بھیم تال کی جامع مسجد اسلامی فن تعمیر کا بہترین نمونہ

بھیم تال میں واقع جھیل کے نزدیک تعمیر جامع مسجد اسلامی فن تعمیر کا ایک بہترین نمونہ ہے، جو بھیم تال کی وادیوں میں آنے والے سیاحوں کو اپنی جانب راغب کرتی ہے۔

اتراکھنڈ کی پہاڑی میں بسا سیاحتی مقام بھیم تال جس میں واقع جامع مسجد اسلامی فن تعمیر کا شاندار نمونہ ہے۔ بھیم تال کی جھیل کے نزدیک تعمیر یہ مسجد یہاں آنے والے سیاحوں کو اپنی جانب راغب کرتی ہے۔


قدرتی وادیوں کے بیچ خوشنما نظر آنے والی یہ مسجد سیاحتی مقام بھیم تال کی خاص پہچان ہے جو اپنے موجودگی سے اس وادی کو نکھارتی ہے۔ آسمان کا بوسہ لیتی اس مسجد کی بلند و بالا مینار کئی کلومیٹر دور سے ہی نظر آنے لگتی ہے۔

بھیم تال کے ڈاک بنگلہ علاقے میں واقع اس جامع مسجد کی تعمیر اب سے 102 سال قبل سن 1919 میں جمشیر خان نے کرائی تھی۔

اس پوری مسجد میں لگی خوبصورت ٹائلز اور نقش و نگاری مسجد کی خوبصورتی میں چار چاند لگاتی ہے، مسجد کی لمبائی تقریباً 60 فٹ اور چوڑائی 25 فٹ ہے۔ اس کے اندرونی حصہ میں 12 صفیں بچھائی گئی ہے جبکہ پوری مسجد میں تقریباً 30 صفوں کے لیے جگہ ہے، جہاں ایک ساتھ تقریباً 1000 سے زائد افراد نماز ادا کر سکتے ہیں۔

مسجد کی پوری عمارت کی تعمیر پہاڑی پتھروں اور سیمینٹ سے کی گئی ہے۔ یہ مسجد دو منزلہ بنی ہوئی ہے، اس کی پہلی منزل جتنی خوبصورت نظر آتی ہے اِس سے کہیں زیادہ اس کا اوپری حصہ پہاڑوں کی خوبصورتی میں چار چاند لگاتا ہے۔