নেশ্যনেল ডেস্ক, ১৭ মে' : আপৰ ৰাজ্যসভাৰ সাংসদ স্বাতী মালিৱালৰ কথিত আক্ৰমণক লৈ দিল্লীৰ মুখ্যমন্ত্ৰীক তীব্ৰ আক্ৰমণ কৰে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই । অসমৰ মুখ্যমন্ত্ৰীয়ে কেজৰিৱালক প্ৰশ্ন কৰিছে তেওঁ এতিয়াও কিয় বিভৱ কুমাৰৰ সৈতে ঘূৰি ফুৰিছে । বিভৱ কুমাৰৰ বিৰুদ্ধে কিয় ব্যৱস্থা গ্ৰহণ কৰা নাই বুলি অসমৰ মুখ্যমন্ত্ৰীগৰাকীয়ে কেজৰিৱালক প্ৰশ্ন কৰে । স্বাতী মালিৱালৰ কথিত আক্ৰমণ সন্দৰ্ভত দিল্লী আৰক্ষীয়ে বৃহস্পতিবাৰে সন্ধিয়া কেজৰিৱালৰ সহকাৰী বিভৱ কুমাৰৰ বিৰুদ্ধে এখন এজাহাৰো দাখিল কৰিছে ।
অসমৰ মুখ্যমন্ত্ৰী ড৹ হিমন্ত বিশ্ব শৰ্মাই কয় যে এই সন্দৰ্ভত কোনো ৰাজনীতি হোৱা উচিত নহয় । তেওঁ আদৰ্শগতভাৱে স্বাতী মালিৱালৰ সৈতে নাই যদিও যেতিয়া মহিলাৰ বিৰুদ্ধে অপৰাধ হয় তেতিয়া সেই সন্দৰ্ভত মাত দিয়াটো কৰ্তব্য বুলি তেওঁ উল্লেখ কৰে । মুখ্যমন্ত্ৰীগৰাকীয়ে কয় যে স্বাতী মালিৱালে দিল্লী আৰক্ষীৰ ওচৰত এটা অভিযোগ দাখিল কৰিছে ।
তেওঁ কৈছে যে যি ঘটিছে সেয়া বহুত ভুল । কিন্তু এই সন্দৰ্ভত অৰবিন্দ কেজৰিৱাল কিয় নীৰৱ হৈ আছে বুলি হিমন্ত বিশ্ব শৰ্মাই প্ৰশ্ন কৰে । ঘটনাটো সংঘটিত হোৱাৰ সময়ত কেজৰিৱাল ক'ত আছিল আৰু তেওঁ একেটা কোঠাতে আছিল নে নাই বুলি অসমৰ মুখ্যমন্ত্ৰীগৰাকীয়ে কেজৰিৱালক প্ৰশ্ন কৰে ।
মুখ্যমন্ত্ৰীগৰাকীৰ মতে স্বাতী মালিৱালৰ টুইটৰ দ্বাৰা স্পষ্ট হৈছে যে কেজৰিৱাল এতিয়া অপৰাধী হৈ পৰিছে । ইয়াৰ পূৰ্বে ১৬ মে'ত বিজেপিৰ ৰাষ্ট্ৰীয় মুখপাত্ৰ শ্বেহজাদ পুনাৱালাইও দাবী কৰিছিল যে মুখ্যমন্ত্ৰী অৰবিন্দ কেজৰিৱালে তেওঁৰ সহকাৰী বিভৱ কুমাৰক সুৰক্ষা দি আছে ।
ইফালে চিভিল লাইনছ আৰক্ষীয়ে বৃহস্পতিবাৰে আইপিচিৰ বিভিন্ন ধাৰাত এগৰাকী মহিলাৰ শালীনতা, অপৰাধমূলক ভাবুকি, শব্দৰ ভংগী বা অপমান আৰু আক্ৰমণৰ উদ্দেশ্যৰে কৰা অপৰাধৰ বাবে এটা গোচৰ ৰুজু কৰিছে । বৃহস্পতিবাৰে স্বাতী মালিৱালে দাখিল কৰা আনুষ্ঠানিক অভিযোগৰ ভিত্তিতে এই ব্যৱস্থা গ্ৰহণ কৰা হৈছে ।
