ممتا بنرجی نے کہا کہ ہم نے سرکاری اہلکاروں سے ٹریفک کے نئے قوانین کے سلسلے میں مشورہ کیا لیکن سب کی یہی رائے ہے کہ اس قانون کے نفاذ سے عوام کو کافی پریشانیوں کا سامنا کرنا پڑ سکتا ہے اس لیے فی الحال بنگال میں جدید موٹر وہیکل ایکٹ نافذ نہیں کریں گے۔
ممتا بنرجی نے کہا مرکز کی موٹر وہیکل قانون بہت سخت ہے ہم نے پارلیمنٹ میں اس قانون میں ترمیم کی مخالفت کی تھی کیونکہ اس قانون سے عام آدمی کو کافی پریشانیوں کا سامنا کرنا پڑے گا۔
انہوں نے مزید کہا کہ پوری ریاست میں فی الحال سیف ڈرائیو سیو لائف مہم جاری ہے اور مغربی بنگال ان تین ریاستوں میں شامل ہے جس نے مرکزی حکومت کے ترمیم شدہ موٹر وہیکل قانون کی مخالفت کی ہے۔
واضح رہے کہ ماہ جولائی میں ٹریفک کے متعلق قانون پاس ہوا تھا اور یکم ستمبر سے یہ قانون نافذ کر دیا گیا ہے۔
نئے ٹریفک قوانین میں بغیر ہیلمیٹ کے موٹر سائیکل چلانے پر ایک ہزار روپے جرمانہ طئے کیا گیا ہے جو پہلے سو روپے تھا جبکہ ڈرائیونگ کے دوران فون پر بات کرنے پر 5 ہزار جرمانہ ادا کرنا پڑے گا جو اس سے قبل ایک ہزار روپے تھا اس کے علاوہ نشے کی حالت میں گاڑی چلانے پر دس ہزار جرمانہ طئے کیا گیا ہے۔