ৰ মোদী নেতৃত্বাধীন চৰকাৰে ইয়াক আনিছে । ইয়াক বাতিল কৰাটো অসম্ভৱ । তেওঁৰ মতে সমগ্ৰ দেশতে ইয়াৰ বিষয়ে সজাগতা সৃষ্টি কৰিব । কেন্দ্ৰীয় মন্ত্ৰীগৰাকীয়ে চিএএ অসাংবিধানিক বুলি কৰা সমালোচনাকো খাৰিজ কৰি কয় যে ই সাংবিধানিক ব্যৱস্থা উলংঘা নকৰে । এই আইন অনুচ্ছেদ ১৪ ৰ সৈতে জড়িত । এই আইনে অনুচ্ছেদ ১৪ উলংঘা নকৰে । ইয়াত এক স্পষ্ট, যুক্তিসঙ্গত শ্ৰেণীবিভাজন আছে । যিসকলে বিভাজনৰ ফলত আফগানিস্তান, পাকিস্তান আৰু বাংলাদেশত আছিল আৰু ধৰ্মীয় অত্যাচাৰৰ সন্মুখীন হৈছিল আৰু ভাৰতলৈ অহাৰ সিদ্ধান্ত লৈছিল, তেওঁলোকৰ বাবে এয়া এক আইন বুলি কেন্দ্ৰীয় মন্ত্ৰীগৰাকীয়ে উল্লেখ কৰে ।
লোকসভা নিৰ্বাচনৰ পূৰ্বে চিএএৰ অধিসূচনা জাৰি কৰাৰ বাবে বিৰোধীয়ে নিৰন্তৰ সমালোচনা কৰি থকা বিষয়ত অমিত শ্বাহে কয় যে ৰাহুল গান্ধী, মমতা বা কেজৰিৱালকে ধৰি সকলো বিৰোধী দলে মিছাৰ ৰাজনীতিত জড়িত হৈ আছে । বিজেপিয়ে দলৰ ২০১৯ ৰ ইস্তাহাৰত স্পষ্ট কৰি দিছে যে দলে চিএএ আনিব আৰু শৰণাৰ্থীসকলক (পাকিস্তান, বাংলাদেশ আৰু আফগানিস্তান) ভাৰতীয় নাগৰিকত্ব প্ৰদান কৰিব । বিজেপিৰ এক স্পষ্ট কাৰ্যসূচী আছে আৰু সেই প্ৰতিশ্ৰুতিৰ অধীনত নাগৰিকত্ব সংশোধনী বিধেয়কখন ২০১৯ চনত সংসদৰ দুয়োখন সদনত গৃহীত হৈছিল । ক'ভিডৰ বাবে এইটো পলম হৈছিল । দলটোৱে নিৰ্বাচনত জনাদেশ পোৱাৰ আগতেই বিজেপিয়ে এই ক্ষেত্ৰত স্পষ্ট কৰি দিছিল বুলি তেওঁ উল্লেখ কৰে ।
তেওঁৰ মতে নিয়মবোৰ এতিয়া এক আনুষ্ঠানিকতা । সময়, ৰাজনৈতিক লাভ বা লোকচানৰ কোনো প্ৰশ্নই নাই । এতিয়া, বিৰোধীয়ে তোষণৰ ৰাজনীতি কৰি তেওঁলোকৰ ভোট বেংক একত্ৰিত কৰিব বিচাৰে বুলি অমিত শ্বাহে অভিযোগ কৰে । শ্বাহৰ মতে বিৰোধী উন্মোচিত হৈছে । চিএএ হৈছে সমগ্ৰ দেশৰ আইন আৰু তেওঁ ৪ বছৰত প্ৰায় ৪১ বাৰ ইয়াৰ পুনৰাবৃত্তি কৰিছে যে ই বাস্তৱত পৰিণত হ'ব ।
গৃহ মন্ত্ৰীয়ে কয় যে ৰাজনৈতিক লাভৰ কোনো প্ৰশ্নই নাই কিয়নো বিজেপিৰ মূল লক্ষ্য হৈছে পাকিস্তান, আফগানিস্তান আৰু বাংলাদেশৰ পৰা অহা নিৰ্যাতিত সংখ্যালঘুসকলক অধিকাৰ আৰু ন্যায় প্ৰদান কৰা ।
শ্বাহৰ মতে বিৰোধীয়ে ছাৰ্জিকেল ষ্ট্ৰাইক আৰু অনুচ্ছেদ ৩৭০ বাতিলৰ ওপৰত প্ৰশ্ন উত্থাপন কৰিছিল আৰু ইয়াক ৰাজনৈতিক লাভৰ সৈতে সংযুক্ত কৰিছিল । তেন্তে চৰকাৰে সন্ত্ৰাসবাদৰ বিৰুদ্ধে কঠোৰ পদক্ষেপ লোৱা উচিত নহয় নেকি ? বিজেপিয়ে ১৯৫০ চনৰ পৰা কৈ আহিছে যে অনুচ্ছেদ ৩৭০ প্ৰত্যাহাৰ কৰা হ'ব । অমিত শ্বাহে লগতে কয় যে দেশৰ সংখ্যালঘুসকলে ভয় কৰাৰ প্ৰয়োজন নাই কিয়নো ইয়াত নাগৰিকৰ অধিকাৰ কাঢ়ি লোৱাৰ কোনো ব্যৱস্থা নাই ।
গৃহ মন্ত্ৰীয়ে আছাদুদিন ওৱেইচি আৰু পশ্চিমবংগৰ মুখ্যমন্ত্ৰী মমতা বেনাৰ্জীৰ দৰে বিৰোধী নেতাসকলক চিএএ মুছলমান বিৰোধী বুলি দাবী কৰাৰ বাবে সমালোচনা কৰে ।
লগতে পঢ়ক :CAA ৰূপায়ণ বিজেপিৰ লেতেৰা ভোট বেংকৰ ৰাজনীতি: কেজৰিৱাল
