حیدرآباد: شہرحیدرآباد کے نامپلی میں ایک اپارٹمنٹ میں آگ لگنے کا واقعہ پیش آیا۔ بازار گھاٹ علاقہ کے کمیکل گودام کی چوتھی منزل میں بڑے پیمانہ پر آگ لگ گئی۔ اس واقعہ میں اس منزل پر پھنس جانے والے 9 افراد زندہ جھلس کر ہلاک ہوگئے اور دیگر تین شدید طور پر جھلس گئے۔ اس واقعہ کی اطلاع کے ساتھ ہی چار فائر انجن وہاں پہنچے جنہوں نے آگ پر قابو پانے کی کوششوں کا آغاز کردیا۔
اس عمارت کی نچلی منزل پر گیاریج ہونے کے پیش نظر کاروں کی مرمت کے دوران یہ آگ لگی۔اسی مقام پر ڈیزل اور کمیکل کے ڈرمس بھی رکھے ہوئے تھے جس کے نتیجہ میں یہ آگ تیزی کے ساتھ پھیلتی چلی گئی۔ اس آگ کو دیکھ کر متصل اپارٹمنٹ میں رہنے والے کافی خوفزدہ ہوگئے۔ فائر بریگیڈ کے عہدیداروں کی مدد سے سیڑھیوں کے ذریعہ اپارٹمنٹ میں رہنے والے باہر نکل آئے۔ اس آگ کی وجہ سے اپارٹمنٹ کے پارکنگ ایریا میں موجود بائیکس اور کاریں جل کر خاکستر ہوگئیں۔ آگ لگنے سے اپارٹمنٹ کے باہر رکھی گاڑیاں بھی جل گئیں۔
وزیر اعلی تلنگانہ کے چندر شیکھر راو نے شہر حیدرآباد کے بازار گھاٹ علاقہ میں آگ لگنے کے واقعہ پر گہرے افسوس کا اظہار کیا۔ انہوں نے مہلوکین کے خاندانوں سے تعزیت کااظہار کیا۔ انہوں نے عہدیداروں کو ہدایت دی کہ وہ اس واقعہ میں جھلس جانے والوں کے بہتر علاج کو یقینی بنائیں۔ انہوں نے عہدیداروں کو صورتحال پر نظر رکھنے اور جھلسنے ہوئے افراد کی عاجلانہ صحت یابی کے لئے اقدامات کی بھی ہدایت دی۔ وزیراعلی کے سی آر نے حادثے میں ہلاک ہونے والے افراد کے اہل خانہ کو پانچ لاکھ روپے ایکس گریشیا دینے کا اعلان کیا ہے۔